BMC Polls 2026: मनसेची साथ असूनही ठाकरेंच्या मनात भीती? निवडणुकीआधीच पक्षात अस्वस्थता, पडद्यामागे नेमकं काय सुरू आहे?

by Webdesk
20 Dec 2025

महानगरपालिकांच्या निवडणुकांचे बिगुल वाजले असून अवघ्या काही दिवसांतच राज्यातील २९ महानगरपालिकांसाठी मतदान पार पडणार आहे. जानेवारी महिन्याच्या दुसऱ्या आठवड्यात ही प्रक्रिया पूर्ण होणार असल्याने राज्यातील राजकीय वातावरण तापले आहे. महाविकास आघाडी असो वा महायुती, सर्वच राजकीय पक्ष जोरदार तयारीला लागले असून स्थानिक पातळीवरील समीकरणे लक्षात घेऊन रणनीती आखली जात आहे. या सगळ्या घडामोडींमध्ये सर्वाधिक लक्ष वेधून घेत आहे ती मुंबई महानगरपालिकेची निवडणूक.

मुंबईवर सत्ता मिळवण्यासाठी सत्ताधारी भाजपसह सर्वच प्रमुख पक्षांनी कंबर कसली आहे. आर्थिक, राजकीय आणि प्रतीकात्मक दृष्टिकोनातून मुंबई महापालिकेला प्रचंड महत्त्व असल्याने ही लढत अत्यंत प्रतिष्ठेची मानली जात आहे. अशा परिस्थितीत शिवसेना ठाकरे गटाचे प्रमुख उद्धव ठाकरे यांनी आपल्या बंधू राज ठाकरे यांना सोबत घेऊन मुंबईतील राजकीय समीकरणे पूर्णपणे बदलून टाकली आहेत. ठाकरे बंधूंच्या संभाव्य युतीमुळे मराठी मतदारांचे एकत्रीकरण होण्याची शक्यता वर्तवली जात असून, यामुळे अनेक पक्षांच्या गणितांमध्ये मोठा बदल झाला आहे.

मात्र, निवडणूक जशी जवळ येऊ लागली आहे, तसतशी ठाकरे गटामध्ये अस्वस्थतेची भावना वाढत असल्याची चर्चा राजकीय वर्तुळात सुरू आहे. एकीकडे मनसेची साथ लाभल्यामुळे उद्धव ठाकरे यांची ताकद वाढल्याचे चित्र असले, तरी दुसरीकडे काही वेगळ्याच चिंता ठाकरे गटाला सतावत असल्याची माहिती समोर येत आहे. ही भीती नेमकी काय आहे, याबाबत अनेक तर्कवितर्क लावले जात आहेत.

पडद्याआड सुरू असलेल्या घडामोडी पाहिल्या, तर या अस्वस्थतेमागे महाविकास आघाडीतील अंतर्गत समीकरणे कारणीभूत असल्याचे दिसते. मुंबई महापालिका निवडणुकीसाठी काँग्रेस पक्षाने ‘एकला चलो’ची भूमिका घेतली असल्याचे संकेत दिले आहेत. दुसरीकडे राष्ट्रवादी काँग्रेसचे ज्येष्ठ नेते शरद पवार हे ठाकरे गट आणि मनसेसोबत एकत्र निवडणूक लढवण्याच्या भूमिकेत सकारात्मक असल्याचे सांगितले जाते. त्यामुळे तीन पक्ष एकत्र येण्याची शक्यता असली, तरी आघाडीतील स्पष्टता अद्याप निर्माण झालेली नाही.

याच दरम्यान ठाकरे गटातील काही नेत्यांना एक महत्त्वाची भीती सतावत आहे, ती म्हणजे अल्पसंख्यांक मतदार नाराज होण्याची. मनसेसोबत युती केल्यास काही प्रमाणात अल्पसंख्यांक मतं दुरावण्याची शक्यता असल्याची भावना ठाकरे गटातील एका गटात आहे. उद्धव ठाकरे हे मनसेला सोबत घेण्याबाबत ठाम भूमिका घेत असले, तरी काँग्रेसला बाजूला ठेवण्याचा निर्णय घ्यायचा की नाही, याबाबत अजूनही संभ्रम कायम आहे.

यामागचे प्रमुख कारण म्हणजे मुंबईत काँग्रेसची असलेली भक्कम ताकद. मागील लोकसभा निवडणुकांमध्ये ठाकरे गटाला अल्पसंख्यांक मतदारांचा मोठा पाठिंबा मिळाला होता. या मतांच्या जोरावर ठाकरे गटाने मुंबईतील सहा लोकसभा मतदारसंघांपैकी तीन जागांवर विजय मिळवला होता. तर उत्तर-पश्चिम मुंबईची जागा केवळ ४८ मतांच्या फरकाने हातातून निसटली होती. हे आकडे पाहता अल्पसंख्यांक मतांचे महत्त्व स्पष्टपणे अधोरेखित होते.

अशा परिस्थितीत जर काँग्रेससोबतची युती तुटली, तर अल्पसंख्यांक मतदारांमध्ये नाराजी निर्माण होऊ शकते आणि मतांचे विभाजन होण्याची शक्यता आहे. याचा थेट फटका ठाकरे गटाला बसू शकतो, अशी भीती पक्षातील काही नेत्यांकडून व्यक्त केली जात आहे. त्यामुळे मनसेसोबत युती करताना काँग्रेसलाही सोबत ठेवणे आवश्यक असल्याचे मत ठाकरे गटातील एका गटाचे आहे.

एकीकडे मराठी मतांचे एकत्रीकरण आणि दुसरीकडे अल्पसंख्यांक मतांचे गणित, या दोहोंचा समतोल साधणे हे ठाकरे गटासमोरचे मोठे आव्हान बनले आहे. आगामी मुंबई महापालिका निवडणूक केवळ सत्तेसाठीची लढाई नसून, भविष्यातील राजकीय दिशा ठरवणारी ठरणार असल्याने प्रत्येक निर्णय अत्यंत विचारपूर्वक घ्यावा लागत आहे. त्यामुळे ठाकरे गटातील ही अंतर्गत अस्वस्थता आणि पडद्याआड सुरू असलेल्या हालचाली येत्या काही दिवसांत आणखी तीव्र होण्याची शक्यता नाकारता येत नाही.

Image Courtesy:

02 Jan 2026

BMC Elections

BMC Polls 2026: मनसेची साथ असूनही ठाकरेंच्या मनात भीती? निवडणुकीआधीच पक्षात अस्वस्थता, पडद्यामागे नेमकं काय सुरू आहे?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates