मुंबई महापालिका निवडणुकीचं समीकरण बदलणार? शिंदेंकडून अमित शाहांकडे जागावाटपाबाबत मोठी मागणी – आकडा नेमका किती?

Source: TV 9 Marathi

मुंबई महापालिका निवडणूक: पुढील काही महिन्यांमध्ये महाराष्ट्रात महापालिका व स्थानिक स्वराज्य संस्थांच्या निवडणुकांची रणधुमाळी रंगणार आहे. या पार्श्वभूमीवर केंद्रीय गृहमंत्री आणि भाजपचे वरिष्ठ नेते अमित शाह हे महाराष्ट्राच्या दौऱ्यावर आले होते. त्यांच्या या तीन दिवसांच्या दौर्‍यात नागपूर आणि मुंबई येथे विविध कार्यक्रमांमध्ये त्यांनी सहभाग घेतला आणि त्याचबरोबर आगामी निवडणुकांची स्थितीही समजून घेतली. या दौऱ्यात मुंबईतील सह्याद्री अतिथीगृहात उपमुख्यमंत्री एकनाथ शिंदे यांनी अमित शाह यांची महत्त्वपूर्ण भेट घेतली. या बैठकीदरम्यान, विशेषतः मुंबई महापालिका निवडणुकीबाबत विस्तृत चर्चा झाल्याचे सूत्रांनी सांगितले. या चर्चेवेळी एकनाथ शिंदे यांनी अमित शाह यांच्याकडे मुंबई महापालिकेतील 107 जागांची मागणी केल्याची माहिती समोर आली आहे.

अमित शाह यांच्या या दौऱ्याचा उद्देश केवळ विकास प्रकल्पांचं उद्घाटन नसून, महाराष्ट्रातील राजकीय घडामोडींचा सखोल आढावा घेणे हाही होता. पुढील महत्त्वाच्या निवडणुकांमध्ये भाजपने स्वबळावर लढायचं की युतीतून – यावर त्यांनी स्पष्ट संकेत दिले. विशेषतः मुंबई, ठाणे आणि पुणे या तीन प्रमुख महानगरपालिकांबाबत स्थानिक नेतृत्वाला वेगळी चाचपणी करण्याचे निर्देश अमित शाह यांनी दिले.