BMC Election: कार्यकर्त्यांना तयारीचे आदेश! तीन तासांत महापालिका निवडणुकीची घोषणा, जिल्हा परिषद–पंचायत समितीचं पुढे काय?

by Webdesk
15 Dec 2025

Source: News 18 Marathi

मुंबई, ठाणे, पुणे यांच्यासह महाराष्ट्रातील तब्बल २९ महानगरपालिकांच्या निवडणुकांचा बिगुल अखेर वाजण्याच्या तयारीत आहे. आजच या निवडणुकांसाठीची आचारसंहिता जाहीर होण्याची दाट शक्यता असून राज्य निवडणूक आयोगाकडून सर्व तयारी जवळपास पूर्ण झाल्याची माहिती आहे. आज सायंकाळी ४ वाजता राज्य निवडणूक आयोगाची महत्त्वाची पत्रकार परिषद होणार असून याच परिषदेत महानगरपालिका निवडणुकांची अधिकृत घोषणा होण्याची शक्यता वर्तवली जात आहे. यासोबतच जिल्हा परिषद आणि पंचायत समितीच्या निवडणुकांबाबतही मोठी घोषणा होऊ शकते, अशी चर्चा राजकीय वर्तुळात रंगली आहे.

राज्य विधिमंडळाचे हिवाळी अधिवेशन १४ डिसेंबर रोजी संपुष्टात आले. त्यानंतर तब्बल सात ते आठ वर्षांपासून प्रलंबित असलेल्या स्थानिक स्वराज्य संस्थांच्या निवडणुकांची घोषणा १५ डिसेंबरनंतर कधीही होऊ शकते, असे संकेत आधीच मिळत होते. या पार्श्वभूमीवर येत्या २४ तासांत निवडणूक कार्यक्रम जाहीर होऊन आचारसंहिता लागू होईल आणि निवडणूक प्रक्रियेला गती येईल, असा अंदाज राजकीय विश्लेषक व्यक्त करत होते. आता तो अंदाज प्रत्यक्षात उतरण्याची चिन्हे दिसू लागली आहेत.

राज्य निवडणूक आयोगाने आज सायंकाळी ४ वाजता मुंबईतील सह्याद्री अतिथीगृह येथे पत्रकार परिषद आयोजित केली आहे. या परिषदेत २९ महानगरपालिकांच्या निवडणुकांची औपचारिक घोषणा होण्याची शक्यता सर्वाधिक आहे. मिळालेल्या माहितीनुसार, या सर्व महानगरपालिकांच्या निवडणुका एकाच टप्प्यात घेण्याचा आयोगाचा विचार आहे. त्यामुळे मुंबई, ठाणे, पुणे, नागपूर, नाशिक, औरंगाबादसारख्या महत्त्वाच्या महापालिकांमध्ये एकाच वेळी मतदान होऊ शकते.

दरम्यान, जिल्हा परिषद आणि पंचायत समितीच्या निवडणुकांबाबत मात्र थोडा वेगळा मार्ग अवलंबला जाण्याची शक्यता आहे. आरक्षणाच्या मुद्द्यामुळे या निवडणुकांमध्ये विलंब होण्याची शक्यता वर्तवली जात आहे. विशेषतः ५० टक्के आरक्षणाचा प्रश्न अद्याप काही जिल्ह्यांमध्ये प्रलंबित असल्याने, जिल्हा परिषद आणि पंचायत समितीच्या निवडणुका दोन टप्प्यांत घेण्याचा पर्याय निवडणूक आयोगाकडून विचाराधीन आहे.

सूत्रांनी दिलेल्या माहितीनुसार, ज्या जिल्हा परिषद आणि पंचायत समित्यांमध्ये ५० टक्क्यांपेक्षा जास्त आरक्षणाचा अडथळा नाही, त्या ठिकाणी पहिल्या टप्प्यात निवडणुका होण्याची शक्यता आहे. उर्वरित जिल्ह्यांमध्ये आरक्षणासंबंधीची प्रक्रिया पूर्ण झाल्यानंतर दुसऱ्या टप्प्यात मतदान घेतले जाऊ शकते. त्यामुळे जिल्हा परिषद निवडणुका थोड्या उशिरा होतील, असे चित्र सध्या स्पष्ट होत आहे.

गेल्या काही दिवसांपासून जिल्हा परिषद निवडणुकांआधीच महानगरपालिकांच्या निवडणुका घेतल्या जातील, अशी चर्चा जोर धरत होती. मात्र, आता परिस्थिती थोडी बदलल्याचे दिसत आहे. राज्य निवडणूक आयोगाने २९ महानगरपालिका आणि सुमारे १२ जिल्हा परिषदांच्या निवडणुका एकाच कालावधीत घेता येतील का, याची प्राथमिक चाचपणी केल्याची माहिती समोर आली आहे. यामुळे ‘डबल बार’ म्हणजेच एकाच वेळेस दोन मोठ्या निवडणुकांचा बिगुल वाजणार का, याबाबत उत्सुकता वाढली आहे.

या निवडणुकांचे महत्त्व लक्षात घेता, सर्वच राजकीय पक्षांनी जोरदार तयारी सुरू केली आहे. सत्ताधारी आणि विरोधक दोघेही संभाव्य निवडणूक घोषणेच्या पार्श्वभूमीवर कार्यकर्त्यांना सज्ज राहण्याचे आदेश देत आहेत. आचारसंहिता लागू होताच प्रचार, उमेदवार निवड आणि जागावाटप यांसारख्या प्रक्रियांना वेग येणार आहे.

एकूणच, आजची राज्य निवडणूक आयोगाची पत्रकार परिषद ही स्थानिक स्वराज्य संस्थांच्या राजकारणात निर्णायक ठरण्याची शक्यता आहे. महानगरपालिका निवडणुकांची घोषणा होणार का, जिल्हा परिषद आणि पंचायत समितीबाबत काय निर्णय घेतला जाणार, हे सर्व चित्र आज सायंकाळी स्पष्ट होणार आहे. त्यामुळे संपूर्ण राज्याचे लक्ष आता निवडणूक आयोगाच्या या घोषणेकडे लागून राहिले आहे.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates