वसई-विरार निवडणूक : उमेदवार मैदानात सज्ज, पण पुन्हा महापालिका निवडणूक पुढे ढकलली जाणार?

मुंबई : राज्यातील रखडलेल्या स्थानिक स्वराज्य संस्थांच्या निवडणुकांना अखेर वेग येण्याची चिन्हे दिसू लागली आहेत. प्रभाग रचना आणि आरक्षण निश्चित झाल्याने अनेक ठिकाणी निवडणुकीच्या तारखांबाबत उत्सुकता निर्माण झाली आहे. पंचायत समित्या, जिल्हा परिषदांपासून ते महापालिकांपर्यंत सर्व स्तरांवरील निवडणुका पार पडणार असल्याने राजकीय वातावरणात चैतन्य पसरले आहे. इच्छुक उमेदवारांनी आपली तयारी सुरू करत प्रचाराचे नियोजनही आखायला सुरुवात केली आहे. मात्र, वसई-विरार महापालिकेच्या निवडणुकीवर मात्र पुन्हा एकदा अनिश्चिततेचे सावट आहे. या निवडणूक प्रक्रियेविरोधात तब्बल चार वेगवेगळ्या याचिका दाखल झाल्यामुळे निवडणुकीची शक्यता पुन्हा लांबणीवर जाण्याची भीती निर्माण झाली आहे.