राजकारणाचा मोठा खेळ: भाजपच्या चक्रव्यूहात एकनाथ शिंदे अडकणार? महापालिका रणसंग्रामात कोणाची बाजू भारी पडणार?

by Webdesk
29 Sep 2025

मुंबई : राज्यातील स्थानिक स्वराज्य संस्थांच्या निवडणुकांची घोषणा काही दिवसांत होण्याची शक्यता आहे. सर्वोच्च न्यायालयाच्या आदेशानुसार ३१ जानेवारी २०२६ पूर्वी या निवडणुका पार पाडणे आवश्यक असल्याने राजकीय पक्षांनी तयारी सुरू केली आहे. महाविकास आघाडी सावध भूमिका घेत असल्याचे दिसत आहे, तर दुसरीकडे महायुतीत मात्र स्वबळावर निवडणुका लढण्याची चाचपणी सुरू असल्याचे चित्र स्पष्ट होत आहे. विशेष म्हणजे, शिवसेना शिंदे गटाचे प्रमुख नेते व उपमुख्यमंत्री एकनाथ शिंदे यांना भाजपकडून घेरण्याचे प्रयत्न होत असल्याच्या चर्चा रंगू लागल्या आहेत.

मुंबई महापालिकेत महायुतीचा महापौर बसवण्याचा नारा दिला जात आहे. मात्र ठाणे जिल्ह्यातील महापालिकांच्या बाबतीत भाजप व शिंदे गटाचे सूर जुळत नसल्याने दोन्ही पक्ष स्वबळावर निवडणूक लढवण्याच्या तयारीत आहेत. अशा परिस्थितीत अजित पवार गटाची राष्ट्रवादी काँग्रेसही काही ठिकाणी निर्णायक भूमिका बजावू शकते.

ठाणे हे शिंदे गटासाठी पारंपरिक बालेकिल्ला मानले जाते. उपमुख्यमंत्री एकनाथ शिंदे आणि आमदार प्रताप सरनाईक यांनी येथे जोरदार ताकद दाखवली आहे. तर भाजपकडून माजी मंत्री गणेश नाईक आणि आमदार संजय केळकर यांनी आपली मोर्चेबांधणी सुरू केली आहे. विशेष म्हणजे, नाईकांच्या "जनता दरबार"ला प्रत्युत्तर देण्यासाठी सरनाईक यांनी पालघरमध्ये आणि नरेश म्हस्के यांनी नवी मुंबईत "जनता दरबार" सुरू केला आहे. यातून शिंदे गटाने भाजपला थेट प्रत्युत्तर दिले आहे.

नवी मुंबईत गणेश नाईक यांचे प्रभाव कायम आहे. मात्र भाजप नेतृत्व नाईक व आमदार मंदा म्हात्रे यांच्यात समेट घडवण्याचा प्रयत्न करत आहे. म्हात्रे यांना सध्या नवी मुंबई भाजपात वरचष्मा असल्याचे दिसते. नवी मुंबई भाजप अध्यक्ष पदाच्या निवडीत त्यांचे मत निर्णायक ठरले. त्यामुळे स्थानिक पातळीवरून स्वबळावर निवडणूक लढण्याचा आग्रह धरला जात आहे. त्यामुळे नवी मुंबईत भाजप विरुद्ध शिंदे गट असा थेट संघर्ष दिसू शकतो.

मीरा-भाईंदरमध्येही भाजपची जोरदार तयारी सुरू आहे. भाजप आमदार नरेंद्र मेहता हे आघाडीवर असून मागील निवडणुकीत ९५ पैकी बहुमत मिळवण्यात भाजपला यश आले होते. शिवसेनेला फक्त २२ जागा मिळाल्या होत्या. या वेळीही भाजप आपली ताकद सिद्ध करण्यासाठी सज्ज असल्याचे चित्र दिसते.

कल्याण-डोंबिवली महापालिकेत भाजप प्रदेशाध्यक्ष रवींद्र चव्हाण हे थेट आघाडीवर आहेत. येथे पहिल्यांदाच पॅनेल पद्धतीने मतदान होणार आहे. मागील वेळी भाजप व शिवसेना स्वतंत्रपणे निवडणूक लढले होते, मात्र निकालानंतर ते एकत्र आले. यंदा मात्र भाजप आपली वाढती ताकद दाखवण्यासाठी आणि कार्यकर्त्यांना संधी देण्यासाठी स्वबळावर उतरण्याचा विचार करत आहे. भाजप नेतृत्वाचे म्हणणे आहे की यामुळे पक्षाचा विस्तार होईल आणि नाराज कार्यकर्ते इतर पक्षांकडे वळणार नाहीत. दुसरीकडे शिंदे गटाचा आरोप आहे की रवींद्र चव्हाण स्थानिक पातळीवर शिवसेनेचे खच्चीकरण करत आहेत. त्यांची भाजप प्रदेशाध्यक्षपदी झालेली नियुक्ती ही शिंदे गटासाठी धोक्याची घंटा असल्याची चर्चा आहे.

उल्हासनगरमध्ये भाजपचा आमदार आहे, मात्र स्थानिक नेते पप्पू कलानी यांच्या गटाशी त्यांचा संघर्ष कायम आहे. पप्पू कलानी यांचे सुपुत्र ओमी कलानी यांनी विधानसभा निवडणूक राष्ट्रवादी शरद पवार गटाकडून लढवली होती. नुकतेच ओमी कलानी यांनी शिवसेना शिंदे गटासोबत जाण्याचे संकेत दिले आहेत. त्यामुळे येथेही स्वबळावर निवडणूक लढण्याची शक्यता आहे.

एकूणच पाहता, ठाणे, कल्याण-डोंबिवली, मीरा-भाईंदर, नवी मुंबई, भिवंडी आणि उल्हासनगर या सहा महापालिकांमध्ये महायुतीचे दोन्ही प्रमुख घटक – भाजप व शिवसेना शिंदे गट – स्वतंत्र तयारी करताना दिसत आहेत. इच्छुक उमेदवारांची मोठी संख्या लक्षात घेता जर स्वबळाचा निर्णय घेतला नाही, तर कार्यकर्त्यांमध्ये नाराजी वाढून त्याचा परिणाम निवडणुकीवर होऊ शकतो, अशी भीती व्यक्त केली जात आहे.

या पार्श्वभूमीवर ठाणे जिल्ह्यातील निवडणुका भाजप आणि शिंदे गटाच्या ताकदीची खरी कसोटी ठरणार आहेत. महापालिका रणांगणात कोणाची बाजू वरचढ ठरणार, याकडे संपूर्ण राज्याचे लक्ष लागले आहे.

Image Courtesy:

02 Jan 2026

BMC Elections

राजकारणाचा मोठा खेळ: भाजपच्या चक्रव्यूहात एकनाथ शिंदे अडकणार? महापालिका रणसंग्रामात कोणाची बाजू भारी पडणार?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates