शिंदे गटासाठी धक्कादायक बातमी! भायखळ्यातील 12 कोटींचा प्रकल्प बीएमसीने थांबवला, भाजपच्या दबावाची चर्चा

दरम्यान, यामिनी जाधव यांना मागील दोन निवडणुकांमध्ये सलग पराभव पत्करावा लागला होता. २०२४ मध्ये त्यांनी भायखळ्यातून विधानसभा लढवली होती परंतु पराभूत झाल्या. त्याआधी मुंबई दक्षिण लोकसभा मतदारसंघातूनही त्यांना अपयश आले होते. यामुळे जाधव जोडपे आगामी मुंबई महापालिका निवडणुकीत पुन्हा उभे राहण्याची शक्यता व्यक्त केली जात आहे. मात्र त्यांच्या मतदारसंघातील महत्वाचा प्रकल्प रद्द झाल्याने त्यांना मोठा धक्का बसला आहे. शिंदे गटाला देखील या निर्णयामुळे राजकीय अडचणींचा सामना करावा लागू शकतो.

 

डिसेंबर २०२३ मध्ये राज्य सरकारने या उर्दू केंद्राचे बांधकाम थांबवले होते, जरी त्यावेळी चाळीस टक्के काम पूर्ण झाले होते. आता महानगरपालिकेने हा प्रकल्प रद्द करून संपूर्ण जमीन पुन्हा राज्य सरकारकडे सोपवली आहे आणि आधीच उर्दू केंद्रावर झालेला आर्थिक खर्च सरकारकडून परत मागितला आहे. त्यानंतरच आयटीआयचे काम सुरू होईल असे स्पष्ट करण्यात आले आहे. महापालिकेतील एका वरिष्ठ अधिकाऱ्याने सांगितले की मूळ करार २०११ मध्ये झालेला होता आणि त्यानुसार हा भूखंड आयटीआय साठीच आरक्षित होता. पुढे काही कारणास्तव तो प्रकल्प राबवला गेला नाही आणि महाविकास आघाडी सरकारच्या काळात हा भूखंड परत घेऊन उर्दू केंद्रासाठी वापरला गेला. पण आता मुख्य सचिवांच्या अध्यक्षतेखाली झालेल्या बैठकीनंतर २०११ चा करार पुन्हा लागू करण्यात आला आहे.