काँग्रेसमध्ये जाण्याच्या तयारीत असलेल्या जगतापांना ठाकरेंचा थेट फोन, ९ मिनिटांची सखोल चर्चा; मोठ्या ऑफरचीही चर्चा

by Webdesk
26 Dec 2025

पुणे : पुरोगामी विचारधारेला अंतिम मानत प्रशांत जगताप यांनी शरद पवार यांच्या राष्ट्रवादी काँग्रेसला रामराम ठोकला आहे. सत्तेच्या समीकरणांसाठी तडजोडीची भूमिका घेतली जात असल्याचे पाहून आपण या प्रवाहातून बाहेर पडण्याचा निर्णय घेतल्याचे त्यांनी स्पष्ट केले. येत्या काही तासांत जगताप काँग्रेस पक्षात प्रवेश करणार असल्याच्या जोरदार चर्चा सुरू असतानाच, शिवसेना (ठाकरे गट) पक्षप्रमुख उद्धव ठाकरे यांनी स्वतः त्यांच्याशी दूरध्वनीवरून संपर्क साधत शिवसेनेत येण्याची ऑफर दिल्याने राजकीय वर्तुळात मोठी खळबळ उडाली आहे.

पुणे आणि पिंपरी-चिंचवड महापालिकांमध्ये गेलेली सत्ता परत मिळवण्यासाठी उपमुख्यमंत्री अजित पवार प्रयत्नशील आहेत. याच पार्श्वभूमीवर राष्ट्रवादी काँग्रेसच्या दोन्ही गटांनी एकत्र येऊन निवडणूक लढवावी, यासाठी हालचाली सुरू झाल्या आहेत. शरद पवार यांच्या राष्ट्रवादी काँग्रेसनेही या प्रयत्नांना हिरवा कंदील दाखविल्याचे संकेत मिळाले आहेत. मात्र, गेली २५ वर्षे पुरोगामी विचारसरणीसाठी ज्यांच्या सोबत लढत होतो, तोच पक्ष सत्तेच्या जवळ जाण्याचा निर्णय घेत असेल, तर आपण त्याचा भाग होऊ शकत नाही, अशा ठाम भूमिकेतून प्रशांत जगताप यांनी राष्ट्रवादी काँग्रेसमधून बाहेर पडण्याचा निर्णय घेतला.

जगताप यांच्या या निर्णयानंतर गुरुवारी रात्री शिवसेना पक्षप्रमुख उद्धव ठाकरे यांनी त्यांना फोन केला. या फोन कॉलमध्ये दोघांमध्ये सुमारे साडे नऊ मिनिटे सखोल चर्चा झाली.

उद्धव ठाकरेंचा थेट संपर्क

आपण पुरोगामी विचारांसाठी राष्ट्रवादी काँग्रेसमधून बाहेर पडल्याचे समजताच मी आपल्याशी संपर्क साधला, असे उद्धव ठाकरे यांनी जगताप यांना सांगितले. यावेळी प्रशांत जगताप यांनी आपल्या राजकीय प्रवासाचा आणि पक्ष सोडण्यामागील कारणांचा सविस्तर आढावा ठाकरे यांना दिला. शरद पवार यांच्या नेतृत्वाखाली आपण दीर्घकाळ काम केले, मात्र सत्तेसाठी तडजोडीची दिशा स्वीकारली जात असल्याचे पाहून अंतर्मुख होऊन हा निर्णय घेतल्याचे त्यांनी स्पष्ट केले.

यावर उद्धव ठाकरे यांनी शिवसेनेची भूमिका मांडताना, आम्ही भारतीय जनता पक्षासोबत जाणार नाही, असे ठामपणे सांगितले. तसेच, पुरोगामी विचार, संविधान आणि मराठी अस्मितेच्या रक्षणासाठी लढणाऱ्या शिवसेनेत येण्याचे खुले निमंत्रण त्यांनी प्रशांत जगताप यांना दिले.

ठाकरेंच्या ऑफरवर जगतापांची भूमिका

उद्धव ठाकरे यांच्या ऑफरवर प्रतिक्रिया देताना प्रशांत जगताप यांनी महायुती सरकारवर तीव्र नाराजी व्यक्त केली. महायुतीमुळे राज्याचे मोठे नुकसान झाले असून, अशा शक्तींशी कोणत्याही परिस्थितीत हातमिळवणी होऊ शकत नाही, असे त्यांनी स्पष्ट केले. माझी लढाई ही पुरोगामी चळवळ, संविधानाची मूल्ये आणि लोकशाहीच्या बाजूने आहे. त्यामुळे महायुतीला थेट आव्हान देऊ शकणाऱ्या राजकीय प्रवाहातच जाण्याचा मी निर्णय घेईन, असे त्यांनी ठाकरेंना सांगितले.

शिवसेनेच्या ऑफरबाबत विचार करण्यासाठी वेळ मागत, आपले निमंत्रण नम्रपणे स्वीकारतो आणि विचार करून अंतिम निर्णय कळवतो, असे जगताप यांनी उद्धव ठाकरे यांना सांगितले.

महायुतीविरोधातील ठाम भूमिका

या चर्चेदरम्यान पुणे आणि पिंपरी-चिंचवड शहरांच्या विकासाचा मुद्दाही चर्चेला आला. महायुतीच्या कारभारामुळे या दोन्ही शहरांचा बोजवारा उडाला असल्याचे जगताप यांनी ठाकरेंसमोर मांडले. गेली तीन वर्षे ज्या महायुतीवर आपण सातत्याने टीका करत आलो आहोत, त्यांच्याच घटक पक्षासोबत युती केली, तर जनतेसमोर कोणते मुद्दे घेऊन जायचे, असा सवाल त्यांनी उपस्थित केला.

लोकशाही मूल्ये, पुरोगामी विचार आणि जनहिताच्या राजकारणाशी तडजोड करता येणार नाही, अशी भावना व्यक्त करत प्रशांत जगताप यांनी आपली भूमिका ठामपणे मांडली. त्यामुळे त्यांच्या पुढील राजकीय निर्णयाकडे आता राज्यभरातील राजकीय वर्तुळाचे लक्ष लागले आहे.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates