पहिल्या 30 मिनिटांत कुणाची सरशी, कुणाची पिछाडी? राज्यभरातील निकाल पाहा एका क्लिकवर…

by Webdesk
21 Dec 2025

राज्यातील नगरपरिषदा आणि नगरपंचायतींच्या निवडणुकांचे निकाल आज जाहीर होत असून, सकाळी १० वाजल्यापासून मतमोजणीला सुरुवात झाली आहे. राज्यातील एकूण २६३ नगरपरिषदा आणि नगरपंचायतींसाठी २ डिसेंबर २०२५ रोजी मतदान पार पडले होते. याशिवाय २३ नगरपरिषदा आणि नगरपंचायतींमधील अध्यक्ष व सदस्यपदांसाठी शनिवारी स्वतंत्रपणे मतदान झाले होते. तब्बल तीन वर्षांच्या प्रतीक्षेनंतर होत असलेल्या या निवडणुकांच्या निकालांकडे राज्यभरातील राजकीय वर्तुळाचे लक्ष लागले आहे.

सकाळी मतमोजणी सुरू होताच विविध ठिकाणांहून आघाडी-पिछाडीचे कल समोर येऊ लागले आहेत. बारामती नगरपरिषदेत टपाली मतांच्या पहिल्या फेरीत राष्ट्रवादी काँग्रेस अजित पवार गटाचे नगराध्यक्षपदाचे उमेदवार सचिन सातव यांनी आघाडी घेतल्याची माहिती समोर आली आहे. सावंतवाडी नगरपरिषदेत पहिल्या फेरीत भाजपच्या नगराध्यक्षा श्रद्धा राजे भोसले या ३२४ मतांनी पुढे असल्याचे चित्र आहे.

मराठवाड्यात सिल्लोड नगरपरिषदेत पोस्टल मतमोजणीत शिवसेना शिंदे गटाचे समीर अब्दुल सत्तार आघाडीवर असून, हे विद्यमान आमदार अब्दुल सत्तार यांचे चिरंजीव आहेत. बीड जिल्ह्यातून पहिला निकाल जाहीर झाला असून, माजलगाव येथील प्रभाग क्रमांक १ मधून राष्ट्रवादी काँग्रेस अजित पवार गटाचे अमोल सरवदे विजयी झाले आहेत. याच प्रभागात शरद पवार गटाचे शरद यादव यांनाही यश मिळाल्याची नोंद आहे.

पुणे जिल्ह्यातील वडगाव मावळ नगरपंचायतीचा पहिला निकाल समोर आला असून, राष्ट्रवादी काँग्रेस अजित पवार गटाचे राहुल ढोरे हे अवघ्या एका मताच्या फरकाने निवडून आले आहेत. सोलापूर जिल्ह्यातील बार्शी नगरपरिषदेत प्रभाग क्रमांक १ आणि २ मधून भाजपचे चार उमेदवार विजयी झाल्याचे स्पष्ट झाले आहे.

नांदेड जिल्ह्यातील मुदखेड नगरपरिषदेत प्रभाग क्रमांक २ मधून काँग्रेसचे दोन नगरसेवक निवडून आले आहेत. बीड नगरपालिकेतील प्रभाग क्रमांक १ मध्ये भाजपचे नितीन साखरे आणि शुभम धूत यांनी विजय मिळवला आहे. पालघर जिल्ह्यातील जव्हार नगरपरिषदेच्या पहिल्या फेरीत भाजपचे चार, राष्ट्रवादी काँग्रेस अजित पवार गटाचा एक आणि शिवसेना शिंदे गटाचा एक उमेदवार विजयी झाल्याची माहिती आहे.

पैठण नगरपरिषदेत प्रभाग क्रमांक ४ मधून शिवसेनेचे दोन उमेदवार – संगीता मापारी आणि सुनील रासने – विजयी ठरले आहेत. परतूर नगरपालिकेत भाजपच्या नगराध्यक्षपदाच्या उमेदवार प्रियांका राक्षे या सुमारे दोन हजार मतांच्या फरकाने आघाडीवर आहेत.

छत्रपती संभाजीनगर विभागातील नगराध्यक्षपदांच्या निकालांकडे विशेष लक्ष लागले आहे. सिल्लोड येथे शिवसेनेचे समीर सत्तार पोस्टल मतांमध्ये आघाडीवर आहेत. कन्नडमध्ये काँग्रेसचे शेख फरीन पुढे आहेत, तर पैठणमध्ये ठाकरे गटाच्या अपर्णा गोर्डे आघाडीवर असल्याचे चित्र आहे. गंगापूरमध्ये भाजपचे प्रदीप पाटील, खुलताबादमध्ये भाजपचे परशराम बारगळ, वैजापूरमध्ये पोस्टल मतांमध्ये भाजपचे दिनेश परदेशी आणि फुलंब्री पंचायतमध्ये भाजपचे सुहास शिरसाठ यांनी आघाडी घेतली आहे.

उत्तर महाराष्ट्रात जळगाव जिल्ह्यात चाळीसगाव नगरपरिषदेत भाजप आमदार मंगेश चव्हाण यांच्या पत्नी प्रतिभा चव्हाण या टपाली मतदानात आघाडीवर आहेत. पाचोरा नगरपरिषदेत शिवसेना आमदार किशोर पाटील यांच्या पत्नी सुनीता पाटील या पोस्टल मतमोजणीत पुढे असल्याचे दिसत आहे.

कोकणात कणकवली नगरपरिषदेत भाजपने पहिला विजय नोंदवला असून, प्रभाग क्रमांक १ मधून भाजपचे राजेश राणे विजयी झाले आहेत. संगमनेर नगरपालिकेत नगराध्यक्षपदासाठी संगमनेर सेवा समितीच्या मैथिली तांबे या ७७० मतांनी आघाडीवर असून, शिवसेनेच्या सुवर्णा खताळ पिछाडीवर आहेत. याच ठिकाणी संगमनेर सेवा समितीचे दोन नगरसेवकही विजयी झाले आहेत.

मालवण नगरपरिषदेत नगराध्यक्षपदासाठी शिंदे गटाच्या ममता वराडकर या १७२ मतांच्या फरकाने पुढे आहेत. मतांचे तपशील पाहता ममता वराडकर यांना ९८१ मते मिळाली असून, भाजपच्या शिल्पा खोत यांना ८०९ तर ठाकरे गटाच्या पूजा करलकर यांना ६८९ मते मिळाली आहेत.

राज्यातील विविध भागांतून निकाल आणि कल समोर येत असताना, पुढील काही तासांत चित्र अधिक स्पष्ट होणार आहे. मतमोजणी प्रक्रिया सुरळीत पार पडावी यासाठी प्रशासन सज्ज असून, अंतिम निकालांकडे संपूर्ण राज्याचे लक्ष लागले आहे.

Image Courtesy:

02 Jan 2026

BMC Elections

पहिल्या 30 मिनिटांत कुणाची सरशी, कुणाची पिछाडी? राज्यभरातील निकाल पाहा एका क्लिकवर…

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates