BMC Election : कुठे मुलगा, कुठे सून, तर कुठे मेव्हणा… बीएमसी निवडणुकीत ४३ जागांवर घराणेशाहीचा ठसा, संपूर्ण यादी पाहा

by Webdesk
31 Dec 2025

मुंबई : मुंबई महानगरपालिका निवडणुकीसाठी उमेदवारी अर्ज भरण्याची प्रक्रिया पूर्ण झाल्यानंतर आता बहुतांश प्रभागांतील निवडणुकीची चित्रं स्पष्ट होत चालली आहेत. कोणत्या प्रभागात कोण उमेदवार आहे, कोणासमोर कोण उभा आहे, याचं गणित जवळपास ठरलेलं असतानाच, या निवडणुकीतील एक ठळक बाब पुन्हा एकदा चर्चेचा विषय ठरत आहे. ती म्हणजे – घराणेशाही.

सर्वच राजकीय पक्षांकडून यावेळी “कार्यकर्त्यांना संधी” दिल्याचा दावा केला जात आहे. मात्र, प्रत्यक्ष उमेदवारांच्या याद्या पाहिल्यानंतर या दाव्यांवर प्रश्नचिन्ह उपस्थित होत आहे. कारण, अनेक पक्षांमध्ये पुन्हा एकदा नेत्यांच्या कुटुंबीयांनाच उमेदवारी देण्यात आल्याचं चित्र उघडपणे समोर आलं आहे. घराणेशाहीला विरोध करणारी भाषणं सभागृहात आणि जाहीर सभांमध्ये होत असली, तरी प्रत्यक्षात मात्र तिकीट वाटपाच्या वेळी नातेसंबंधांना प्राधान्य दिलं गेल्याचं स्पष्ट दिसून येत आहे.

विशेष म्हणजे घराणेशाहीविरोधात सातत्याने आक्रमक भूमिका मांडणाऱ्या भाजपमध्येच एक धक्कादायक चित्र समोर आलं आहे. मुंबईतील एका भाजप आमदाराच्या घरातून तब्बल तीन नातेवाईकांनी निवडणूक रिंगणात उडी घेतली आहे. या घटनेमुळे भाजपच्या भूमिकेवरच प्रश्न उपस्थित होत असून, “घराणेशाहीला विरोध फक्त भाषणापुरताच आहे का?” असा सवाल राजकीय वर्तुळात विचारला जात आहे.

भाजपपुरतीच ही बाब मर्यादित नाही. शिवसेना (दोन्ही गट), राष्ट्रवादी काँग्रेस (दोन्ही गट) तसेच काँग्रेसमध्येही अनेक ठिकाणी नेत्यांचे मुलगे, मुली, पत्नी, भाऊ, सून किंवा इतर नातेवाईक उमेदवार म्हणून मैदानात उतरले आहेत. उपलब्ध माहितीनुसार, मुंबई महापालिकेच्या तब्बल ४३ प्रभागांमध्ये विविध पक्षांच्या नेत्यांचे कुटुंबीय निवडणूक लढवत आहेत. त्यामुळे ही निवडणूक खरंच कार्यकर्त्यांची आहे की पुन्हा एकदा ‘घरातल्यांची’ झाली आहे, असा प्रश्न उपस्थित केला जात आहे.

या घराणेशाहीमुळे अनेक प्रभागांमध्ये स्थानिक पातळीवर नाराजीचा सूर उमटताना दिसत आहे. वर्षानुवर्षे पक्षासाठी काम करणारे, आंदोलनं करणारे आणि पक्ष संघटना मजबूत करणारे कार्यकर्ते डावलले गेल्याची भावना अनेक ठिकाणी व्यक्त होत आहे. काही ठिकाणी ही नाराजी उघडपणे समोर येत असली, तरी काही ठिकाणी ती आतूनच धगधगत असल्याचं चित्र आहे. याचा फटका निवडणुकीच्या निकालांवर होण्याची शक्यता नाकारता येत नाही. या पार्श्वभूमीवर ही निवडणूक केवळ पक्षांचीच नव्हे, तर संबंधित नेत्यांची प्रतिष्ठा पणाला लावणारी ठरणार आहे. ज्या नेत्यांनी आपल्या नातेवाईकांना उमेदवारी दिली आहे, त्यांच्या विजय-पराजयावर त्या नेत्यांचं राजकीय वजन ठरणार आहे. एखाद्या प्रभागात नातेवाईक उमेदवाराचा पराभव झाला, तर त्याचा थेट परिणाम संबंधित नेत्याच्या प्रतिमेवर आणि पक्षातील स्थानावर होऊ शकतो.

राजकीय निरीक्षकांच्या मते, मुंबई महापालिका निवडणूक यावेळी अनेक अर्थांनी निर्णायक ठरणार आहे. एका बाजूला सत्ता आणि विरोधकांमधील थेट लढत आहे, तर दुसऱ्या बाजूला घराणेशाही विरुद्ध कार्यकर्ते असा अंतर्गत संघर्षही पाहायला मिळत आहे. मतदार यावेळी नेत्यांच्या भाषणांपेक्षा प्रत्यक्ष उमेदवारांकडे आणि त्यांच्या पार्श्वभूमीकडे अधिक लक्ष देणार का, हे पाहणं महत्त्वाचं ठरणार आहे.

>> साटमांचा मेव्हाणा, घोसाळकरांचा लेक, दरेकरांचा भाऊ...बीएमसीच्या रिंगणातील नातीगोतींची यादी

	नेत्याचे नाव	पक्ष	उमेदवार	नाते
1	विनोद घोसाळकर	उद्धवसेना	तेजस्वी घोसाळकर	सून
2	आ. प्रवीण दरेकर	भाजप	प्रकाश दरेकर	भाऊ
3	ज्ञानमूर्ती शर्मा	भाजप	संगीता शर्मा	पत्नी
4	जया तियाना	भाजप	तेजिंदर सिंग तियाना	मुलगा
5	समीर देसाई	भाजप	रंजून समीर देसाई	पत्नी
6	दिलीप पटेल	भाजप	संदीप पटेल	मुलगा
7	डॉ. भारती लवेकर	भाजप	योगीराज दाभाळकर	भाचा
8	रघुनाथ कुलकर्णी	भाजप	सायली कुलकर्णी	मुलगी
9	अमित साटम	भाजप	रोहन राठोड	मेहुणा
10	किरीट सोमैय्या	भाजप	नील सोमैय्या	मुलगा
11	सुरेखा लोखंडे	भाजप	रोहिदास लोखंडे	पती
12	राज पुरोहित	भाजप	आकाश पुरोहित	मुलगा
13	राहुल नार्वेकर	भाजप	हर्षिता नार्वेकर	भावजय
14	राहुल नार्वेकर	भाजप	मकरंद नार्वेकर	भाऊ
15	राहुल नार्वेकर	भाजप	गार्गी शिवलकर	बहीण
16	रवींद्र वायकर	शिंदेसेना	दीप्ती पोतनीस-चावरेकर	मुलगी
17	अशोक पाटील	शिंदेसेना	रुपेश पाटील	मुलगा
18	दिलीप लांडे	शिंदेसेना	शैला लांडे	पत्नी
19	संजय तुर्डे	शिंदेसेना	मीनल तुर्डे	पत्नी
20	सदा सरवणकर	शिंदेसेना	प्रिया सरवणकर नृत्या	मुलगी
21	सदा सरवणकर	शिंदेसेना	समाधान सरवणकर	मुलगा
22	विनोद घोसाळकर	उद्धवसेना	सौरभ घोसाळकर	मुलगा
23	माधुरी भोईर	उद्धवसेना	योगेश भोईर	पती
24	सुनील प्रभू	उद्धवसेना	अंकिता प्रभू	मुलगी
25	हारून खान	उद्धवसेना	सबा खान	मुलगी
26	विश्वनाथ महाडेश्वर	उद्धवसेना	पूजा महाडेश्वर	पत्नी
27	विनायक राऊत	उद्धवसेना	योगेश राऊत	मुलगा
28	श्रीकांत सरमळकर	उद्धवसेना	हरी शास्त्री	जावई
29	संजय दीना पाटील	उद्धवसेना	राजोल पाटील	मुलगी
30	प्रकाश फातर्फेकर	उद्धवसेना	सुप्रदा फातर्फेकर	मुलगी
31	सुनील शिंदे	उद्धवसेना	निशिकांत शिंदे	भाऊ
32	आशिष चेंबूरकर	उद्धवसेना	प्रज्ञा चेंबूरकर	पत्नी
33	मनोज जामसुतकर	उद्धवसेना	सोनम जामसुतकर	पत्नी
34	अशोक धात्रक	उद्धवसेना	अजिंक्य धात्रक	मुलगा
35	ॲड युसूफ अब्राहानी	सपा	अमरीन अब्राहानी	जावई
36	नवाब मलिक	राष्ट्रवादी (अप)	कप्तान मलिक	भाऊ
37	नवाब मलिक	राष्ट्रवादी (अप)	डॉ. सईदा खान	बहीण
38	कप्तान मलिक	राष्ट्रवादी (अप)	बुशरा मलिक	सून
39	अस्लम शेख	काँग्रेस	कमर जहाँ सिद्दिकी	बहीण
40	अस्लम शेख	काँग्रेस	हैदरअली शेख	मुलगा
41	मोहसीन हैदर	काँग्रेस	मेहेर हैदर	पत्नी
42	चंद्रकांत हंडोरे	काँग्रेस	प्रज्योती हंडोरे	मुलगी
43	दीपक काळे	काँग्रेस	आशा काळे	पत्नी
44	विनोद घोसाळकर	उद्धवसेना	सौरभ घोसाळकर	मुलगा

Image Courtesy:

02 Jan 2026

BMC Elections

BMC Election : कुठे मुलगा, कुठे सून, तर कुठे मेव्हणा… बीएमसी निवडणुकीत ४३ जागांवर घराणेशाहीचा ठसा, संपूर्ण यादी पाहा

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates