BMC Election Exclusive: शिवसेना भवनाजवळ कुणाला उमेदवारी? ठाकरे बंधूंनी जागावाटपाचा तिढा सोडवला, सेना-मनसे किती जागांवर उतरणार?

by Webdesk
23 Dec 2025

Source: News 18 Marathi

मुंबई महानगरपालिकेच्या निवडणुकीची रणधुमाळी आजपासून अधिकृतपणे सुरू झाली असून, राजकीय वातावरण तापले आहे. मागील अनेक महिन्यांपासून उद्धव ठाकरे आणि राज ठाकरे एकत्र येणार, अशी चर्चा राज्याच्या राजकारणात सुरू होती. अखेर या चर्चांना पूर्णविराम मिळणार असून शिवसेना ठाकरे गट आणि महाराष्ट्र नवनिर्माण सेनेची युती बुधवारी अधिकृतपणे जाहीर होणार असल्याची माहिती समोर आली आहे. मात्र, या युतीच्या आधी मराठीबहुल भागांतील जागा वाटपावरून दोन्ही पक्षांमध्ये तीव्र चर्चा सुरू होती. अखेर हा तिढा सुटल्याची माहिती सूत्रांनी दिली आहे.

विशेषतः शिवसेना भवन असलेल्या दादर-माहीम परिसरातील जागा वाटपावरून ठाकरे गट आणि मनसे यांच्यात जोरदार रस्सीखेच सुरू होती. हा परिसर राजकीयदृष्ट्या अत्यंत महत्त्वाचा मानला जातो. माहीम विधानसभा मतदारसंघातून यापूर्वी मनसे आणि एकसंध शिवसेना या दोन्ही पक्षांचे आमदार निवडून आले आहेत. मात्र, गेल्या वर्षी झालेल्या विधानसभा निवडणुकीत ठाकरे गटाने येथे बाजी मारली होती. मनसेला तिसऱ्या क्रमांकाची मते मिळाली असली, तरी त्यांनी या भागात आपली संघटनात्मक ताकद दाखवून दिली होती.

‘शिवतीर्था’च्या अंगणात कोणाचा उमेदवार?

दादर-माहीम परिसरात शिवसेना आणि मनसे या दोन्ही पक्षांची ताकद तुल्यबळ मानली जाते. त्यामुळेच युतीच्या जागा वाटपाच्या चर्चांमध्ये हा भाग सर्वाधिक कळीचा ठरला होता. शिवसेनेचे मध्यवर्ती कार्यालय असलेले शिवसेना भवन आणि राज ठाकरे यांचे निवासस्थान असलेले शिवतीर्थ हे दोन्ही महत्त्वाचे ठिकाणे याच परिसरात येतात. मराठी अस्मिता आणि राजकीय प्रभाव जपणाऱ्या या भागात अधिकाधिक जागा आपल्या वाट्याला याव्यात, यासाठी दोन्ही पक्षांकडून जोरदार प्रयत्न करण्यात आले होते.

या भागात कोणाचा उमेदवार उभा राहणार, यावरून कार्यकर्त्यांमध्येही उत्सुकता होती. कारण दादर-माहीम परिसर हा केवळ निवडणुकीपुरता नव्हे, तर प्रतीकात्मकदृष्ट्याही अत्यंत महत्त्वाचा मानला जातो. त्यामुळे येथे मिळणाऱ्या जागा या प्रतिष्ठेचा विषय ठरल्या होत्या.

जागा वाटपाचा तिढा अखेर सुटला?

२०१७ साली झालेल्या मुंबई महापालिकेच्या निवडणुकीत दादर-माहीम भागात एकसंध शिवसेनेने स्पष्ट वर्चस्व गाजवले होते. त्या वेळी शिवसेनेने चार जागांवर विजय मिळवला होता. तर, मनसे आणि भाजपला प्रत्येकी एक-एक जागा मिळाली होती. विशेष म्हणजे भाजपने मिळवलेली जागा अत्यल्प मताधिक्याने जिंकली होती.

त्या निवडणुकीत एकसंध शिवसेनेकडून मिलिंद वैद्य, विशाखा राऊत, प्रीती पाटणकर आणि समाधान सरवणकर हे उमेदवार विजयी झाले होते. तर मनसेकडून हर्षला मोरे यांनी बाजी मारली होती आणि भाजपकडून शीतल गंभीर या निवडून आल्या होत्या. या पार्श्वभूमीवर यंदाच्या निवडणुकीत जागा वाटप कसे होणार, याकडे सर्वांचे लक्ष लागले होते.

युतीच्या चर्चांदरम्यान मनसे आणि ठाकरे गट या दोन्ही बाजूंनी आपल्या-आपल्या ताकदीचा जोरदार दावा करण्यात आला. मात्र, अखेर या भागातील जागांवर तोडगा निघाल्याची माहिती सूत्रांनी दिली आहे. उपलब्ध माहितीनुसार, दादर-माहीम परिसरातील एकूण सहा जागांपैकी चार जागा शिवसेना ठाकरे गटाच्या वाट्याला आल्या आहेत. उर्वरित दोन जागांवर मनसे आपले उमेदवार उभे करणार आहे. सूत्रांच्या माहितीनुसार, मनसेच्या वाट्याला प्रभाग क्रमांक १९० आणि १९२ हे मतदारसंघ आले आहेत. उरलेल्या जागांवर ठाकरे गटाचे उमेदवार निवडणुकीच्या रिंगणात असतील. तसेच प्रभाग क्रमांक १९४ मध्ये ठाकरे गटाकडून एखाद्या नव्या चेहऱ्याला संधी दिली जाऊ शकते, अशी चर्चा राजकीय वर्तुळात सुरू आहे.

एकूणच, ठाकरे बंधूंच्या युतीत सर्वाधिक चर्चेत असलेला जागा वाटपाचा मुद्दा आता मार्गी लागल्याचे स्पष्ट होत आहे. त्यामुळे आता दोन्ही पक्षांचे लक्ष थेट निवडणुकीच्या प्रचारावर केंद्रित होणार असून, आगामी मुंबई महापालिका निवडणूक अधिक रंगतदार होण्याची चिन्हे दिसत आहेत.

Image Courtesy:

02 Jan 2026

BMC Elections

BMC Election Exclusive: शिवसेना भवनाजवळ कुणाला उमेदवारी? ठाकरे बंधूंनी जागावाटपाचा तिढा सोडवला, सेना-मनसे किती जागांवर उतरणार?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates