नेते म्हणतात सर्व काही ठीक, पण युतीचा तिढा सुटेना! पाच महापालिकांत चर्चा सुरू, उमेदवार प्रतीक्षेत

by Webdesk
25 Dec 2025

मुंबई : राज्यात सत्तेत असलेल्या भाजप, शिवसेना (शिंदे गट) आणि राष्ट्रवादी काँग्रेस या पक्षांचा महापालिका निवडणुका युतीत लढवण्याचा प्रयत्न सुरू आहे. मात्र प्रत्यक्षात अनेक शहरांमध्ये युतीबाबतचा पेच अद्याप सुटलेला दिसत नाही. पिंपरी-चिंचवड आणि पुणे महापालिकेत राष्ट्रवादीसोबत युती होणार नसल्याचे मुख्यमंत्री देवेंद्र फडणवीस यांनी स्पष्ट केले आहे. त्यानंतर इतर महापालिकांमध्ये तरी युतीची घोषणा होईल, अशी अपेक्षा होती. मात्र अर्जविक्री सुरू होऊनही बहुतांश शहरांत जागावाटपाचा फॉर्म्युला ठरलेला नाही. परिणामी इच्छुक उमेदवार संभ्रमात असून राजकीय गोटात अस्वस्थता वाढली आहे. “महायुतीचं भलं होतंय, पण युतीचं घोडं अडकलं कुठे?” असा सवाल आता कार्यकर्त्यांकडून केला जात आहे.

मुंबई महापालिका

मुंबई महानगरपालिकेच्या निवडणुकीसाठी भाजप आणि शिवसेना (शिंदे गट) यांच्यात सातत्याने चर्चा सुरू आहेत. आतापर्यंत जागावाटपाच्या मुद्द्यावर तीन फेऱ्यांच्या बैठका झाल्या असल्या, तरी अद्याप ठोस फॉर्म्युल्यावर एकमत झालेले नाही. शिंदे गटाने मुंबईत किमान ८५ जागांची मागणी भाजपकडे केली आहे. मात्र भाजपकडून या संख्येत कपात होऊ शकते, असे संकेत देण्यात आले आहेत. चर्चेच्या माध्यमातून तोडगा काढण्याचा प्रयत्न सुरू असून जागावाटप अंतिम टप्प्यात असल्याची माहिती सूत्रांकडून मिळते.

ठाणे महापालिका

ठाण्यात भाजप आणि शिवसेना युतीतच निवडणूक लढणार, असे दोन्ही पक्षांचे नेते वारंवार सांगत आले आहेत. त्यानुसार स्थानिक पातळीवर बैठका देखील पार पडल्या. भाजपने आपल्या अपेक्षा आणि जागांची मागणी स्पष्ट केली आहे. मात्र शिवसेनेकडून अद्याप अंतिम प्रस्ताव न आल्याने भाजपच्या संभाव्य उमेदवारांमध्ये अस्वस्थता आहे. एबी फॉर्म भरणे आणि उमेदवारी अर्ज दाखल करणे कठीण होत असल्याचे उमेदवार सांगत आहेत. त्यामुळे ठाण्यात युतीचा पेच शिवसेनेमुळे अडकलाय का, अशी चर्चा सुरू झाली आहे.

कल्याण-डोंबिवली महापालिका

कल्याण-डोंबिवलीत सुरुवातीला भाजप स्थानिक पातळीवर स्वबळावर निवडणूक लढवण्याच्या तयारीत होता. मात्र वरिष्ठ पातळीवर युतीत निवडणूक लढवण्याचा निर्णय झाल्यानंतर जागावाटपाच्या चर्चांना वेग आला. आतापर्यंत दोन ते तीन बैठका पार पडल्या असून येत्या ४८ तासांत जागावाटपाचा अंतिम फॉर्म्युला जाहीर होण्याची शक्यता वर्तवली जात आहे.

पुणे महापालिका

पुण्यात मात्र युतीत तणाव अधिक तीव्र झाल्याचे चित्र आहे. शिवसेना (शिंदे गट) युतीतून बाहेर पडण्याची शक्यता निर्माण झाली आहे. शिवसेनेकडून सुरुवातीला ३० ते ३५ जागांची मागणी करण्यात आली होती. मात्र भाजपकडून त्याला सकारात्मक प्रतिसाद मिळाला नाही. त्यानंतर किमान २५ जागांची मागणी करण्यात आली, तरीही भाजपचा सूर बदललेला नाही. त्यामुळे युती तोडण्याचा विचार सुरू असल्याची चर्चा आहे. जर भाजपकडून समाधानकारक प्रस्ताव आला नाही, तर अंतिम निर्णय उपमुख्यमंत्री एकनाथ शिंदे घेतील, असे शिवसेनेच्या नेत्या नीलम गोऱ्हे यांनी स्पष्ट केले आहे.

नाशिक महापालिका

नाशिक महापालिकेच्या १२१ जागांसाठी होणाऱ्या निवडणुकीत शिवसेनेने ४५ ते ५० जागांची मागणी भाजपकडे केली आहे. मात्र भाजप नेते गिरीश महाजन यांनी जागा वाटप हे निवडून येण्याच्या क्षमतेनुसार केले जाईल, असे सांगितले आहे. राष्ट्रवादी काँग्रेसचे मंत्री छगन भुजबळ गटातील झिरवाळ यांनी देखील जागावाटपासाठी चर्चेची वेळ मागितल्याचे समोर आले आहे. यामुळे नाशिकमध्ये भाजप, शिवसेना आणि राष्ट्रवादी या तिन्ही पक्षांमध्ये जागावाटप अत्यंत मर्यादित ठेवण्याची शक्यता आहे. मात्र सन्मानजनक जागा न मिळाल्यास स्वबळावर लढण्याचा इशारा शिंदे गटाने दिला आहे.

नवी मुंबई महापालिका

नवी मुंबईत मात्र युतीबाबतची चर्चा जवळपास संपुष्टात आली असल्याचे चित्र आहे. युती होण्याची शक्यता धूसर झाली असून दोन्ही पक्ष स्वबळावर निवडणूक लढवण्याच्या तयारीत असल्याचे संकेत मिळत आहेत. शिवसेनेकडून ५७ जागांची मागणी करण्यात आली होती, तर भाजपने १११ पैकी ९१ जागांचा प्रस्ताव ठेवला. यावरून बैठकीत जोरदार वाद झाला. माजी नगरसेवकांच्या फोडाफोडीच्या मुद्द्यावरूनही दोन्ही पक्षांत मतभेद वाढले असून नवी मुंबईतील युतीचे चर्चासत्र सध्या भिजत घोंगडं ठरले आहे.

Image Courtesy:

02 Jan 2026

BMC Elections

नेते म्हणतात सर्व काही ठीक, पण युतीचा तिढा सुटेना! पाच महापालिकांत चर्चा सुरू, उमेदवार प्रतीक्षेत

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates