Raj Thackeray : विरोधकांचा एकत्रित वार! मंत्रालयात घडली गुप्त हालचाल, उद्या निवडणूक आयुक्तांसोबत निर्णायक बैठक!

by Webdesk
14 Oct 2025

मुंबई : महाराष्ट्रातील स्थानिक स्वराज्य संस्थांच्या आणि महापालिकांच्या निवडणुका जसजशा जवळ येत आहेत, तसतसे राज्यातील राजकीय वातावरण तापू लागले आहे. मतदारयादीतील त्रुटी, प्रभाग रचनेतील गोंधळ आणि निवडणूक प्रक्रियेमध्ये पारदर्शकतेचा अभाव या मुद्द्यांवरून आता विरोधक एकत्र आले आहेत. या पार्श्वभूमीवर महाविकास आघाडीचे (मविआ) शिष्टमंडळ आज मंत्रालयात दाखल झाले आणि त्यांनी मुख्य निवडणूक अधिकारी एस. चोक्कलिंगम यांची भेट घेऊन तक्रारी मांडल्या.

या शिष्टमंडळात शरद पवार, उद्धव ठाकरे, राज ठाकरे, जयंत पाटील, अजित नवले, बाळासाहेब थोरात, जितेंद्र आव्हाड, अनिल देसाई यांसारखे सर्व महत्त्वाचे विरोधी नेते सहभागी होते. एकाच मंचावर ठाकरे बंधू — उद्धव ठाकरे आणि राज ठाकरे — यांची उपस्थिती विशेष लक्षवेधी ठरली. दोघेही एकत्र मंत्रालयात दाखल झाले, आणि त्याच कारमधून प्रवास केल्याचे दृश्य राजकीय वर्तुळात मोठ्या चर्चेचा विषय बनले.

बैठकीदरम्यान ठाकरे बंधूंचा आक्रमक सूर ठळकपणे दिसून आला. त्यांनी थेट आयोगाला प्रश्नांच्या फैऱ्या झाडत निवडणूक व्यवस्थेवर गंभीर शंका उपस्थित केल्या. उद्धव ठाकरे यांनी निवडणूक प्रक्रियेमध्ये पारदर्शकता आणि मतदारांचा विश्वास अबाधित ठेवण्यावर भर दिला, तर राज ठाकरे यांनी मतदारयादीतील गोंधळावर जोरदार निशाणा साधला.

राज ठाकरेंनी म्हणाले, “राज्यातील मतदारयादीमध्ये एवढा प्रचंड गोंधळ का आहे? एकाच मतदाराचे नाव दोन वेगवेगळ्या ठिकाणी दिसते आहे. काही ठिकाणी वडिलांचं वय मुलापेक्षा कमी दाखवलं गेलंय. हे नक्की काय सुरू आहे?” त्यांनी पुढे विचारलं, “आता निवडणुकीचा कार्यक्रम जाहीरही झालेला नाही, मग मतदान नोंदणी का थांबवली? जे नागरिक आज १८ वर्षांचे होत आहेत, त्यांना मतदानाचा अधिकार नाही का?”

या प्रश्नांनी बैठक क्षणातच तापली. मुख्य निवडणूक अधिकारी चोक्कलिंगम यांनी प्रत्येक मुद्द्यावर स्पष्टीकरण देण्याचा प्रयत्न केला, पण राज ठाकरेंच्या तीक्ष्ण प्रश्नांनी संपूर्ण बैठकीचं केंद्रस्थान घेतलं.

त्याचबरोबर, व्हीव्हीपॅट (VVPAT) मशीन न वापरण्याच्या आयोगाच्या निर्णयावरून विरोधी पक्ष आक्रमक झाले. स्थानिक स्वराज्य संस्थांच्या निवडणुकांमध्ये मतमोजणीची पारदर्शकता राखण्यासाठी व्हीव्हीपॅट अत्यावश्यक असल्याचे सर्वांनी सांगितले. राज ठाकरे म्हणाले, “मतदाराने मतदान केल्यावर त्याचं मत कोणाला गेलं हे त्याला समजायला हवं. हा लोकशाहीचा मूलभूत हक्क आहे.” उद्धव ठाकरे यांनीही याला समर्थन देत म्हटलं, “मतदारांचा विश्वास टिकवायचा असेल तर पारदर्शक मतदान प्रणाली हवी. नाहीतर शंका निर्माण होतील.”

राज ठाकरे यांनी स्पष्ट मागणी केली की, “देशात सध्या कुठेच मोठ्या निवडणुका नाहीत. मग व्हीव्हीपॅट मशीन महाराष्ट्रासाठी उपलब्ध करून देता येणार नाहीत का? जर हे शक्य नसेल, तर मग निवडणुका जुन्या पद्धतीने म्हणजेच बॅलेट पेपरवरून घ्याव्यात.” त्यांनी राज्य निवडणूक आयोगाच्या प्रमुखांना स्वतः उपस्थित राहून या विषयावर सविस्तर चर्चा करण्याची मागणी केली.

राज ठाकरेंच्या या मागणीला मुख्य निवडणूक अधिकारी एस. चोक्कलिंगम यांनी सकारात्मक प्रतिसाद देत पुढील बैठकीचे वेळापत्रक जाहीर केले. त्यांनी सांगितले की उद्या सकाळी ११ वाजता निवडणूक आयुक्त आणि मविआ नेत्यांची बैठक पार पडेल. या बैठकीत मतदारयादीतील त्रुटी, दुप्पट नोंदी, व्हीव्हीपॅट प्रणाली आणि प्रभाग रचनेवरील आक्षेप या सर्व विषयांवर सविस्तर चर्चा होणार आहे.

बैठकीत राष्ट्रवादी शरद पवार गटाचे जितेंद्र आव्हाड देखील आक्रमक भूमिकेत दिसले. त्यांनी थेट आयोगावरच प्रश्नचिन्ह उपस्थित करत म्हटलं, “आम्ही नोव्हेंबर १८ रोजी आयोगाला खोट्या मतदार नोंदीबद्दल पत्र दिलं होतं, पण काहीच कारवाई झाली नाही. आता एक आमदार उघडपणे सांगतो की आम्ही बाहेरून मतदार आणले. आणखी काय पुरावा हवा आयोगाला?”

राष्ट्रवादी शरद पवार गटाचे नेते जयंत पाटील यांनीही गंभीर आरोप केले. त्यांनी म्हटलं, “आम्ही दिल्ली आणि महाराष्ट्र दोन्हीकडे आयोगाला पत्र पाठवलं, पण त्यांनी सांगितलं की पत्र आलंच नाही. आमच्याकडे पुरावे आहेत. अनेक घरं अशी आहेत जी अस्तित्वातच नाहीत, पण त्या पत्त्यावर मतदार दाखवले गेले आहेत.” त्यांनी आयोगाला सुचवलं की, “मतदारयादीतील दुबार नावे शोधण्यासाठी आधुनिक सॉफ्टवेअर वापरा आणि ती तातडीने वगळा.”

बैठकीत सहभागी असलेल्या सर्व नेत्यांनी एकमुखाने सांगितले की, निवडणूक प्रक्रियेतील पारदर्शकतेचा अभाव हा लोकशाहीसाठी धोकादायक आहे. “हा मुद्दा फक्त राजकीय पक्षांचा नाही, हा प्रत्येक सामान्य नागरिकाचा प्रश्न आहे,” असं शरद पवार यांनी नमूद केलं.

या शिष्टमंडळात प्रमुख नेत्यांव्यतिरिक्त अनेक पक्षांचे वरिष्ठ कार्यकर्तेही उपस्थित होते — शरद पवार, उद्धव ठाकरे, राज ठाकरे, जयंत पाटील, बाळासाहेब थोरात, अजित नवले, अनिल देसाई, अनिल परब, जितेंद्र आव्हाड, शशिकांत शिंदे, कॉ. प्रकाश रेड्डी, रईस शेख आदी.

या घडामोडींमुळे महाराष्ट्रातील आगामी निवडणुकांपूर्वी विरोधक एकाच छताखाली एकत्र येत असल्याचे चित्र स्पष्ट झाले आहे. उद्याची बैठक केवळ निवडणूक आयोगासाठीच नव्हे, तर राज्यातील राजकीय समीकरणांसाठीही निर्णायक ठरण्याची शक्यता आहे. ठाकरे बंधू, पवार, काँग्रेस आणि इतर पक्ष नेत्यांचा एकत्र आवाज हा सरकारसाठीही एक स्पष्ट संदेश आहे — “निवडणुका पारदर्शक झाल्याच पाहिजेत, अन्यथा रस्त्यावर उतरू.”

Image Courtesy:

02 Jan 2026

BMC Elections

Raj Thackeray : विरोधकांचा एकत्रित वार! मंत्रालयात घडली गुप्त हालचाल, उद्या निवडणूक आयुक्तांसोबत निर्णायक बैठक!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates