मुंबई : ठाकरे गटाला मोठा धक्का! पेडणेकर-दुधवडकरांसह आठ उमेदवारांची जागा धोक्यात; प्रभाग आरक्षणाचा परिणाम

by Webdesk
09 Oct 2025

मुंबई : मुंबई महापालिकेच्या २०२६ मधील निवडणुकीची रंगत वाढत असताना, प्रभाग आरक्षणाचे प्राथमिक स्वरूप स्पष्ट झाले आहे. यामुळे उमेदवारीसाठी सज्ज असलेल्या अनेक माजी नगरसेवकांमध्ये मोठी धाकधूक निर्माण झाली आहे. महापालिकेतील २२७ प्रभागांपैकी १५ प्रभाग अनुसूचित जाती (SC) आणि २ प्रभाग अनुसूचित जमाती (ST) साठी आरक्षित ठरले आहेत. परिणामी, आठ माजी नगरसेवकांची उमेदवारी धोक्यात आली असून, त्यांच्या राजकीय भवितव्याबाबत चर्चांना उधाण आले आहे.

२०१७ च्या निवडणुकीत या संभाव्य आरक्षणाच्या प्रभागांत तेव्हा एकसंध शिवसेनेचे पाच, तर काँग्रेस, मनसे आणि भाजपचे प्रत्येकी एक नगरसेवक निवडून आले होते. मात्र आता या प्रभागांवर आरक्षण लागू झाल्याने, या माजी नगरसेवकांचे राजकीय समीकरण बदलण्याची शक्यता निर्माण झाली आहे. त्यांच्या पुनर्वसनाची शक्यता कोणत्या अन्य वॉर्डांत आहे, हे अद्याप स्पष्ट नाही. आरक्षणाची अधिकृत घोषणा झाल्यानंतरच पक्षीय स्तरावर उमेदवार निश्चिती सुरू होईल, असे सूत्रांनी सांगितले.

शिवसेनेच्या फुटीचा परिणाम

शिवसेनेतील फूट हा घटक या समीकरणात महत्त्वाचा ठरला आहे.

प्रभाग क्रमांक १३३ मधील परमेश्वर कदम आणि प्रभाग क्रमांक ५९ मधील प्रतिमा खोपडे यांनी शिंदेसेनेत प्रवेश केला आहे.

तर काँग्रेसचे विठ्ठल लोकरे (प्रभाग क्र. १४१) यांनी उद्धव ठाकरे गटाचा झेंडा हाती घेतला आहे.

मनसेच्या हर्षला मोरे (प्रभाग क्र. १८९) यांनीही महापालिकेचा कार्यकाळ संपण्यापूर्वीच उद्धवसेनेत प्रवेश केला होता.

दरम्यान, माजी महापौर किशोरी पेडणेकर (प्रभाग क्र. १९९) उद्धवसेनेत सक्रिय आहेत. त्यांच्या बरोबरच शिंदेसेनेचे उपेंद्र सावंत (प्रभाग क्र. ११८) आणि भाजपचे राजेश फुलवारिया (प्रभाग क्र. १५१) हेही प्रभाग पूर्वी खुले होते; मात्र आता ते अनुसूचित जातींसाठी राखीव करण्यात आले आहेत. त्यामुळे या नेत्यांची उमेदवारी धोक्यात आली आहे.

उमेदवारांसमोरचा पेच

उद्धवसेनेच्या अरुंधती दुधवडकर (प्रभाग क्र. २१५) आणि हर्षला मोरे या दोघींचे प्रभाग २०१७ मध्ये महिलांसाठी राखीव होते. आता हे दोन्ही प्रभाग अनुसूचित जातींसाठी आरक्षित झाल्याने त्यांना उमेदवारीचा मोठा पेच निर्माण झाला आहे.

तसेच, शिंदेसेनेच्या प्रतिमा खोपडे यांचा प्रभाग पूर्वी अनुसूचित जातींसाठी होता; आता तो अनुसूचित जमातींसाठी राखीव झाला आहे. त्यामुळे त्यांचीही निवडणूक लढवण्याची शक्यता धूसर झाली आहे.

आरक्षणाचे गणित स्पष्ट

२०११ च्या जनगणनेच्या आकडेवारीनुसारच या निवडणुका होणार आहेत. एकूण २२७ प्रभागांपैकी १७ प्रभाग SC-ST साठी, तर उर्वरित २१० प्रभागांपैकी ६१ प्रभाग ओबीसींसाठी आणि १४९ प्रभाग खुल्या प्रवर्गासाठी असतील. यापैकी ५० टक्के प्रभाग महिलांसाठी राखीव ठेवले जाणार आहेत. त्यामुळे पक्षनिहाय उमेदवार निश्चिती करताना मोठे फेरबदल होण्याची शक्यता वर्तवली जात आहे.

या माजी नगरसेवकांचे प्रभाग कायम

आरक्षणाच्या फेरफारांनंतर काही माजी नगरसेवकांचे प्रभाग मात्र कायम राहिले आहेत. त्यात खालील नगरसेवकांचा समावेश आहे –

नादिया शेख, राष्ट्रवादी काँग्रेस (प्रभाग क्र. १४०)

समृद्धी काते, शिंदेसेना (प्रभाग क्र. १४६)

अंजली नाईक, उद्धवसेना (प्रभाग क्र. १४७)

आशा मराठे, भाजप (प्रभाग क्र. १५२)

श्रीकांत शेट्टे, उद्धवसेना (प्रभाग क्र. १५५)

गंगा माने, काँग्रेस (प्रभाग क्र. १८३)

वसंत नकाशे, उद्धवसेना (प्रभाग क्र. १८६)

रोहिणी कांबळे, उद्धवसेना (प्रभाग क्र. ९३)

रेखा रामवंशी, उद्धवसेना (प्रभाग क्र. ५३)

नेत्यांची प्रतिक्रिया

माजी महापौर किशोरी पेडणेकर म्हणाल्या,

“माझ्या मतदारसंघात गेल्या पाच वर्षांत इतकी विकासकामे केली आहेत की, या भागातून आमच्याच पक्षाचा कोणताही उमेदवार सहज निवडून येईल. माझा प्रभाग आरक्षित झाल्यामुळे अंतिम निर्णय पक्षश्रेष्ठी घेतील.”

तर शिंदेसेनेचे परमेश्वर कदम म्हणाले,

“प्रभाग आरक्षित झाल्यामुळे उमेदवारीचा प्रश्नच येत नाही. मी दुसऱ्या वॉर्डातून निवडणूक लढवण्याचा विचार नाही. नगरसेवक म्हणून मी अनेक लोकोपयोगी कामे केली आहेत, त्यामुळे उमेदवारीवर प्रश्नचिन्ह लागले तरी काही हरकत नाही.”

Image Courtesy:

02 Jan 2026

BMC Elections

मुंबई : ठाकरे गटाला मोठा धक्का! पेडणेकर-दुधवडकरांसह आठ उमेदवारांची जागा धोक्यात; प्रभाग आरक्षणाचा परिणाम

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates