BMC Polls : प्रभाग रचनेच्या घोषणेनंतर भाजप नेते ॲक्शनमध्ये, बीएमसी जिंकण्यासाठी सुरू मिशन!

राज्यात स्थानिक स्वराज्य संस्थांच्या निवडणुका गेल्या काही वर्षांपासून विविध कारणांमुळे रखडल्या आहेत. कोरोना महामारी आणि ओबीसी आरक्षणाशी संबंधित वादंगामुळे या निवडणुका वारंवार पुढे ढकलल्या गेल्या. 2020 पासून अनेकदा निवडणुकीचे संकेत मिळाले, पण प्रत्यक्ष निवडणूक झाली नाही. अखेर सर्वोच्च न्यायालयाने राज्य निवडणूक आयोगाला स्पष्ट आदेश दिले की मुंबई महानगरपालिका आणि प्रलंबित स्थानिक स्वराज्य संस्थांच्या निवडणुका अधिसूचित करून वेळेत घेण्यात याव्यात. त्यानंतर शासनाने मुंबई महापालिकेकडून प्रभाग रचनेचा प्रारूप आराखडा सादर करून घेतला असून, नागरिकांच्या सूचना व हरकतींनंतर 6 ऑक्टोबर रोजी अंतिम आराखडा निश्चित केला जाणार आहे.

 

सध्या मुंबई महापालिकेत एकूण 227 वॉर्ड आहेत. 2017 मध्ये जशी वॉर्डरचना होती, तशीच रचना यंदाही कायम ठेवण्यात आली आहे. तथापि, कोस्टल रोडसारख्या मोठ्या प्रकल्पांमुळे आणि इतर काही विकासकामांमुळे काही प्रभागांच्या सीमांत फेरफार करण्यात आले आहेत. मागील निवडणुकीत भाजपने प्रभावी कामगिरी केली होती, मात्र बहुमत कमी पडल्याने सत्ता स्थापनेत ते मागे पडले. यंदा मात्र महापालिका जिंकण्याचा निर्धार भाजपने केला आहे आणि त्यासाठी पूर्ण ताकदीनिशी पक्ष मैदानात उतरणार आहे.