महत्त्वाची घोषणा! BMC निवडणुकीत ‘त्या’ नेत्यांना उमेदवारी नाही, उद्धव ठाकरेंचे शिवसैनिकांना आदेश

by Webdesk
17 Sep 2025

मुंबई : आगामी मुंबई महानगरपालिका निवडणुकांच्या पार्श्वभूमीवर शिवसेना (उद्धव बाळासाहेब ठाकरे गट) जोरदार तयारीला लागली आहे. या निवडणुकीत आपली ताकद दाखवण्यासाठी पक्षप्रमुख उद्धव ठाकरे यांनी नुकतीच शिवसेना भवनात विभागप्रमुख, शाखाप्रमुख आणि महत्त्वाच्या पदाधिकाऱ्यांची विशेष बैठक घेतली. या बैठकीला शिवसेना नेते संजय राऊत, विनायक राऊत, अनिल देसाई यांच्यासह अनेक वरिष्ठ पदाधिकारी उपस्थित होते.

बैठकीदरम्यान उद्धव ठाकरे यांनी आगामी निवडणुकीसाठी स्पष्ट आदेश दिले. त्यांनी सांगितले की, "मुंबईतील प्रत्येक वॉर्डामध्ये आपल्या कार्यकर्त्यांची शंभर टक्के तयारी असली पाहिजे. आपण सर्व वॉर्डांमध्ये लढण्यासाठी सज्ज असले पाहिजे. मनसेसोबतच्या संभाव्य युतीबाबत चर्चा सुरू आहे आणि तो निर्णय आपण सर्वजण मिळून घेऊ. पण अंतिम निर्णय काहीही असला तरी, आपली ताकद प्रत्येक वॉर्डात दिसली पाहिजे आणि आपली मदत मनसेपर्यंत पोहोचली पाहिजे."

यावेळी उद्धव ठाकरे यांनी पदाधिकाऱ्यांना आणखी एक महत्त्वाचा संदेश दिला – "जे आपल्याकडे येतील, त्यांना शंभर टक्के साथ द्या. कार्यकर्त्यांचा विश्वास आणि एकजूट हीच खरी ताकद आहे." त्यांच्या या शब्दांनी वातावरणात उत्साह निर्माण झाला.

त्या लोकांना तिकीट देणार नाही

बैठकीदरम्यान उद्धव ठाकरे यांनी एक मोठी घोषणा केली. "जे आपल्याला सोडून गेले आणि दुसऱ्यांच्या गळाला लागले, ते आता परत आले तरी त्यांना उमेदवारी दिली जाणार नाही. गटप्रमुख आणि शाखाप्रमुख हेच आपला जीव की प्राण आहेत. त्यांनी संकटात पक्षाचा झेंडा हातात ठेवला, त्यांचीच खरी किंमत आहे. त्यामुळे त्याग करणाऱ्यांना तिकीट मिळणार नाही. भाजपने आपला पक्ष आणि चिन्ह चोरले आहे, मात्र खरी शिवसेना कोणाची आहे हे लोक ओळखतात," असे ठाकरेंनी स्पष्ट केले.

भाजपकडून काँग्रेस राष्ट्रवादीवर टीका नाही, केवळ आपणच टार्गेट

या बैठकीत भाजपवर टीका करताना उद्धव ठाकरे म्हणाले, "भाजप आणि मुख्यमंत्री फडणवीस यांची नजर फक्त आपल्यावरच आहे. भाजपकडून काँग्रेसवर किंवा राष्ट्रवादीवर विशेष हल्ले होत नाहीत. त्यांना केवळ ठाकरेच दिसतात. हेच दाखवते की खरी भीती त्यांना आपल्या ताकदीची आहे. म्हणूनच त्यांनी आपल्याला टार्गेट केले आहे. या गोष्टीचे महत्त्व समजून घेतले पाहिजे." त्यांनी पुढे स्पष्ट केले की, विरोधकांचा खरा हेतू म्हणजे ठाकरे गटाला संपवणे आणि निवडणुकीत पराभूत करणे. त्यामुळे प्रत्येक शिवसैनिकाने या आव्हानाला सामोरे जाण्यासाठी अधिक जोमाने कामाला लागले पाहिजे.

निवडणुकीला केवळ १०० दिवस उरलेत, जोमाने कामाला लागा

उद्धव ठाकरेंनी निवडणुकीसाठी उरलेला मर्यादित वेळ कार्यकर्त्यांना लक्षात आणून दिला. "फक्त १०० दिवस उरले आहेत. या काळात कोणतीही ढिलाई नको. प्रत्येकाने लोकांच्या सतत संपर्कात राहिले पाहिजे. त्यांच्या समस्या ऐकून घेऊन त्यावर उपाय करण्याचा प्रयत्न केला पाहिजे. दुबार मतदान रोखण्यासाठी दक्ष राहा आणि आपापसातील वाद विसरून एकजूट दाखवा. ही निवडणूक फक्त पक्षाची नाही, तर आपला अभिमान वाचवण्याची लढाई आहे," असे ते म्हणाले.

बैठकीत त्यांनी शिवसैनिकांना सुचवले की, कोणाच्याही भूलथापांना बळी पडू नका. "आपली जबाबदारी नीट पार पाडा आणि बाकी सर्व विषयांवर मी दसरा मेळाव्यात बोलेन," असे आश्वासन उद्धव ठाकरेंनी दिले.

Image Courtesy:

02 Jan 2026

BMC Elections

महत्त्वाची घोषणा! BMC निवडणुकीत ‘त्या’ नेत्यांना उमेदवारी नाही, उद्धव ठाकरेंचे शिवसैनिकांना आदेश

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates