सलाम..! पोलिस आणि पालिका प्रशासनाने संयमाने हाताळलेलं मुंबईचं चित्र सर्वांसाठी आदर्श ठरलं!

मराठा आरक्षणाच्या मागणीसाठी सुरू झालेल्या आंदोलनामुळे मुंबई शहरात अभूतपूर्व गर्दी उसळली. आझाद मैदान आणि त्याच्या आसपास हजारोंच्या संख्येने लोक जमा झाले. कोणत्याही क्षणी परिस्थिती हाताबाहेर जाईल असे वाटत असतानाही मुंबई पोलिसांनी दाखवलेला संयम आणि महापालिकेने एका रात्रीत केलेली झपाट्याने स्वच्छता या दोन्ही बाबींचे मोठे कौतुक होत आहे. महापालिका आयुक्त भूषण गगराणी, पोलिस आयुक्त देवेन भारती आणि त्यांच्या टीमने सहा दिवस सलग काम करून संकटावर नियंत्रण ठेवले.

 

सुरुवातीला आंदोलनासाठी फक्त एका दिवसाची परवानगी होती, परंतु रोजच परवानगी वाढवत नेली गेली आणि अखेर पाच दिवस आझाद मैदानात गर्दी कायम राहिली. ग्रामीण भागातून आलेल्या हजारो लोकांना पावसामुळे योग्य सोय नव्हती, दुकाने बंद असल्याने अडचणी वाढल्या. प्रशासनाने फक्त पाच हजार लोकांना परवानगी दिली होती, पण वास्तव वेगळंच होतं. तब्बल अकरा हजारांपेक्षा अधिक गाड्या शहरात दाखल झाल्या. त्यातील १२०० गाड्या नवी मुंबईत थांबवण्यात आल्या, तर दक्षिण मुंबईत पाच हजारांपेक्षा जास्त गाड्या पोहोचल्या. महापालिकेने १० ते १५ हजार लोकांचा अंदाज वर्तवला होता, पण अवघ्या दोन दिवसांत ४० ते ५० हजारांचा जनसमुदाय मुंबईत दाखल झाला. एवढ्या मोठ्या गर्दीसाठी पिण्याचे पाणी, टॉयलेट, आंघोळीची सोय आणि अन्नपुरवठा यांची जबाबदारी पालिकेसमोर मोठे आव्हान बनली. त्यातच रोज निर्माण होणाऱ्या कचर्‍याची व्यवस्थापन हाही वेगळा डोकेदुखीचा मुद्दा होता.