धडधड वाढली, उत्सुकता शिगेला; नगरपरिषदेच्या निकालासाठी मोजके तास बाकी, कोणाच्या पदरात विजय?

by Webdesk
20 Dec 2025

मुंबई : राज्यातील स्थानिक स्वराज्य संस्थांच्या निवडणुकांचे निकाल जाहीर होण्याची वेळ आता अगदी जवळ आली आहे. राज्यातील 246 नगरपरिषदा आणि 42 नगरपंचायतींचे निकाल रविवारी, 21 डिसेंबर रोजी घोषित होणार आहेत. या निवडणुकांचा पहिला टप्पा 2 डिसेंबर रोजी पार पडला होता. त्या दिवशी राज्यातील 263 नगरपरिषदा आणि नगरपंचायतींसाठी मतदान झाले होते. यानंतर दुसऱ्या टप्प्यात उर्वरित 23 नगरपरिषदा व नगरपंचायतींच्या अध्यक्ष व सदस्य पदांसाठी तसेच 143 रिक्त सदस्यपदांच्या जागांसाठी 20 डिसेंबर रोजी मतदान होणार आहे.

21 डिसेंबर 2025 रोजी सकाळी 10 वाजल्यापासून मतमोजणीला सुरुवात होणार असून निकालाबाबतचे सर्वात ताजे अपडेट्स सकाळी 9 वाजल्यापासून उपलब्ध होणार आहेत. तब्बल तीन वर्षांच्या प्रतीक्षेनंतर या निवडणुका पार पडत असल्याने राजकीय वर्तुळासह सर्वसामान्य जनतेचे लक्ष निकालांकडे लागले आहे.

मतमोजणीसाठी प्रशासन सज्ज

मतमोजणीची प्रक्रिया सुरळीत, पारदर्शक आणि शांततेत पार पडावी, यासाठी जिल्हा प्रशासन, निवडणूक यंत्रणा आणि पोलिस विभाग पूर्णतः सज्ज झाले आहेत. प्रत्येक मतमोजणी केंद्रावर आवश्यक ते मनुष्यबळ, तांत्रिक साधने आणि कडेकोट सुरक्षा व्यवस्था उभारण्यात आली आहे. कोणताही अनुचित प्रकार घडू नये यासाठी प्रशासनाकडून काटेकोर नियोजन करण्यात आले आहे.

जर कुठेही कायदा व सुव्यवस्थेचा प्रश्न निर्माण झाला, तर संबंधितांवर कठोर कारवाई करण्यात येणार असून त्या कारवाईची माहिती राज्य निवडणूक आयोगाला तात्काळ कळवली जाणार आहे. मतदार, उमेदवार किंवा राजकीय पक्षांमध्ये गैरसमज पसरू नयेत यासाठी निवडणूक आयोग विशेष दक्षता घेत आहे.

राज्यभर कुठे कुठे होणार मतमोजणी?

राज्यातील विविध विभागांमध्ये नगरपरिषदा व नगरपंचायतींसाठी मतमोजणी होणार आहे.

कोकण विभागात पालघर जिल्ह्यात डहाणू, जव्हार, पालघर आणि वाडा; रायगड जिल्ह्यात अलिबाग, कर्जत, खोपोली, महाड, माथेरान, मुरुड-जंजिरा, पेण, रोहा, श्रीवर्धन आणि उरण; रत्नागिरी जिल्ह्यात चिपळूण, खेड, रत्नागिरी, राजापूर; तर सिंधुदुर्ग जिल्ह्यात कणकवली, मालवण, सावंतवाडी आणि वेंगुर्ला येथे मतमोजणी होणार आहे.

ठाणे विभागात अंबरनाथ आणि कुळगाव-बदलापूर या ठिकाणी मतमोजणी प्रक्रिया राबवली जाईल.

नाशिक विभागात अहमदनगर, धुळे, नंदुरबार, नाशिक आणि जळगाव जिल्ह्यातील अनेक नगरपरिषदांमध्ये निकाल जाहीर होणार आहेत. देवळाली प्रवरा, संगमनेर, शिर्डी, सिन्नर, येवला, मनमाड, नांदगाव, भुसावळ, चाळीसगाव, अमळनेर यांसह अनेक ठिकाणांचा यात समावेश आहे.

पुणे विभागात पुणे, कोल्हापूर, सांगली, सातारा आणि सोलापूर जिल्ह्यांतील नगरपरिषदांचे निकाल जाहीर होतील. आळंदी, बारामती, लोणावळा, तळेगाव दाभाडे, जयसिंगपूर, इस्लामपूर, कराड, फलटण, पंढरपूर, बार्शी यांसारख्या प्रमुख शहरांचा यात समावेश आहे.

मराठवाड्यात (छत्रपती संभाजीनगर विभाग) छत्रपती संभाजीनगर, बीड, धाराशिव, जालना, लातूर, नांदेड, हिंगोली आणि परभणी जिल्ह्यांतील नगरपरिषदांमध्ये मतमोजणी होणार आहे. गंगापूर, सिल्लोड, अंबेजोगाई, माजलगाव, तुळजापूर, उदगीर, निलंगा, परळी, देगलूर, बसमतनगर यांसारख्या ठिकाणी निकाल जाहीर होतील.

अमरावती विभागात अकोला, अमरावती, बुलढाणा, वाशिम आणि यवतमाळ जिल्ह्यांतील नगरपरिषदांचे निकाल घोषित होतील. अकोट, मुर्तिजापूर, अचलपूर, अंजनगाव, खामगाव, शेगाव, कारंजा, रिसोड, पुसद, वणी आदी शहरांचा यात समावेश आहे.

नागपूर विभागात नागपूर, भंडारा, चंद्रपूर, गडचिरोली, गोंदिया आणि वर्धा जिल्ह्यांतील नगरपरिषदांमध्ये मतमोजणी होणार आहे. कामठी, काटोल, उमरेड, रामटेक, तुमसर, बल्लारपूर, चंद्रपूर, गोंदिया, हिंगणघाट आणि वर्धा या प्रमुख ठिकाणांचा यात समावेश आहे.

निकालाकडे सर्वांचे लक्ष

राज्यातील शहरी स्थानिक स्वराज्य संस्थांच्या सत्तासमीकरणांवर या निकालांचा मोठा परिणाम होणार आहे. त्यामुळे राजकीय पक्ष, उमेदवार आणि नागरिक निकालाची उत्सुकतेने वाट पाहत आहेत. तीन वर्षांच्या प्रतीक्षेनंतर होणाऱ्या या निकालांमुळे राज्याच्या राजकारणाला नवी दिशा मिळण्याची शक्यता आहे.

Image Courtesy:

02 Jan 2026

BMC Elections

धडधड वाढली, उत्सुकता शिगेला; नगरपरिषदेच्या निकालासाठी मोजके तास बाकी, कोणाच्या पदरात विजय?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates