स्थानिक स्वराज्य निवडणुका : अनुसूचित जातींना अधिक प्रतिनिधित्व मिळावे, सिध्दार्थ हत्तीअंबिरे यांची जोरदार मागणी

बैठकीदरम्यान बोलताना हत्तीअंबिरे यांनी सांगितले की, “गेल्या तीन वर्षांपासून काँग्रेसच्या अनुसूचित विभागाने स्थानिक स्वराज्य संस्थांच्या निवडणुकांसाठी सातत्याने तयारी सुरू ठेवली आहे. या काळात अनेक कार्यकर्त्यांनी आपल्या क्षेत्रात सक्रिय काम करत पक्षाशी निष्ठा जपली आहे. अनुसूचित जाती प्रवर्गातील अनेकजण या निवडणुकीत उमेदवारीसाठी इच्छुक आहेत. त्यामुळे पक्षाने या कार्यकर्त्यांच्या प्रयत्नांना न्याय द्यावा आणि विभागाने शिफारस केलेल्या उमेदवारांना प्राधान्य द्यावे,” अशी मागणी त्यांनी केली.

 

हत्तीअंबिरे पुढे म्हणाले की, “राज्यातील प्रत्येक जिल्ह्यात किमान एक नगरपरिषदेचे अध्यक्षपद अनुसूचित जाती प्रवर्गासाठी राखीव असते. या पदांसाठी अनेक सक्षम आणि पात्र कार्यकर्त्यांच्या मुलाखती घेऊन त्यांची यादी तयार करण्यात आली आहे. ही यादी विभागाने पक्ष नेतृत्वाकडे सादर केली असून, या नावांना प्रत्यक्ष उमेदवारी देऊन पक्षाने या कार्यकर्त्यांना संधी द्यावी, ही आमची भूमिका आहे.”