Thackeray Alliance NCP Sharad Pawar:मुंबई महापालिकेत ट्विस्टच ट्विस्ट! ‘या’ चार जागांनी ठाकरे–शरद पवार आघाडीची गणितं बिघडवली

by Webdesk
26 Dec 2025

Source: News 18 Marathi

मुंबई : मुंबई महानगरपालिका निवडणुकीसाठी उमेदवारी अर्ज दाखल करण्याची अंतिम तारीख जवळ येत असून, राजकीय हालचालींना वेग आला आहे. या पार्श्वभूमीवर मुंबईच्या राजकारणात आघाड्यांबाबत मोठा संभ्रम निर्माण झाला आहे. ठाकरे बंधूंनी परस्परांतील मतभेद बाजूला ठेवत युतीवर शिक्कामोर्तब केला असला, तरी राष्ट्रवादी काँग्रेस (शरद पवार गट) अद्याप आपली स्पष्ट भूमिका मांडलेली नाही. त्यामुळे मुंबईतील महाविकास आघाडीच्या संभाव्य गणितांबाबत सध्या अनिश्चिततेचं वातावरण आहे.

सध्या समोर येत असलेल्या माहितीनुसार, ठाकरे बंधू आणि राष्ट्रवादी शरद पवार गट यांच्यातील युतीचा पेच नेमका कुठे अडकलाय, याची कारणमीमांसा स्पष्ट होत चालली आहे. राष्ट्रवादी काँग्रेसकडून एकीकडे शिवसेना ठाकरे गटाशी चर्चा सुरू असताना, दुसरीकडे काँग्रेसशीही संवाद कायम आहे. मात्र, काँग्रेसने मुंबई महापालिका निवडणुकीसाठी ठाकरे गटासोबत जाण्याऐवजी स्वतंत्र वाटचाल करण्याचा निर्णय घेतला असून, त्यांनी समाजवादी पक्ष आणि डाव्या आघाडीसोबत चर्चा सुरू केल्याची माहिती आहे.

याच पार्श्वभूमीवर राष्ट्रवादी शरद पवार गटाने काँग्रेसकडेही आपल्या जागावाटपाचा प्रस्ताव सादर केला आहे. त्यामुळे एकीकडे ठाकरे बंधूंची युती निश्चित झाली असली, तरी राष्ट्रवादी शरद पवार गट कोणासोबत जाणार, याबाबत अद्याप स्पष्टता आलेली नाही. यामुळेच मुंबईतील राजकीय समीकरणे अधिक गुंतागुंतीची होताना दिसत आहेत.

विक्रोळी–भांडूपमध्ये अडकलं गणित

मुंबई महापालिका निवडणुकीतील जागावाटपाचा मुख्य पेच विक्रोळी–भांडूप परिसरात अडकला असल्याची माहिती सूत्रांकडून मिळत आहे. ठाकरे बंधू आणि राष्ट्रवादी काँग्रेस (शरद पवार गट) यांच्यातील चर्चा या परिसरातील अवघ्या चार वॉर्डांभोवती फिरताना दिसत आहे. विशेषतः दोन वॉर्डांवरून निर्माण झालेला वाद हा युतीच्या मार्गातील मोठा अडथळा ठरत आहे.

सूत्रांच्या माहितीनुसार, वॉर्ड क्रमांक १११ हा धनंजय पिसाळ यांच्यासाठी आणि वॉर्ड क्रमांक ११९ हा मनिषा रहाटे यांच्यासाठी राष्ट्रवादी शरद पवार गटाला हवा आहे. हे दोन्ही नेते यापूर्वी या-या वॉर्डमधून महापालिकेचे नगरसेवक राहिले असून, त्यामुळे या जागांना राष्ट्रवादीने प्रतिष्ठेचा मुद्दा बनवले आहे. या वॉर्डांवरच आपला दावा कायम ठेवावा, अशी ठाम भूमिका शरद पवार गटाकडून मांडली जात आहे.

मात्र, ठाकरे बंधूंमध्ये सुरू असलेल्या अंतर्गत जागावाटपाच्या चर्चेत वॉर्ड क्रमांक ११९ हा महाराष्ट्र नवनिर्माण सेनेला देण्याचा निर्णय जवळपास निश्चित झाल्याचे सांगितले जात आहे. यामुळे राष्ट्रवादी शरद पवार गटात नाराजी पसरली असून, या निर्णयाचा पुनर्विचार व्हावा, अशी जोरदार मागणी करण्यात येत आहे. या एका निर्णयामुळे विक्रोळी–भांडूप परिसरातील युतीचे गणित अधिकच बिघडल्याचे दिसून येत आहे.

चार वॉर्डांवरून तिढा

इतकंच नाही, तर राष्ट्रवादी शरद पवार गटाने विक्रोळी–भांडूप परिसरातील आणखी दोन वॉर्डांवरही दावा केला आहे. वॉर्ड क्रमांक १२४ आणि १६८ हे दोन्ही वॉर्ड २०१७ च्या महापालिका निवडणुकीत राष्ट्रवादी काँग्रेसने जिंकले होते. जरी सध्या त्या वॉर्डांतील माजी नगरसेवक इतर पक्षात गेले असले, तरी त्या जागांवर आपला नैतिक हक्क असल्याचा दावा शरद पवार गट करत आहे.

या चार वॉर्डांभोवती फिरणारा वादच सध्या ठाकरे बंधू आणि राष्ट्रवादी शरद पवार गटातील युतीसाठी सर्वात मोठा अडथळा ठरत असल्याचं चित्र आहे. जर या मुद्द्यावर एकमत झालं, तर मुंबईतील आघाडीचं चित्र स्पष्ट होण्याची शक्यता आहे. अन्यथा, राष्ट्रवादी शरद पवार गट स्वतंत्र भूमिका घेणार की वेगळ्या आघाडीत सहभागी होणार, याकडे सगळ्यांचं लक्ष लागून राहिलं आहे.

आज होणाऱ्या महत्त्वाच्या बैठकीत या जागावाटपाच्या तिढ्यावर तोडगा निघतो का, यावरच मुंबई महापालिका निवडणुकीतील पुढील राजकीय दिशा ठरणार असल्याचं स्पष्ट होत आहे.

Image Courtesy:

02 Jan 2026

BMC Elections

Thackeray Alliance NCP Sharad Pawar:मुंबई महापालिकेत ट्विस्टच ट्विस्ट! ‘या’ चार जागांनी ठाकरे–शरद पवार आघाडीची गणितं बिघडवली

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates