Maharashtra Civic Polls : महापालिका रणांगणात आगोदरच गडबड, प्रभाग रचनेवरून महायुतीत आतल्या आत कुरघोडी?

by Webdesk
25 Aug 2025

महापालिका निवडणुकीपूर्वी प्रभाग रचनेवरून महायुतीत अंतर्गत संघर्ष?

मुंबई : राज्यातील महापालिका निवडणुकांची रंगत वाढू लागली आहे. मुंबईसह पुणे, ठाणे, नवी मुंबई आणि पिंपरी-चिंचवड या राजकीय दृष्ट्या अत्यंत महत्त्वाच्या समजल्या जाणाऱ्या महापालिकांसाठी अखेर प्रभाग रचनेची घोषणा करण्यात आली. मात्र या घोषणेनंतर नव्या प्रभाग रचनेत सत्ताधाऱ्यांना लाभ होईल असा डाव साधण्यात आल्याचे आरोप विरोधकांकडून होऊ लागले आहेत. केवळ एवढेच नव्हे तर या रचनेवरून महायुतीच्या गोटातही नाराजीचा सूर उमटू लागल्याने अंतर्गत वाद वाढण्याची शक्यता निर्माण झाली आहे.

नगरविकास विभागाची जबाबदारी सांभाळणारे उपमुख्यमंत्री एकनाथ शिंदे यांनी आपला प्रभाव वापरून बहुसदस्य प्रभाग रचना शिवसेनेच्या गटाला अनुकूल होईल अशी आखणी केली असल्याचे बोलले जात आहे. त्यामुळे महायुतीत अस्वस्थता निर्माण झाली असून पुढे हे प्रकरण किती बिघडते, याकडे राजकीय निरीक्षकांचे लक्ष लागले आहे.

मुंबईतील चित्र

मुंबईत मात्र फारसे बदल झालेले नाहीत. इथं पूर्वीप्रमाणेच 227 प्रभाग कायम ठेवण्यात आले आहेत. केवळ कोस्टल रोड, मेट्रो यांसारख्या विकासकामांमुळे काही निवडक प्रभागांमध्ये छोटे-मोठे बदल करण्यात आले आहेत. महाविकास आघाडीच्या काळात प्रभागांची संख्या वाढवून 236 करण्यात आली होती. पण सत्ता बदलल्यानंतर महायुतीने जुनी रचना पुन्हा लागू केली. या निर्णयावरूनही राजकीय चर्चा रंगल्या आहेत.

ठाणे आणि नवी मुंबईतील कलगीतुरा

ठाण्यातील आगामी निवडणुकीत एकनाथ शिंदे यांची ताकद रोखण्यासाठी भाजपने स्थानिक नेते गणेश नाईक यांच्यावर मोठी जबाबदारी सोपवली आहे. परंतु नवी मुंबईतच नाईकांची अडचण वाढल्याचे म्हटले जात आहे. शिंदे समर्थकांनी शिवसेनेला अनुकूल अशी रचना आखली असल्याचा थेट आरोप स्वतः वनमंत्री गणेश नाईक यांनी केला आहे. यावर त्यांनी मुख्यमंत्री देवेंद्र फडणवीस यांची भेट घेऊन नाराजी व्यक्त करण्याचा निर्णय घेतला आहे.

पुण्यातील परिस्थिती

पुण्यात अजित पवार गटाने स्पष्टपणे नाराजी दर्शवली आहे. शिंदे गट आणि भाजप – या दोघांवरही त्यांनी टीका केली असून, प्रभाग रचना भाजपच्या फायद्याची असल्याचा आरोप त्यांनी केला आहे. अनेक प्रभावी नेत्यांचे प्रभाग मुद्दाम फोडण्यात आले असल्याची चर्चा आहे. त्यामुळे स्थानिक राजकारणात प्रचंड अस्वस्थता निर्माण झाली आहे.

पिंपरी-चिंचवडमधील लढत

पिंपरी-चिंचवडमध्ये मात्र सरळसरळ भाजप आणि अजित पवार गट आमनेसामने येतील, असा अंदाज वर्तवला जात आहे. ही महापालिका अजित पवार यांच्यासाठी प्रतिष्ठेची मानली जाते. पण निधी वाटपासारख्या मुद्द्यांवरून शिवसेनेच्या मंत्र्यांना लक्ष्य करणाऱ्या अजित पवारांच्या अडचणी शिंदे आणखी वाढवतील, अशीही शक्यता राजकीय वर्तुळात व्यक्त होत आहे. त्यामुळे स्थानिक निवडणुकीचे समीकरण अजूनच गुंतागुंतीचे होण्याची शक्यता आहे.

महायुतीसमोरील आव्हान

सत्ता एकवटूनही महायुतीच्या अंतर्गतच निर्माण झालेली धुसफूस आता मुख्यमंत्री देवेंद्र फडणवीस यांच्यासमोर मोठे आव्हान म्हणून उभी ठाकली आहे. प्रभाग रचनेवरून सुरू झालेला हा वाद केवळ निवडणुकीपुरताच मर्यादित राहतो की पुढे गोटांतील संबंधांवर दीर्घकालीन परिणाम करतो, हे पाहणे महत्त्वाचे ठरणार आहे.

राज्याच्या प्रमुख शहरांमध्ये एकीकडे सत्ताधाऱ्यांना अनुकूल अशी रचना आखल्याचे आरोप होत आहेत, तर दुसरीकडे महायुतीच्या घटकांमध्येच मतभेद वाढत चालल्याचे चित्र आहे. त्यामुळे या निवडणुका केवळ विरोधकांशी सामना करण्यापुरत्याच नसून, महायुतीच्या घटक दलांमध्ये तणाव कसा हाताळला जातो यावरही सर्वांचे लक्ष लागले आहे. आगामी दिवसांत या वादाचा नेमका काय परिणाम होतो आणि महापालिका रणांगणावर याचे काय पडसाद उमटतात, हे पाहणे उत्सुकतेचे ठरेल.

Image Courtesy:

02 Jan 2026

BMC Elections

Maharashtra Civic Polls : महापालिका रणांगणात आगोदरच गडबड, प्रभाग रचनेवरून महायुतीत आतल्या आत कुरघोडी?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates