BMC Election: ठाकरे बंधूंच्या युतीत ‘१९२’ वर तिढा! निवडणुकीआधीच शिवसेना-मनसेत मतभेद?

by Webdesk
26 Dec 2025

मुंबई : महापालिका निवडणुकीची रणधुमाळी आजपासून अधिकृतपणे सुरू झाली असून, उद्धव ठाकरे आणि राज ठाकरे यांनी जाहीर केलेल्या युतीनंतर मुंबईच्या राजकारणात नवे समीकरण उदयास आले आहे. ठाकरे बंधू एकत्र आल्याने मराठी मतदारांमध्ये मोठी चर्चा सुरू असताना, दुसरीकडे या युतीसमोर अंतर्गत आव्हानेही उभी राहत असल्याचे चित्र आहे. विशेषतः मराठीबहुल भागांमध्ये जागा वाटपावरून शिवसेना ठाकरे गट आणि मनसेमध्ये सुरुवातीला तिढा निर्माण झाला होता. तो तिढा चर्चेअंती सुटल्याचे जरी सांगितले जात असले, तरी आता इच्छुक उमेदवारांमुळे युतीची डोकेदुखी वाढण्याची चिन्हे स्पष्टपणे दिसत आहेत.

मनसेसाठी सोडून दिलेल्या काही वॉर्डांवर ठाकरे गटातील इच्छुकांनी दावा केल्याने युतीत नाराजीचे सूर उमटू लागले आहेत. त्यामुळे नुकतेच जुळलेले मन पुन्हा दुभंगणार का, असा सवाल उपस्थित केला जात आहे. इच्छुकांची संख्या मोठी असल्याने दोन्ही पक्षांच्या वरिष्ठ नेत्यांना कठोर भूमिका घ्यावी लागणार असल्याचे संकेत मिळत आहेत.

शिवसेना ठाकरे गट आणि मनसे यांच्यातील जागा वाटपावर दीर्घ चर्चा झाल्यानंतर अखेर युतीची औपचारिक घोषणा करण्यात आली. मात्र, शिवसेना भवन असलेला दादर-माहीम परिसर हा या चर्चेचा केंद्रबिंदू ठरला होता. माहीम विधानसभा मतदारसंघातून मनसे आणि एकसंध शिवसेनेचे आमदार निवडून आले असले, तरी मागील विधानसभा निवडणुकीत ठाकरे गटाने विजय मिळवला होता. त्यामुळे या भागातील वॉर्ड कोणाच्या वाट्याला जाणार, यावरून दोन्ही पक्षांत रस्सीखेच झाली होती.

दादर-माहीम हा भाग राजकीयदृष्ट्या अत्यंत महत्त्वाचा मानला जातो. शिवसेना भवन, राज ठाकरे यांचे निवासस्थान ‘शिवतीर्थ’ याच परिसरात येते. जागा वाटपाच्या अंतिम सूत्रानुसार ठाकरे गटाला या भागात चार जागा मिळाल्या असून, दोन जागांवर मनसे उमेदवार उभे राहणार असल्याची माहिती सूत्रांनी दिली आहे. मनसेसाठी वॉर्ड क्रमांक 190 आणि 192 सोडण्यात आल्याचे सांगितले जाते. मात्र, याच दोन वॉर्डांवरून आता नव्या वादाला तोंड फुटण्याची शक्यता आहे.

वॉर्ड क्रमांक 192 युतीतील चर्चेत मनसेकडे देण्यात आला, तर वॉर्ड 194 ठाकरे गटाच्या वाट्याला आला. मात्र, वॉर्ड 192 आपल्यालाच मिळावा, अशी मागणी करत ठाकरे गटातील स्थानिक पदाधिकारी आणि कार्यकर्ते उद्धव ठाकरे यांची भेट घेणार असल्याची माहिती समोर आली आहे. या वॉर्डमधून माजी नगरसेवक प्रकाश पाटणकर हे शिवसैनिकांसह ‘मातोश्री’वर जाणार असल्याचे समजते. दुसरीकडे, याच वॉर्डातून मनसेकडून यशवंत किल्लेदार यांना उमेदवारी मिळण्याची शक्यता वर्तवली जात आहे. त्यामुळे हा वॉर्ड ठाकरे बंधूंसाठी कसोटीचा ठरणार आहे.

याचप्रमाणे माहीम विधानसभेतील वॉर्ड क्रमांक 190 देखील मनसेच्या वाट्याला गेला असला, तरी ठाकरे गटातील राजू पाटणकर यांनी या जागेवर स्वतःसाठी किंवा पत्नींसाठी दावा केल्याची चर्चा सुरू आहे. 2017 च्या महापालिका निवडणुकीत या वॉर्डातून भाजपच्या शीतल गंभीर यांनी केवळ 443 मतांनी विजय मिळवला होता, तर शिवसेनेच्या वैशाली पाटणकर यांना दुसऱ्या क्रमांकावर समाधान मानावे लागले होते. गेल्या काही निवडणुकांमध्ये ठाकरे गटाला या वॉर्डात यश मिळालेले नाही. अशा परिस्थितीत मनसेसाठी सोडलेल्या या जागेवर पुन्हा ठाकरे गटाकडून दावा करण्यात आल्याने युतीतील तणाव वाढण्याची शक्यता आहे. या वॉर्डातून मनसेचे माजी नगरसेवक मनिष चव्हाण यांना उमेदवारी मिळण्याची दाट शक्यता व्यक्त केली जात आहे.

दरम्यान, भाजप-शिंदे गटाच्या महायुतीकडून ठाकरे बंधूंच्या युतीला कडवे आव्हान मिळणार असल्याचे चित्र आहे. त्यामुळे प्रत्येक वॉर्ड आणि प्रत्येक उमेदवार दोन्ही पक्षांसाठी महत्त्वाचा ठरणार आहे. याच पार्श्वभूमीवर ठाकरे गट काही ठिकाणी आपल्या जुन्या आणि अनुभवी शिलेदारांना पुन्हा संधी देण्याच्या तयारीत आहे.

माजी महापौर मिलिंद वैद्य यांना वॉर्ड क्रमांक 182 मधून पुन्हा उमेदवारी मिळण्याची शक्यता आहे. मात्र, त्यांच्या नावाला ठाकरे गटातील काही इच्छुकांकडून विरोध होत असल्याची चर्चा आहे. या वॉर्डातून अभय तामोरे यांच्यासह इतरही काही इच्छुक रिंगणात आहेत. तरीही मिलिंद वैद्य यांची या भागावर असलेली पकड आणि विजयाची शक्यता लक्षात घेता त्यांनाच संधी दिली जाण्याची दाट शक्यता वर्तवली जात आहे. मात्र, वाढती इच्छुकांची संख्या आणि अंतर्गत नाराजी यामुळे ‘मातोश्री’समोरील डोकेदुखी अधिक वाढणार असल्याचे राजकीय वर्तुळात बोलले जात आहे.

Image Courtesy:

02 Jan 2026

BMC Elections

BMC Election: ठाकरे बंधूंच्या युतीत ‘१९२’ वर तिढा! निवडणुकीआधीच शिवसेना-मनसेत मतभेद?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates