BMC Election : मुंबई महापालिका निवडणुकीत शरद पवारांचे ११ धडाडीचे उमेदवार मैदानात, संपूर्ण यादी जाहीर

by Webdesk
30 Dec 2025

मुंबई : मुंबई महानगरपालिका निवडणुकीच्या पार्श्वभूमीवर शहरातील राजकीय वातावरण तापले असून घडामोडींना वेग आला आहे. विविध पक्षांमध्ये जागावाटप, युती आणि आघाड्यांबाबत चर्चा अंतिम टप्प्यात पोहोचल्या आहेत. याच पार्श्वभूमीवर राष्ट्रवादी काँग्रेस (शरदचंद्र पवार) पक्षाने ठाकरे बंधूंशी युती केल्याचे स्पष्ट झाले आहे. आगामी मुंबई महापालिका निवडणुकीत राष्ट्रवादी शरद पवार पक्ष हा शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेसह एकत्रितपणे निवडणूक लढवणार आहे.

गेल्या काही दिवसांपासून राष्ट्रवादी काँग्रेस शरद पवार पक्ष मुंबईत नेमकी कोणाबरोबर युती करणार, याबाबत राजकीय वर्तुळात चर्चांना उधाण आले होते. काही काळ काँग्रेससोबत चर्चा सुरू असल्याची माहिती समोर आली होती. मात्र या चर्चांमधून कोणताही ठोस निर्णय होऊ शकला नाही. अखेर ठाकरे बंधूंशी हातमिळवणी करत राष्ट्रवादी शरद पवार पक्षाने आपली भूमिका स्पष्ट केली आहे. या युतीमुळे मुंबईतील राजकारणात मोठा बदल होण्याची शक्यता वर्तवली जात आहे.

ठाकरे बंधूंना शरद पवारांची साथ

शिवसेना ठाकरे गट आणि मनसे यांची युती जाहीर झाल्यानंतर आता शरद पवारांचा राष्ट्रवादी गटही या आघाडीत सहभागी झाल्याने विरोधकांसमोर मजबूत आव्हान उभे राहिले आहे. उद्धव ठाकरे आणि राज ठाकरे एकत्र आल्याने आधीच राजकीय समीकरणे बदलली होती. त्यातच शरद पवारांच्या पक्षाचा पाठिंबा मिळाल्याने ठाकरे बंधूंची आघाडी अधिक भक्कम झाल्याचे मानले जात आहे.

या युतीतून मुंबई महापालिकेतील सत्ताधारी शिवसेना-भाजप आघाडीविरुद्ध थेट लढत होणार आहे. एका बाजूला भाजप आणि शिवसेना युती तर दुसऱ्या बाजूला ठाकरे गट, मनसे आणि राष्ट्रवादी शरद पवार पक्ष अशी स्पष्ट विभागणी दिसून येत आहे. त्यामुळे यंदाची निवडणूक अत्यंत चुरशीची ठरण्याची शक्यता आहे.

राष्ट्रवादी शरद पवार पक्षाला 11 जागा

ठाकरे बंधू आणि राष्ट्रवादी शरद पवार पक्षामधील जागावाटपाचे गणितही अंतिम झाले आहे. या आघाडीत राष्ट्रवादी शरदचंद्र पवार पक्षाला एकूण 11 जागा देण्यात आल्या आहेत. या जागांवर राष्ट्रवादीचे उमेदवार निवडणुकीच्या रिंगणात उतरणार आहेत. पक्षाने या सर्व जागांसाठी उमेदवारांची यादीही जाहीर केली आहे.

राष्ट्रवादी शरद पवार पक्षाचे उमेदवार पुढीलप्रमाणे आहेत :

१) वॉर्ड क्रमांक 43 – श्री. अजित रावराणे,

२) वॉर्ड क्रमांक 140 – श्री. संजय भीमराव कांबळे,

३) वॉर्ड क्रमांक 78 – श्रीमती रदबा जावेद देऊळकर,

४) वॉर्ड क्रमांक 48 – अॅड. गणेश शिंदे,

५) वॉर्ड क्रमांक 170 – श्रीमती रूही मदन खानोलकर,

६) वॉर्ड क्रमांक 51 – श्रीमती आरती सचिन चव्हाण,

७) वॉर्ड क्रमांक 112 – श्रीमती मंजू रविंद्र जायस्वाल,

८) वॉर्ड क्रमांक 224 – श्रीमती सानिया कासिफ शाह,

९) वॉर्ड क्रमांक 165 – श्री. अभिजीत दिलीप कांबळे,

१०) वॉर्ड क्रमांक 107 – श्री. भरत हंसराज दनानी,

११) वॉर्ड क्रमांक 211 – श्री. सुफियान अन्सारी

यांना उमेदवारी देण्यात आली आहे.

उद्धव ठाकरे आणि राज ठाकरे एकत्र आल्यावर जागावाटपावरून मोठा संघर्ष होईल, असे अनेक राजकीय विश्लेषकांचे मत होते. मात्र दोन्ही पक्षांच्या नेत्यांनी सलग बैठका घेत, चर्चा करून आणि सर्व बाबींचा विचार करत जागावाटपाचे अवघड गणित सोडवले. त्यातच आता राष्ट्रवादी शरद पवार पक्षालाही सामावून घेत आघाडीचे स्वरूप अधिक व्यापक करण्यात आले आहे.

या आघाडीनुसार शिवसेना ठाकरे गट सर्वाधिक 163 जागांवर निवडणूक लढवणार आहे. महाराष्ट्र नवनिर्माण सेनेला 53 जागा देण्यात आल्या असून राष्ट्रवादी काँग्रेस शरदचंद्र पवार पक्ष 11 जागांवर आपले उमेदवार उभे करत आहे. या स्पष्ट सूत्रामुळे आघाडीतील संभ्रम दूर झाला असून आता सर्व पक्ष प्रचाराच्या तयारीला लागले आहेत.

एकूणच मुंबई महापालिका निवडणूक यंदा अत्यंत रंगतदार ठरण्याची चिन्हे आहेत. सत्ताधारी शिवसेना-भाजप आघाडी आणि ठाकरे बंधू-मनसे-राष्ट्रवादी शरद पवार आघाडी यांच्यात थेट सामना होणार आहे. या निवडणुकीचा निकाल केवळ मुंबई महापालिकेपुरता मर्यादित न राहता महाराष्ट्राच्या राजकारणावरही परिणाम करणारा ठरू शकतो, असे राजकीय जाणकारांचे मत आहे.

Image Courtesy:

02 Jan 2026

BMC Elections

BMC Election : मुंबई महापालिका निवडणुकीत शरद पवारांचे ११ धडाडीचे उमेदवार मैदानात, संपूर्ण यादी जाहीर

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates