BMC Election : उलटी गिनती सुरू! महापालिका निवडणुकीच्या आचारसंहितेवर मोठी अपडेट समोर

by Webdesk
13 Nov 2025

मुंबई : राज्यात स्थानिक स्वराज्य संस्थांच्या निवडणुकांचा बिगुल वाजल्यानंतर राजकीय वातावरण पूर्णपणे तापले आहे. नगरपंचायत आणि नगरपालिका निवडणुका आता अंतिम टप्प्यात असून, त्यानंतर जिल्हा परिषदा आणि पंचायत समित्यांच्या निवडणुकांची घोषणा होणार असल्याचे स्पष्ट संकेत मिळाले आहेत. स्थानिक स्वराज्य संस्थांच्या निवडणुकीच्या अखेरच्या फेरीत आता महापालिका निवडणुका रंगणार आहेत. मुंबई, ठाणे आणि पुण्यासह राज्यातील अनेक प्रमुख महानगरपालिकांच्या निवडणुकांबाबत मोठी अपडेट समोर आली आहे.

राज्यातील स्थानिक राजकारणात या निवडणुकांच्या पार्श्वभूमीवर नव्या राजकीय समीकरणांचा खेळ सुरू झाला आहे. काही ठिकाणी जुन्या शत्रूंनी हातमिळवणी करण्याचे संकेत दिले आहेत. सिंधुदुर्ग जिल्ह्यात शिंदे गटाची शिवसेना आणि ठाकरे गटाची शिवसेना एकत्र लढणार असल्याची चर्चा सध्या राजकीय वर्तुळात जोमाने सुरू आहे. तर पुणे जिल्ह्यात राष्ट्रवादी काँग्रेसच्या शरद पवार गट आणि अजित पवार गटाच्या एकत्र येण्याच्या चर्चेनेही उत्सुकता वाढवली आहे. या नव्या आघाड्या आणि युतीमुळे स्थानिक निवडणुकांची लढत आणखी रंगतदार होणार आहे.

दरम्यान, आचारसंहिता लागू होण्यापूर्वी विकासकामांच्या उद्घाटनांचा आणि भूमिपूजनांचा धडाका सुरु झाला आहे. अनेक ठिकाणी सत्ताधारी आमदार, खासदार आणि मंत्र्यांकडून पालिका प्रशासनाला विकास प्रकल्पांचे लोकार्पण तातडीने पार पाडण्याच्या सूचना दिल्या गेल्याची माहिती समोर येत आहे. परिणामी, प्रशासकीय यंत्रणेत गडबडगोंधळाचे वातावरण निर्माण झाले आहे. अधिकाऱ्यांना कामांच्या मंजुरीपासून उद्घाटनापर्यंत तातडीने निर्णय घ्यावे लागत आहेत.

आता सर्वांच्या नजरा महापालिका निवडणुकांच्या वेळापत्रकावर आहेत. मुंबई, ठाणे, कल्याण आणि डोंबिवली या महत्त्वाच्या महानगरपालिकांच्या निवडणुका एकत्रितपणे घेण्याची शक्यता व्यक्त केली जात आहे. त्यामुळे या निवडणुका केवळ स्थानिक स्वरूपाच्या न राहता, "मिनी विधानसभा निवडणुका" ठरणार आहेत. या निवडणुकांमधून पुढील विधानसभा निवडणुकांचे संकेत मिळू शकतात, असेही राजकीय तज्ज्ञांचे मत आहे.

महापालिका निवडणुका जानेवारी 2026 च्या आधी पार पडणे आवश्यक आहे. सुप्रीम कोर्टाने राज्यातील सर्व स्थानिक स्वराज्य संस्थांच्या निवडणुका 31 जानेवारी 2026 पर्यंत पूर्ण करण्याचे आदेश दिले आहेत. त्यानुसार राज्य निवडणूक आयोगाने तयारी सुरू केली असून, जानेवारी महिन्यातच मुंबईसह इतर महापालिकांच्या निवडणुका घेण्याचा विचार सुरु आहे. त्यामुळे येत्या डिसेंबर महिन्यात आचारसंहिता लागू होण्याची शक्यता वाढली आहे.

मिळालेल्या माहितीनुसार, महापालिका निवडणुकीची आचारसंहिता 15 डिसेंबरनंतर लागू होईल, अशी शक्यता वर्तवली जात आहे. म्हणजेच, फक्त महिनाभरातच आचारसंहिता लागू होण्याची चिन्हे आहेत. त्यामुळे राज्यातील सर्व राजकीय पक्षांनी तयारीचा वेग वाढवला आहे. नेत्यांकडून कार्यकर्त्यांच्या बैठकांना आणि प्रचार नियोजनाला सुरुवात झाली आहे.

या निवडणुका राज्यातील सर्व पक्षांसाठी प्रतिष्ठेची लढत मानली जात आहे. सत्ताधारी शिंदे-भाजप युतीसाठी ही निवडणूक त्यांच्या कारभारावरचा जनतेचा विश्वास टिकवण्याची परीक्षा असेल. तर ठाकरे गट, राष्ट्रवादी काँग्रेस आणि काँग्रेससाठी ही निवडणूक अस्तित्व आणि प्रभाव सिद्ध करण्याची संधी ठरणार आहे.

मुंबई, ठाणे आणि पुणे या महापालिकांवर नियंत्रण मिळवण्यासाठी सर्व पक्षांनी रणनीती आखण्यास सुरुवात केली आहे. मोठ्या नेत्यांच्या सभा, पदयात्रा, आणि स्थानिक पातळीवरील गठबंधन या सगळ्यांचा जोर वाढला आहे. दुसरीकडे, उमेदवार निश्चिती आणि प्रभागनिहाय नियोजनावर पक्षांतर्गत चर्चा जोरात सुरू आहे. राज्यातील जनतेच्या दृष्टीने या निवडणुका महत्त्वाच्या ठरणार आहेत. गेल्या काही वर्षांपासून प्रशासकीय अधिकाऱ्यांच्या अखत्यारीत असलेल्या महापालिकांवर आता पुन्हा लोकप्रतिनिधींचे नेतृत्व येणार आहे. त्यामुळे शहरांच्या विकासाचे, निधींच्या वापराचे आणि नागरिकांच्या अडचणी सोडविण्याचे खरे नेतृत्व कोण घेतं, याकडे सर्वांचे लक्ष लागले आहे.

एकंदरीत, पुढील काही दिवसांत राज्यातील राजकीय घडामोडींचा वेग वाढणार आहे. आचारसंहिता लागू होण्यापूर्वी विकास कामांची घोषणाबाजी, राजकीय कार्यक्रम आणि प्रचार मोहीमांची लगबग सुरूच राहणार आहे. आगामी महापालिका निवडणुका राज्याच्या राजकारणात नवे समीकरण निर्माण करणाऱ्या ठरण्याची शक्यता आहे.

Image Courtesy:

02 Jan 2026

BMC Elections

BMC Election : उलटी गिनती सुरू! महापालिका निवडणुकीच्या आचारसंहितेवर मोठी अपडेट समोर

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates