BMC Election 2026: मुंबईतील जागावाटपावर भाजप–शिंदे गटात तणाव वाढला; शिंदेंची 84 जागांची ठाम मागणी, आतल्या घडामोडी काय?

by Webdesk
20 Dec 2025

मुंबई महापालिका निवडणूक 2025 (BMC Election 2025) जवळ येत असताना सत्ताधारी महायुतीतील प्रमुख घटक असलेल्या भाजप आणि शिवसेना शिंदे गटामध्ये जागावाटपावरून तीव्र मतभेद समोर येत आहेत. मुंबईसारख्या आर्थिक राजधानीवर वर्चस्व मिळवण्यासाठी दोन्ही पक्षांनी जोरदार तयारी सुरू केली असून, त्याच पार्श्वभूमीवर जागांची संख्या हा मोठा वादाचा मुद्दा ठरला आहे.

18 डिसेंबर रोजी पार पडलेल्या भाजप आणि शिवसेना शिंदे गटाच्या महत्त्वाच्या बैठकीत जागावाटपावरून रस्सीखेच स्पष्टपणे पाहायला मिळाली. या बैठकीत भाजपाने तब्बल 102 जागांवर दावा ठोकला, तर मुख्यमंत्री एकनाथ शिंदे यांच्या नेतृत्वाखालील शिवसेनेने 109 जागांची मागणी केली. त्यामुळे दोन्ही पक्षांमध्ये तडजोडीऐवजी दावे-प्रतिदावे वाढताना दिसत आहेत.

भाजपाने 2017 च्या मुंबई महापालिका निवडणुकीत जिंकलेल्या आपल्या सर्व 82 जागा पुन्हा तशाच ठेवण्याची भूमिका घेतली आहे. याशिवाय ज्या प्रभागांमध्ये भाजप दुसऱ्या क्रमांकावर होता, त्या जागांवरही पक्षाने दावा केल्याची माहिती सूत्रांकडून समोर आली आहे. दुसरीकडे, शिंदे गटाने देखील आक्रमक पवित्रा घेतला असून 2017 मध्ये शिवसेनेने जिंकलेल्या 84 जागा कोणत्याही परिस्थितीत सोडणार नसल्याचे स्पष्ट केले आहे. त्याच आधारावर शिवसेना शिंदे गटाने एकूण 109 जागांवर आपला हक्क सांगितला आहे.

एकूण 227 पैकी 211 जागांचा विचार केला असता, सध्या 150 जागांवर दोन्ही पक्षांमध्ये प्राथमिक सहमती झाल्याचे सांगण्यात येते. या सहमतीनुसार 102 जागा भाजपाच्या वाट्याला, तर उर्वरित जागा शिवसेना शिंदे गटाला मिळण्याची शक्यता आहे. मात्र, उर्वरित 77 जागांवर अजूनही तोडगा निघालेला नाही. या जागांवर दोन्ही पक्ष आपापले दावे कायम ठेवून आहेत.

शिवसेना शिंदे गटाचा आग्रह आहे की 2017 च्या निकालालाच जागावाटपाचा मुख्य आधार मानावा. मात्र भाजपाने ही भूमिका मान्य करण्यास नकार दिला आहे. भाजपाचे म्हणणे आहे की गेल्या काही वर्षांत अनेक प्रभागांमधील राजकीय परिस्थिती पूर्णपणे बदलली आहे. त्यामुळे केवळ जुन्या निकालांवर आधारित निर्णय घेणे योग्य ठरणार नाही, अशी भूमिका भाजपाकडून मांडण्यात येत आहे. यामुळेच चर्चेच्या फेऱ्या वाढत असून अंतिम निर्णय रखडलेला आहे.

दरम्यान, मुंबईसह राज्यातील सर्व महानगरपालिकांसाठी 15 जानेवारी 2026 रोजी मतदान होणार आहे, तर दुसऱ्या दिवशी म्हणजेच 16 जानेवारी 2026 रोजी मतमोजणी पार पडणार आहे. याच पार्श्वभूमीवर मुंबई महापालिकेने अंतिम मतदार यादी आणि मतदारांची आकडेवारी जाहीर केली आहे.

या आकडेवारीनुसार मुंबईत एकूण 1 कोटी 3 लाख मतदार आहेत. यापैकी सुमारे 53 टक्के पुरुष मतदार असून 47 टक्के महिला मतदार आहेत. मतदारसंख्येच्या दृष्टीने चांदिवली परिसरातील प्रभाग सर्वात पुढे असून, सायन कोळीवाडा परिसरातील प्रभागात सर्वात कमी मतदार आहेत. विशेष म्हणजे, चांदिवलीतील प्रभाग क्रमांक 164 मध्ये सर्वाधिक मतदार नोंदले गेले आहेत, तर सायन कोळीवाडामधील प्रभाग क्रमांक 176 मध्ये सर्वात कमी मतदारसंख्या आहे. महिला मतदारांच्या बाबतीत बोरिवलीतील प्रभाग क्रमांक 15 आघाडीवर आहे.

मुंबई महापालिका निवडणूक 2026 साठी जाहीर करण्यात आलेल्या कार्यक्रमानुसार 23 डिसेंबर ते 30 डिसेंबर दरम्यान उमेदवारी अर्ज दाखल करता येणार आहेत. 31 डिसेंबर रोजी अर्जांची छाननी होईल, तर 2 जानेवारी 2026 पर्यंत उमेदवारांना अर्ज मागे घेण्याची संधी असेल. अंतिम उमेदवार यादी आणि निवडणूक चिन्हे 3 जानेवारीला जाहीर केली जातील. मतदान 15 जानेवारीला होणार असून, निकाल 16 जानेवारीला स्पष्ट होतील.

2017 च्या मुंबई महापालिका निवडणुकीतील पक्षीय बलाबल पाहिले तर एकूण 227 नगरसेवकांपैकी शिवसेनेचे 84, भाजपाचे 82, काँग्रेसचे 31, राष्ट्रवादी काँग्रेसचे 9, मनसेचे 7, समाजवादी पक्षाचे 6, एमआयएमचे 2 आणि 5 अपक्ष नगरसेवक निवडून आले होते. याच पार्श्वभूमीवर 2025-26 च्या निवडणुकीत कोण बाजी मारणार, याकडे सर्वांचे लक्ष लागले आहे.

Image Courtesy:

02 Jan 2026

BMC Elections

BMC Election 2026: मुंबईतील जागावाटपावर भाजप–शिंदे गटात तणाव वाढला; शिंदेंची 84 जागांची ठाम मागणी, आतल्या घडामोडी काय?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates