काँग्रेस नेत्यांची ठाकरे भेट! विरोधी पक्षनेतेपदावर अंतिम निर्णय? मातोश्रीवरील चर्चेत काय झाले ठराव?

काँग्रेस वर्किंग कमिटीचे सदस्य बाळासाहेब थोरात, काँग्रेस विधिमंडळ नेते विजय वडेट्टीवार आणि उपनेते अमीन पटेल यांनी शुक्रवारी मातोश्रीवर जाऊन उद्धव ठाकरे यांच्याशी संवाद साधला. ही बैठक जवळपास ४० ते ५० मिनिटे सुरू होती. या चर्चेत राज्यातील सध्याच्या राजकीय परिस्थितीचे मूल्यमापन करण्यात आले तसेच पुढील निवडणुकांच्या पार्श्वभूमीवर रणनीती आखण्यात आली. काँग्रेस नेत्यांच्या म्हणण्यानुसार, या चर्चेत काही ठोस मुद्द्यांवर साधक-बाधक विचारविनिमय झाला.

 

विधान परिषदेतील विरोधी पक्षनेते अंबादास दानवे यांचा कार्यकाळ नुकताच ऑगस्टमध्ये संपला. परिणामी त्यांचे सदस्यत्व संपुष्टात आल्यामुळे त्यांचे विरोधी पक्षनेतेपदही आपोआप रद्द झाले. या पार्श्वभूमीवर आता हे पद काँग्रेसला द्यावे, अशी मागणी काँग्रेसच्या नेत्यांनी उद्धव ठाकरे यांच्याकडे केली. या पदासाठी काँग्रेसने सतेज उर्फ बंटी पाटील यांचे नाव निश्चित केले असून त्यावर पक्षांतर्गत शिक्कामोर्तब झाल्याची माहिती समोर आली आहे. याबाबत शिवसेनेकडून पाठिंबा मिळाल्यास काँग्रेसला विधान परिषदेत विरोधी पक्षनेतेपद मिळू शकते.