एकनाथ शिंदे अ‍ॅक्शन मोडवर, BMC निवडणुकीआधी आखला जबरदस्त मास्टरप्लॅन; यावेळी राज आणि उद्धव ठाकरे यांना भारी ठरणार का?

by Webdesk
10 Sep 2025

मुंबई : महाराष्ट्रात येत्या काही महिन्यांत मुंबई महापालिकेच्या निवडणुका होणार असून त्याची राजकीय तयारी मोठ्या प्रमाणावर सुरू झाली आहे. या निवडणुकीच्या पार्श्वभूमीवर राज्यातील राजकारणात वेगवेगळ्या हालचाली दिसून येत आहेत. मुंबई महापालिकेवर सत्ता मिळवणे हे शिवसेनेच्या दोन्ही गटांसाठी, महाराष्ट्र नवनिर्माण सेनेसाठी आणि भाजपसाठीही प्रतिष्ठेचं प्रकरण ठरणार आहे.

लोकसभा निवडणुकीत उद्धव बाळासाहेब ठाकरे यांच्या नेतृत्वाखालील शिवसेना गटाला मुंबईत चांगलं यश मिळालं होतं. त्यानंतर विधानसभा निवडणुकीतही उद्धव ठाकरे यांना समाधानकारक निकाल मिळाले. जरी महाराष्ट्राच्या इतर भागांत त्यांना अपेक्षित विजय मिळाला नसेल, तरी मुंबईत मात्र त्यांची पकड घट्ट राहिली होती. मुंबईतील आमदारांची सर्वाधिक संख्या उद्धव ठाकरे यांच्या गटाकडे गेली आणि त्यामुळे मुंबई हा त्यांचा किल्ला असल्याचं स्पष्ट झालं.

आता हाच किल्ला उद्धव ठाकरे यांच्या हातातून खेचून घेण्याचं आव्हान उपमुख्यमंत्री एकनाथ शिंदे यांनी स्वीकारलं आहे. आगामी मुंबई महापालिका निवडणुकीत उद्धव ठाकरे यांना पराभूत करणं हे शिंदेंसाठी राजकीयदृष्ट्या फार मोठं यश ठरणार आहे. म्हणूनच त्यांनी या निवडणुकीत आपली संपूर्ण ताकद झोकून देण्याचा निर्णय घेतला आहे.

यासाठी शिंदे यांनी आपल्या पक्षातील शिलेदारांना जबाबदारी सोपवली आहे. मुंबईत जास्तीत जास्त जागांवर विजय मिळावा यासाठी शिवसेना (शिंदे गट) कडून खास रणनीती आखण्यात आली आहे. त्याचाच भाग म्हणून 21 प्रमुख नेत्यांची एक समिती स्थापन करण्यात आली आहे. या समितीला "मुख्य कार्यकारी समिती" असं नाव देण्यात आलं असून यामार्फत महापालिका निवडणुकीची संपूर्ण धुरा हाती घेण्यात येणार आहे.

दरम्यान, मनसे अध्यक्ष राज ठाकरे आणि शिवसेना (उद्धव बाळासाहेब ठाकरे गट) प्रमुख उद्धव ठाकरे हे एकत्र येण्याच्या चर्चांनाही वेग आला आहे. जर खरोखरच ठाकरे बंधूंची युती झाली, तर मुंबई महापालिकेच्या रणांगणात एकनाथ शिंदे यांच्यासाठी ते मोठं आव्हान ठरणार आहे. कारण उद्धव आणि राज ठाकरे हे दोघे एकत्र आले, तर त्यांचा एकत्रित प्रभाव शिंदे गटासह भाजपलाही अडचणीत आणू शकतो.

विशेष म्हणजे भाजपलादेखील मुंबई महापालिकेत सत्ता मिळवायची आहे. त्यामुळे त्यांचीही तयारी जोरात सुरू आहे. शिंदे गट आणि भाजप हे सत्तेत मित्रपक्ष असले तरी मुंबई महापालिकेच्या निवडणुकीत एक प्रकारची स्पर्धा होणार हे नक्कीच. मात्र, या दोन्ही पक्षांसमोर सर्वात मोठं आव्हान ठाकरे बंधूंच्या संभाव्य युतीचं असेल. त्यामुळेच एकनाथ शिंदे यांनी आतापासूनच आक्रमक मोर्चेबांधणी सुरू केली आहे.

शिवसेना (शिंदे गट) मुख्य कार्यकारी समितीतील नेते पुढीलप्रमाणे :

एकनाथ शिंदे, मुख्य नेते
रामदास कदम, नेते
गजानन कीर्तीकर, नेते
आनंदराव अडसूळ, नेते
मीनाताई कांबळे, नेत्या
डॉ. श्रीकांत शिंदे, खासदार
रवींद्र वायकर, खासदार
मिलिंद देवरा, राज्यसभा खासदार
राहुल शेवाळे, माजी खासदार
संजय निरुपम, माजी खासदार
प्रकाश सुर्वे, आमदार
अशोक पाटील, आमदार
मुरजी पटेल, आमदार
दिलीप लांडे, आमदार
तुकाराम काते, आमदार
मंगेश कुडाळकर, आमदार
मनिषा कायंदे, विधान परिषद सदस्य
सदा सरवणकर, माजी आमदार
यामिनी जाधव, माजी आमदार
दीपक सावंत, माजी आमदार
शिशिर शिंदे, माजी आमदार

एकूणच, मुंबई महापालिकेची निवडणूक ही केवळ स्थानिक सत्ता मिळवण्यापुरती मर्यादित नसून महाराष्ट्राच्या भविष्यातील राजकीय समीकरणांवरही तिचा मोठा परिणाम होणार आहे. उद्धव ठाकरे यांचं मुंबईतील वर्चस्व टिकून राहतं का, की एकनाथ शिंदे यांच्या मास्टरप्लॅनमुळे उद्धवांची ताकद कमी होते, हे पाहणं उत्सुकतेचं ठरणार आहे. दुसरीकडे, राज ठाकरे आणि उद्धव ठाकरे एकत्र आले तर ही लढत अधिकच रंगतदार होईल.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates