BMC Election: महायुतीच्या बैठकीआधीच मोठा ट्विस्ट, भाजप 150 जागांवर अडून बसलं, शिंदे गटाला किती जागांची ऑफर?

by Webdesk
16 Dec 2025

मुंबई महापालिका निवडणुकांची अधिकृत घोषणा होताच राज्यातील राजकारणाला वेग आला आहे. विशेषतः मुंबई महानगरपालिकेच्या निवडणुकीकडे सर्वच पक्षांचे लक्ष केंद्रीत झाले असून महायुतीतील घटक पक्षांमध्ये हालचालींना सुरुवात झाली आहे. याच पार्श्वभूमीवर आज भाजप आणि शिवसेना (शिंदे गट) यांची महत्त्वाची बैठक पार पडणार आहे. मात्र या बैठकीपूर्वीच राजकीय वर्तुळात मोठी चर्चा सुरू झाली असून, पहिल्याच बैठकीत दोन्ही पक्षांमध्ये तीव्र मतभेद होण्याची शक्यता वर्तवली जात आहे.

मुंबई महानगरपालिका निवडणुकीच्या पार्श्वभूमीवर भाजप आणि शिंदे गटाची ही पहिली स्वतंत्र बैठक असणार आहे. महायुतीतील प्रमुख घटक म्हणून दोन्ही पक्षांमध्ये जागावाटप, उमेदवारांची निवड तसेच निवडणूक प्रचाराची दिशा यावर प्राथमिक चर्चा होणार असल्याची माहिती विश्वसनीय सूत्रांकडून मिळाली आहे. ‘न्यूज १८ लोकमत’ला मिळालेल्या माहितीनुसार, या बैठकीत मुंबई महापालिकेसाठीचा प्राथमिक आराखडा तयार केला जाणार आहे.

आज होणाऱ्या बैठकीत शिंदे गटाकडून उद्योगमंत्री उदय सामंत (डॉक्टरांनी परवानगी दिल्यास), माजी खासदार राहुल शेवाळे, आमदार प्रकाश सुर्वे, शीतल म्हात्रे आणि सिद्धेश कदम सहभागी होणार आहेत. तर भाजपकडून मुंबई भाजप अध्यक्ष आशिष शेलार, आमदार अमित साटम आणि विधान परिषदेचे सदस्य प्रवीण दरेकर उपस्थित राहणार आहेत. दोन्ही बाजूंनी वरिष्ठ नेत्यांची उपस्थिती असल्याने ही बैठक अत्यंत महत्त्वाची मानली जात आहे.

दरम्यान, या बैठकीपूर्वीच जागावाटपावरून महायुतीत तणाव निर्माण झाल्याचे संकेत मिळत आहेत. सूत्रांच्या माहितीनुसार, भाजप मुंबई महापालिका निवडणुकीत सुमारे १५० पेक्षा अधिक जागांवर स्वबळावर निवडणूक लढवण्यावर ठाम आहे. भाजपचा हा आग्रह शिंदे गटासाठी अडचणीचा ठरू शकतो. दुसरीकडे, शिवसेना शिंदे गटासाठी ७० ते ८० जागा सोडण्यास भाजप तयार असल्याची चर्चा आहे. याशिवाय, भाजपच्या वाट्यातून रिपब्लिकन पार्टी ऑफ इंडिया (आरपीआय) साठी २ ते ३ जागा देण्याचाही प्रस्ताव चर्चेत असल्याची माहिती समोर आली आहे.

या आकड्यांवरूनच दोन्ही पक्षांमध्ये जोरदार रस्सीखेच होण्याची शक्यता व्यक्त केली जात आहे. विशेषतः शिंदे गटाकडून अधिक जागांची मागणी होण्याची शक्यता असून, भाजप मात्र आपल्या भूमिकेवर ठाम राहण्याच्या तयारीत असल्याचे संकेत मिळत आहेत. आजच्या बैठकीत आणखी एक महत्त्वाचा मुद्दा चर्चेला येण्याची शक्यता आहे. २०१७ साली झालेल्या मुंबई महापालिका निवडणुकीत तत्कालीन शिवसेनेतून निवडून आलेले आणि नंतर शिंदे गटात सहभागी झालेले माजी नगरसेवक यांच्याबाबत निर्णय घेतला जाण्याची शक्यता आहे. या माजी नगरसेवकांना पुन्हा उमेदवारी द्यायची की नाही, यावर दोन्ही पक्षांमध्ये मतभेद असल्याचे सूत्रांचे म्हणणे आहे.

विशेष म्हणजे, सध्या ठाकरे गटाकडे असलेल्या माजी नगरसेवकांच्या जागा शिंदे गटाला देण्यास भाजप फारसा उत्सुक नसल्याची माहिती पुढे आली आहे. याच मुद्द्यावरून बैठकीदरम्यान दोन्ही पक्षांमध्ये तीव्र चर्चा किंवा वाद होण्याची शक्यता वर्तवली जात आहे. त्यामुळे ही बैठक केवळ औपचारिक न राहता निर्णायक ठरण्याची शक्यता आहे.

दरम्यान, मुस्लिम बहुल प्रभागांबाबतही बैठकीत स्वतंत्रपणे चर्चा होण्याची शक्यता आहे. ज्या प्रभागांमध्ये शिंदे गटाकडे प्रभावी आणि तगडे उमेदवार आहेत, त्या ठिकाणी जागा देण्याबाबत लवचिक भूमिका ठेवण्यावर दोन्ही पक्षांमध्ये प्राथमिक सहमती होऊ शकते. स्थानिक समीकरणे, उमेदवारांची ताकद आणि मतदारांचा कल पाहून अशा प्रभागांमध्ये निर्णय घेतला जाऊ शकतो, अशी माहिती सूत्रांनी दिली आहे.

या बैठकीत केवळ जागावाटपच नव्हे, तर मुंबई महापालिका निवडणुकीसाठी महायुतीच्या एकत्रित प्रचाराची दिशा देखील ठरवली जाणार आहे. प्रचाराचा आराखडा, जबाबदाऱ्यांचे वाटप, समन्वय यंत्रणा आणि नेतृत्वाची भूमिका यावर सविस्तर चर्चा होण्याची शक्यता आहे.

आगामी काही दिवसांत महायुतीतील जागावाटपाचा अंतिम फॉर्म्युला समोर येणार का, याकडे मुंबईच्या राजकीय वर्तुळाचे लक्ष लागले आहे. आजची बैठक महायुतीसाठी कितपत निर्णायक ठरणार, आणि मतभेद मिटवून एकमत होणार का, हे पाहणे औत्सुक्याचे ठरणार आहे.

Image Courtesy:

02 Jan 2026

BMC Elections

BMC Election: महायुतीच्या बैठकीआधीच मोठा ट्विस्ट, भाजप 150 जागांवर अडून बसलं, शिंदे गटाला किती जागांची ऑफर?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates