स्थानिक स्वराज्य निवडणुका : रात्रभर जागरण! दिग्गज नेत्यांची वाढली धाकधूक, मुंबई-ठाण्याच्या महापालिकांच्या आरक्षण सोडतीकडे सर्वांचे लक्ष

मुंबई : राज्यात स्थानिक स्वराज्य संस्थांच्या निवडणुकांची चाहूल लागली असून राजकीय वातावरण तापू लागले आहे. आज राज्यातील अनेक प्रमुख महापालिकांच्या प्रभाग आरक्षणाची सोडत निघणार आहे. आपल्या प्रभागाचे आरक्षण कायम राहावे, आपली राजकीय जमीन टिकून राहावी यासाठी अनेक अनुभवी आणि नवोदित नेत्यांनी देवाचा धावा केला आहे. या आरक्षण सोडतीकडे सर्वांचे लक्ष लागले असून अनेक दिग्गज नेत्यांचे राजकीय भवितव्य या निकालावर अवलंबून आहे. मुंबई, ठाणे, कल्याण-डोंबिवली, नवी मुंबई, पिंपरी-चिंचवड, नागपूर आणि सोलापूरसह राज्यातील अनेक महत्त्वाच्या महानगरपालिकांसाठी ही सोडत आज काढली जाणार आहे.