Eknath Shinde–Ravindra Chavan Meeting: शिंदेंच्या घरी ५ तासांची मॅरेथॉन बैठक, महायुतीच्या रणनीतीवर काय चर्चा झाली?

ही बैठक ठाण्यातील उपमुख्यमंत्री एकनाथ शिंदे यांच्या निवासस्थानी पार पडली. रात्री उशिरा सुरू झालेली चर्चा थेट पहाटे चार वाजेपर्यंत सुरू होती. यावेळी प्रत्येक महापालिकेतील परिस्थितीचा स्वतंत्रपणे आढावा घेण्यात आला. अनेक ठिकाणी मतभेद असले तरी अखेरीस समन्वयातून निर्णय घेण्यात आल्याचे सांगितले जात आहे. त्यामुळे महायुतीतील समन्वय अधिक भक्कम झाल्याचे चित्र सध्या दिसून येत आहे. या बैठकीत केवळ जागावाटपावरच नाही, तर पुढील टप्प्यातील रणनीतीवरही चर्चा झाली. येत्या दोन दिवसांत स्थानिक पातळीवर वॉर्ड आणि प्रभागनिहाय उमेदवारांच्या नावांवर चर्चा होणार आहे. स्थानिक नेत्यांशी सल्लामसलत करून अंतिम उमेदवार यादी तयार केली जाणार असून त्यानंतर अधिकृत घोषणा केली जाण्याची शक्यता वर्तवली जात आहे. त्यामुळे महायुतीकडून निवडणुकीची तयारी अंतिम टप्प्यात पोहोचल्याचे संकेत मिळत आहेत.