स्थानिक निवडणुकीत धक्कादायक घटना! फेक मतदारांना मतदान केंद्रावरच अटक — कुणाच्या बाजूने मतदान आणलं? संपूर्ण राज्यात खळबळ!

by Webdesk
02 Dec 2025

Source: News 18 Marathi

बुलढाणा प्रतिनिधी राहुल खंडारे : राज्यात स्थानिक स्वराज्य संस्थेच्या निवडणुकीचा पहिला टप्पा आज सुरू झाला असून नगर परिषद आणि नगर पंचायतींसाठी मतदानाची प्रक्रिया गतीने सुरू आहे. सकाळपासून ईव्हीएम बिघाडाच्या तक्रारी, काही मतदान केंद्रांवर कार्यकर्त्यांमधील वादविवाद, आरोप–प्रत्यारोप आणि तणावपूर्ण वातावरण अशा विविध घटना घडत असताना आता आणखी एक धक्कादायक प्रकार समोर आल्याने जिल्ह्यात मोठी खळबळ उडाली आहे. मतदानदरम्यान बोगस मतदार पकडले गेल्याचे प्रकरण उजेडात आले आहे.

बुलढाणा शहरातील नगरपालिका निवडणुकीच्या मतदानादरम्यान बनावट मतदारांवर केलेल्या कारवाईने संपूर्ण राजकीय वातावरण ढवळून काढले आहे. ग्रामीण परिसरातून मोठ्या संख्येने खोटे मतदार शहरात आणल्याचे आरोप निवडणुकीपूर्वीच विरोधकांकडून केले जात होते. मात्र मतदानाच्या दिवशीच दोन बोगस मतदारांना प्रत्यक्ष रंगेहाथ पकडल्याने ही केवळ चर्चा नसून वास्तव असल्याचे स्पष्ट झाले आहे. ग्रामीण भागातून बनावट मतदारांना आणण्यासाठी वाहनांचा वापर झाल्याचे पुरावेही सोशल मीडियावर व्हायरल होत असून या प्रकरणावर मोठी चर्चा रंगली आहे.

ही घटना सकाळी प्रभाग क्रमांक १५ मधील गांधी प्राथमिक शाळा मतदान केंद्रावर उघडकीस आली. मतदारांची पडताळणी करताना कोथळी (ता. मोताळा) येथील एका व्यक्तीने वैभव देशमुख या नावावर मतदान करण्याचा प्रयत्न केला. त्याच्या ओळखपत्रातील तपशील संशयास्पद असल्याने कर्मचाऱ्यांनी चौकशी केली आणि अखेर तो बनावट मतदार असल्याचे उघड झाले. त्याच्यासोबत आणखी एक व्यक्तीही असल्याचे लक्षात आल्यानंतर दोघांनाही ताबडतोब पोलिसांच्या स्वाधीन करण्यात आले. ही कारवाई होताच मतदान केंद्राबाहेर तणाव वाढला आणि मोठी गर्दी झाली.

या प्रकारामुळे बुलढाणा नगरपालिका निवडणुकीत बोगस मतदान किती प्रमाणात घडत आहे आणि हे नेमके कोणत्या राजकीय पक्षाच्या इशाऱ्यावर होत आहे, याबाबत नवे प्रश्न निर्माण झाले आहेत. विरोधी पक्षांकडून ग्रामीण भागातून मोठ्या प्रमाणात मतदार शहरात आणल्याचे आरोप मतदानाआधीपासून होत होते. आता प्रत्यक्ष दोन बनावट मतदारांना अटक झाल्यानंतर या आरोपांना अधिक बळ मिळाले आहे. मात्र अटक करण्यात आलेले हे दोघे कोणत्या पक्षासाठी मतदान करण्यासाठी आणले गेले होते, हे अद्याप स्पष्ट झालेले नाही.

या घटनेनंतर निवडणूक आयोगाच्या व्यवस्थेवरही प्रश्नचिन्ह निर्माण झाले आहे. सुरक्षा तपासणी, मतदार यादी पडताळणी, मतदान केंद्रातील परिस्थिती नियंत्रणात ठेवण्याबाबत गंभीर त्रुटी असल्याचा आरोप विरोधकांनी केला आहे. बोगस मतदार सुरुवातीच्या वेळेतच पकडल्याने संपूर्ण निवडणूक प्रक्रियेची पारदर्शकता आणि विश्वासार्हता यावर प्रश्न उपस्थित होत आहेत.

घटनेची माहिती मिळताच पोलिसांनी तत्काळ कारवाई करत दोघांना ताब्यात घेतले असून पुढील तपास सुरू आहे. त्यांच्याकडून चौकशी दरम्यान मतदारांच्या याद्यांमध्ये फेरफार झाला का, मतदारांना फसवून मतदानासाठी आणले गेले का, यामागे कोणता राजकीय गट किंवा व्यक्ती सक्रिय आहे का, याचा तपास केला जात आहे. या धक्कादायक प्रकारामुळे बुलढाणा जिल्ह्यात निवडणुकीदरम्यान तणावाचे वातावरण निर्माण झाले असून मतदार, उमेदवार आणि कार्यकर्त्यांमध्ये संभ्रमाचे वातावरण आहे.

दरम्यान, या बोगस मतदान प्रकरणावर काँग्रेसने आक्रमक भूमिका घेतली आहे. कोथळी व इब्राहिमपूर परिसरातून आणखी काही लोकांना बनावट मतदानासाठी बुलढाण्यात आणण्यात आले असल्याचा दावा काँग्रेसने केला आहे. घाटा परिसरातून दोन गाड्यांमध्ये बोगस मतदार भरून शहरात आणले गेले असल्याचा गंभीर आरोप करण्यात आला असून ही बाब अत्यंत चिंताजनक असल्याचे काँग्रेसने म्हटले आहे. या प्रकाराची तातडीने चौकशी करून दोषींवर कठोर कारवाई करण्यात यावी, अशी मागणी काँग्रेसच्या वतीने पोलिस प्रशासनाकडे करण्यात आली आहे.

एका बाजूला निवडणूक प्रक्रिया सुरू असतानाच बोगस मतदार पकडल्या जाण्याची घटना घडल्याने बुलढाणा जिल्ह्यात राजकीय वातावरण तापले आहे. पुढील तपासात नेमके कोणाचा संबंध या प्रकरणाशी आहे, हे उघड झाल्यानंतर जिल्ह्यातील राजकारणात मोठे वादळ उठण्याची शक्यता वर्तवली जात आहे. सध्या संपूर्ण जिल्ह्याचे लक्ष पोलिस तपासावर आणि पुढील घडामोडींवर केंद्रित झाले आहे.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates