Election Commission On Rahul Gandhi : राहुल गांधींच्या ‘व्होट चोरी’ आरोपाला निवडणूक आयोगाचे प्रत्युत्तर! फक्त तासाभरात दिलं स्पष्टीकरण – “मतदारयादीत जर…”

by Webdesk
05 Nov 2025

Source: News 18 Marathi

नवी दिल्ली : काँग्रेसचे खासदार आणि विरोधी पक्षनेते राहुल गांधी यांनी आज घेतलेल्या पत्रकार परिषदेत मोठे आरोप करत मतचोरीचा मुद्दा पुढे आणला. त्यांनी हरियाणा विधानसभा निवडणुकीत मतदान प्रक्रियेत प्रचंड गोंधळ आणि अनियमितता झाल्याचा दावा केला. या आरोपानंतर फक्त काही तासांतच केंद्रीय निवडणूक आयोगाने अधिकृत प्रतिक्रिया देत स्पष्टीकरण दिले आहे.

पत्रकार परिषदेत राहुल गांधी म्हणाले की, हरियाणात निवडणूक प्रक्रियेत फेरफार करण्यात आली असून मतांची चोरी झाली आहे. त्यांच्या म्हणण्यानुसार, अनेक मतदार केंद्रांवर गैरव्यवहार आणि हेराफेरी झाल्याची तक्रार समोर आली आहे. मात्र, निवडणूक आयोगाच्या सूत्रांनी सांगितले की काँग्रेस पक्षाने निवडणुकीदरम्यान कोणतेही औपचारिक अपील अथवा आक्षेप दाखल केलेले नव्हते.

आयोगाने स्पष्ट केलं की, जर राहुल गांधींना किंवा काँग्रेस पक्षाला खरोखरच काही गैरप्रकारांबद्दल शंका असती, तर त्यांनी ते त्या वेळेस मांडायला हवं होतं. निवडणुकीच्या निकालानंतर आरोप करणं हे योग्य नाही, असं मत आयोगाच्या अधिकाऱ्यांनी मांडलं.

हरियाणा विधानसभा निवडणुकीच्या ९० जागांपैकी फक्त २२ जागांवर निवडणूक याचिका उच्च न्यायालयात प्रलंबित आहेत. निवडणुकीच्या नियमांनुसार, जर कोणत्याही उमेदवाराला किंवा पक्षाला मतदार यादीत त्रुटी असल्याचं किंवा मतदान प्रक्रियेत अनियमितता झाल्याचं वाटत असेल, तर तो उच्च न्यायालयात अपील दाखल करू शकतो. मात्र, आयोगाच्या माहितीनुसार, काँग्रेस पक्षाने आजवर एकही अपील दाखल केलेलं नाही.

आयोगाच्या मते, निवडणुकीदरम्यान कोणत्याही गैरप्रकाराची नोंद अधिकृतपणे केली गेली नाही, त्यामुळे राहुल गांधींचे आरोप पुराव्याशिवाय आणि विलंबाने केलेले आहेत. आयोगाने विचारलं – “जर मतदान प्रक्रियेत हेराफेरी झाली, तर काँग्रेसचे मतदान प्रतिनिधी त्या वेळी काय करत होते?”

निवडणूक आयोगाचा ठाम प्रतिसाद

आयोगाने पुढे सांगितलं की, जर एखाद्या मतदाराने आधीच मतदान केलं असेल किंवा मतदान केंद्रावर मतदाराच्या ओळखीबद्दल शंका निर्माण झाली असेल, तर त्या वेळी मतदान एजंट किंवा बीएलए (Booth Level Agent) ने तत्काळ आक्षेप नोंदवायला हवा होता. पण अशा प्रकारचा कोणताही अधिकृत आक्षेप त्या वेळी काँग्रेसकडून आला नाही.

आयोगाच्या एका वरिष्ठ अधिकाऱ्याने म्हटलं – “आता जेव्हा निकाल लागले आहेत, त्यानंतर आरोप करणं योग्य नाही. निवडणुकीच्या प्रत्येक टप्प्यात निरीक्षण आणि आक्षेप नोंदवण्यासाठी पुरेशी प्रक्रिया आहे. जर काही विसंगती होती, तर ती त्याच वेळी निदर्शनास आणायला हवी होती.”

बोगस मतदारांच्या आरोपावरून काँग्रेसलाच उलट सवाल

राहुल गांधींनी बोगस मतदारांच्या मुद्द्यावरून निवडणूक आयोगावर निशाणा साधला, मात्र आयोगाने त्यांनाच प्रतिप्रश्न केला. आयोगाने स्पष्ट केलं की, “जर मतदार याद्यांमध्ये बनावट मतदार होते, तर काँग्रेसच्या बूथ लेव्हल एजंट्सनी त्या वेळी आक्षेप का घेतले नाहीत?”

याचबरोबर आयोगाने काँग्रेसच्या दाव्याला आव्हान देत विचारलं की, “बोगस मतदारांनी मतदान केलं असं गृहित धरलं तरी, त्यांनी भाजपलाच मतदान केलं हे काँग्रेस कशाच्या आधारावर सांगते?” या प्रश्नावरून आयोगाचा सूर स्पष्ट होता – काँग्रेसचे आरोप केवळ राजकीय हेतूने प्रेरित असून त्यामागे ठोस पुरावे नाहीत.

बोगस मतदारांच्या आरोपावरून काँग्रेसलाच उलट सवाल

दरम्यान, भाजपने राहुल गांधींच्या वक्तव्यावर जोरदार प्रतिकार करत म्हटलं आहे की, “पराभवानंतर जबाबदारी टाळण्यासाठी काँग्रेस बोगस आरोप करत आहे.” पक्षाच्या प्रवक्त्यांनी सांगितलं की, निवडणूक आयोग हे स्वायत्त संस्थान असून त्यावर आरोप करणे म्हणजे लोकशाही प्रक्रियेचा अपमान आहे.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates