BMC Elections : महापौरपदावर कोण बसणार? एकनाथ शिंदे यांनी फक्त एका वाक्यात निकाल लावणारे उत्तर दिलं!

by Webdesk
25 Nov 2025

राज्यात स्थानिक स्वराज्य संस्थांच्या निवडणुकांचा माहोल शिगेला पोहोचला आहे. महायुती आणि महाविकास आघाडी दोन्ही आघाड्यांचे नेते मैदानात उतरत असून प्रचाराला मोठी गती मिळाली आहे. सर्व राजकीय पक्षांचे कार्यकर्ते, आमदार, खासदार हे मतदारांशी भेटण्यासाठी मैदानात धावत आहेत. या पार्श्वभूमीवर उपमुख्यमंत्री एकनाथ शिंदे राज्यभर दौरे करून सभा घेत असून प्रत्येक ठिकाणी महायुतीच्या सरकारची कामे आणि आगामी निवडणुकांचा आराखडा मांडताना दिसत आहेत. याच दरम्यान एकनाथ शिंदे यांनी टीव्ही 9 मराठीला दिलेल्या खास मुलाखतीत अनेक महत्त्वपूर्ण विषयांवर प्रतिक्रिया दिली. विशेषतः मुंबई महापालिका निवडणुकीतील युती आणि महापौरपदाबाबत त्यांनी महत्त्वाचे स्पष्टीकरण दिल्याने राजकीय वर्तुळात उत्सुकता वाढली आहे.

मुंबई महापालिकेमध्ये नेमका महापौर कोणाचा होणार या प्रश्नावर शिंदेंना विचारणा करण्यात आली. यावर बोलताना त्यांनी स्पष्टपणे सांगितले की, मुंबईत आम्ही एकत्रितपणे महायुती म्हणूनच निवडणूक लढवणार आहोत. मुंबईत सत्ता महायुतीचीच येईल आणि महापौरही महायुतीचाच असेल, याबद्दल मला कोणतीही शंका नाही. त्यांनी पुढे सांगितले की, मागील निवडणुकीत निवडून आलेल्या सुमारे 70 नगरसेवकांचे समर्थन शिवसेनेला मिळाले होते. तसेच 2012 पासून अनेक पदाधिकारी आणि कार्यकर्ते आमच्यासोबत आहेत. अंदाजे 125 नगरसेवकांचे समर्थन या गटाकडे आहे, असा दावाही त्यांनी केला. त्यामुळे भाजप, शिवसेना आणि राष्ट्रवादीच्या संयुक्त ताकदीसमोर विरोधक टिकू शकणार नाहीत आणि महायुतीचा महापौर मुंबई महापालिकेत निश्चितच बसणार आहे, असे त्यांनी आत्मविश्वासाने सांगितले.

यावेळी मुंबईच्या विकासाबाबतही त्यांनी मोठा मुद्दा उपस्थित केला. गेल्या 15 ते 20 वर्षांमध्ये मुंबईला ज्या दर्जाचा विकास मिळायला हवा होता, तो झालेलाच नाही, अशी टीका शिंदेंनी अप्रत्यक्षपणे पूर्वीच्या सत्ताधाऱ्यांवर केली. ते म्हणाले की, मी मुख्यमंत्री झाल्यानंतर मुंबईतील प्रमुख रस्त्यांचे काँक्रिटीकरण, खड्डेमुक्त मुंबई आणि जलद वाहतूक व्यवस्थेवर जोर देण्याचा निर्णय घेतला. त्यासाठी आम्ही मोठ्या प्रमाणावर कामे हाती घेतली. पुढील दीड वर्षांमध्ये ही सर्व कामे पूर्ण होतील आणि मुंबईचे चित्र बदललेले दिसेल, असा विश्वासही त्यांनी व्यक्त केला. त्याचबरोबर मेट्रो प्रकल्प आणि कारशेडची कामे जेथे थांबली होती ती आता मोठ्या वेगाने सुरू असल्याचे त्यांनी सांगितले. आरोग्य क्षेत्रातील सुधारणा, रुग्णालयांच्या उभारणी आणि सुविधा वाढवण्यावरही लक्ष केंद्रीत केले असल्याचे त्यांनी स्पष्ट केले. मुंबईत चालू असलेली पायाभूत कामे नागरिकांचे जीवन अधिक सुलभ करण्यासाठी आहेत आणि ती वेळेत पूर्ण होतील, असेही त्यांनी नमूद केले.

मुलाखतीदरम्यान महायुतीतील नाराजी आणि अंतर्गत मतभेदांबद्दल विचारले असता शिंदेंनी त्यावरही प्रतिक्रिया दिली. "मी प्रचारात व्यस्त आहे, देवेंद्र फडणवीस आणि अजित पवारही प्रचार करत आहेत. आम्ही तिघेही निवडणुकीच्या मैदानात सक्रिय आहोत," असे म्हणत त्यांनी तणावाच्या चर्चांवर पडदा टाकण्याचा प्रयत्न केला. पुढे ते म्हणाले की, काही ठिकाणी आमची भाजपशी युती आहे, तर काही ठिकाणी अजितदादांच्या पक्षाशी युती आहे. मतदान करणार्‍या जनतेला त्यांच्या परिसरात विकासाची अपेक्षा आहे, आणि त्याच दृष्टीकोनातून आम्ही प्रचार करत आहोत. मैत्रीपूर्ण लढतीत एकमेकांवर अनावश्यक टीका करण्याचा पद्धत आम्ही स्वीकारणार नाही. आम्ही सकारात्मक आणि विकासाभिमुख निवडणूक लढवणार आहोत, असे त्यांनी स्पष्ट केले. महायुतीमध्ये जे काही गैरसमज होते ते आता मागे पडले आहेत आणि सध्या सगळे पक्ष एकदिलाने निवडणुकीकडे वाटचाल करत आहेत, असे ते म्हणाले.

एकूणच मुलाखतीतून स्पष्ट झाले की, महापालिका निवडणुकीबाबत महायुती आत्मविश्वासात असून मुंबईचे राजकीय चित्र बदलणार असल्याचा विश्वास एकनाथ शिंदे सातत्याने व्यक्त करत आहेत. महापौरपद, विकासकामे, आणि महायुतीची अंतर्गत एकता या तीन मुख्य मुद्द्यांवर शिंदेंनी केलेल्या खुलास्यामुळे निवडणूक पूर्व वातावरण आणखी रंगतदार बनले आहे. मुंबई महापालिका निवडणूक जसजशी जवळ येत आहे तसतसा राजकीय तापमान आणखी वाढण्याची शक्यता आहे.

Image Courtesy:

02 Jan 2026

BMC Elections

BMC Elections : महापौरपदावर कोण बसणार? एकनाथ शिंदे यांनी फक्त एका वाक्यात निकाल लावणारे उत्तर दिलं!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates