Rahul Gandhi On Rajura : 6850 नवे मतदार जोडले, पण निकालात नेमका कोण वरचढ? राहुल गांधींचा सवाल

by Webdesk
18 Sep 2025

नवी दिल्ली : विरोधी पक्षनेते राहुल गांधी यांनी आज आयोजित पत्रकार परिषदेत निवडणूक आयोगावर थेट निशाणा साधत मत चोरीचा गंभीर आरोप केला. या पत्रकार परिषदेत त्यांनी कर्नाटकमधील आळंद मतदारसंघातील मतदारांची नावे कशाप्रकारे हटवली गेली, याबाबतचे तपशील समोर ठेवले. याचवेळी त्यांनी महाराष्ट्रातील राजुरा मतदारसंघाचा मुद्दा उपस्थित करत आणखी एक धक्कादायक दावा केला.

राहुल गांधी म्हणाले की, कर्नाटकमधील आळंद या मतदारसंघात ६,०१८ मतदारांची नावे वगळली गेली. सर्वात गंभीर बाब म्हणजे या मतदारांना स्वतःलाच याबद्दल कल्पना नव्हती. विशेषतः दलित आणि अल्पसंख्याक मतदारांचे नावे मुद्दामहून काढण्यात आली असल्याचा ठोस आरोप त्यांनी केला. राहुल गांधींच्या म्हणण्यानुसार, मतदारांची नावे काढण्यासाठी कर्नाटकबाहेरील मोबाईल क्रमांकांचा वापर झाला, अर्ज कुणी भरले, ओटीपी कुणाला मिळाले, यावर प्रश्नचिन्ह उपस्थित होते.

त्यांनी सांगितले की, ज्या मतदान केंद्रांवर काँग्रेसला मोठ्या प्रमाणात मते मिळण्याची शक्यता होती, तिथेच मतदारांची नावे वगळली गेली. ही केवळ कर्नाटकापुरती बाब नसून देशभरात अशी प्रक्रिया राबवली जात आहे. उत्तर प्रदेश, हरियाणा आणि महाराष्ट्रातही मतदारांची नावे वगळण्याचे प्रकार घडले असल्याचा ठोस दावा राहुल गांधींनी केला.

याच संदर्भात त्यांनी महाराष्ट्रातील राजुरा मतदारसंघ हायलाइट केला. राहुल गांधींनी म्हटलं की, राजुरामध्ये तब्बल ६,८५० नवे मतदार घुसवण्यात आले, ज्यामुळे निवडणुकीच्या निकालावर गंभीर परिणाम झाला.

राजुरामध्ये 6850 बोगस मतदारांचा आरोप, भाजपचं मताधिक्य किती?

चंद्रपूर जिल्ह्यातील राजुरा हा विधानसभा मतदारसंघ यापूर्वीपासूनच तगड्या चुरशीच्या लढतीसाठी ओळखला जातो. राहुल गांधींनी केलेल्या आरोपांनंतर या मतदारसंघातील निकालाचे महत्त्व आणखी वाढले आहे.

२०१९ च्या विधानसभा निवडणुकीत काँग्रेसचे सुभाष धोटे विजयी झाले होते. त्यांना ६० हजार २२८ मते मिळाली होती. तर वामनराव चटप यांना ५७ हजार ७२७ मते आणि भाजपचे संजय धोटे यांना ५१ हजार ०५१ मते मिळाली. यावेळी काँग्रेसला केवळ २,५०९ मतांच्या फरकाने विजय मिळाला होता.

मात्र २०२४ मध्ये चित्र बदललं. यावेळी भाजपचे देवराव भोंगळे यांनी विजय मिळवला. त्यांनी ७२ हजार ८८२ मते मिळवत आघाडी घेतली. काँग्रेसचे उमेदवार सुभाष धोटे यांना ६९ हजार ८२८ मते मिळाली, तर स्वतंत्र भारत पक्षाचे वामनराव चटप ५५ हजार ०९० मतांसह तिसऱ्या स्थानी राहिले. भाजपला येथे अवघ्या ३,०५४ मतांच्या फरकाने विजय मिळाला.

राजुरामधील या टोकाच्या लढतीत भाजपने थोडक्यात आघाडी घेतली असली, तरी राहुल गांधींनी केलेल्या बोगस मतदारांच्या आरोपांमुळे राजकारण पुन्हा तापण्याची शक्यता आहे. एवढ्या अल्प मताधिक्याने निकाल लागलेल्या मतदारसंघात जर खरोखरच ६,८५० बोगस नावे असल्याचे सिद्ध झाले, तर संपूर्ण निवडणुकीवर प्रश्नचिन्ह उभे राहू शकते.

राहुल गांधींनी आपल्या पत्रकार परिषदेत यापूर्वी बोगस मतदार कसे जोडले जातात याबाबत खुलासा केला होता. यावेळी त्यांनी थेट मतदारांची नावे काढून टाकण्याचा प्रकार उघड केला. हे दोन वेगवेगळे प्रकार एकत्र पाहिले तर, निवडणुकीच्या प्रक्रियेवर मोठा प्रश्नचिन्ह उभा राहतो, असे त्यांनी नमूद केले.

त्यांच्या मते, काँग्रेस आणि इतर विरोधी पक्षांच्या मतदारांना टार्गेट करून मतदारयादीतील फेरबदल केला जात आहे. हा प्रकार लोकशाहीसाठी धोकादायक असल्याचे त्यांनी सांगितले.

राजुरामध्ये अतिशय कमी मतांच्या फरकाने निकाल लागला असल्यामुळे राहुल गांधींचा आरोप कितपत गंभीर आहे, याकडे सर्वांचे लक्ष लागले आहे. भाजपने जरी विजय मिळवला असला, तरी आता राजकीय वातावरणात नव्या आरोप-प्रत्यारोपांची ठिणगी पडली आहे.

Image Courtesy:

02 Jan 2026

BMC Elections

Rahul Gandhi On Rajura : 6850 नवे मतदार जोडले, पण निकालात नेमका कोण वरचढ? राहुल गांधींचा सवाल

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates