BMC Election 2026 : मुंबईत भाजपचा पहिला उमेदवार निश्चित, यादी जाहीर होण्यापूर्वीच दणक्यात अर्ज भरण्याची तयारी

by Webdesk
28 Dec 2025

मुंबई महापालिका निवडणुकीच्या पार्श्वभूमीवर महायुतीतील जागावाटपाबाबतचे चित्र जवळपास स्पष्ट झाले आहे. काँग्रेसबाह्य महायुतीतील बहुतांश जागांचे वाटप अंतिम टप्प्यात असून, सध्या भाजप आणि उपमुख्यमंत्री एकनाथ शिंदे यांच्या नेतृत्वाखालील शिवसेनेची अधिकृत उमेदवार यादी जाहीर होणे बाकी आहे. मात्र, या यादीची प्रतिक्षा सुरू असतानाच मुंबईत भाजपचा पहिला उमेदवार जवळपास निश्चित झाल्याची चर्चा राजकीय वर्तुळात रंगू लागली आहे.

विशेष म्हणजे भाजपकडून अद्याप मुंबईसाठी पहिली अधिकृत उमेदवार यादी जाहीर झालेली नसताना, एका उमेदवाराने थेट अर्ज भरण्याची घोषणा केल्याने चर्चांना वेग आला आहे. त्यामुळे भाजपचा पहिला उमेदवार नेमका कोण, याबाबत नागरिकांमध्ये तसेच राजकीय कार्यकर्त्यांमध्ये उत्सुकता वाढली आहे.

भाजपचा पहिला उमेदवार म्हणून तेजस्वी घोसाळकर यांचे नाव पुढे येत आहे. नुकतेच त्यांनी शिवसेना ठाकरे गटातून बाहेर पडत भाजपमध्ये प्रवेश केला होता. त्यांच्या पक्षप्रवेशानंतर लगेचच दहिसर परिसरातून त्यांना भाजपकडून उमेदवारी दिली जाणार, अशी जोरदार चर्चा सुरू होती. अखेर ती चर्चा खरी ठरत असल्याचे चित्र सध्या दिसून येत आहे.

तेजस्वी घोसाळकर यांनी दहिसर येथील वॉर्ड क्रमांक २ मधून उमेदवारी अर्ज भरणार असल्याची माहिती थेट सोशल मीडियावरून दिली आहे. त्यांनी ‘एक्स’ (पूर्वीचे ट्विटर) या सोशल मीडिया प्लॅटफॉर्मवर पोस्ट करत उद्या सकाळी १० वाजता उमेदवारी अर्ज दाखल करणार असल्याचे जाहीर केले आहे. या पोस्टनुसार, अर्ज भरण्याच्या निमित्ताने गावदेवी मंदिर ते रुस्तमजी स्कूलपर्यंत भव्य रॅलीचे आयोजन करण्यात येणार आहे. या रॅलीत नागरिकांनी आणि समर्थकांनी मोठ्या संख्येने सहभागी व्हावे, असे आवाहनही त्यांनी केले आहे.

दरम्यान, सूत्रांकडून मिळालेल्या माहितीनुसार भाजपकडून आणखी तीन उमेदवारांची नावेही जवळपास निश्चित झाली असून, त्यांना अर्ज भरण्याच्या सूचना देण्यात आल्याचे समजते. अधिकृत यादी जाहीर न करता, पक्षाकडून उमेदवारांना तयारीला लागण्याचे संकेत दिले जात असल्याने अनेक इच्छुक उमेदवार सोशल मीडियावरून आपल्या अर्ज भरण्याबाबत माहिती देत आहेत.

तेजस्वी घोसाळकर या शिवसेना ठाकरे गटाचे दिवंगत नेते विनोद घोसाळकर यांच्या सून आहेत. भाजपमध्ये प्रवेश करताना त्यांनी हा निर्णय अत्यंत भावनिक आणि कठीण असल्याचे सांगितले होते. भाजपचे मुंबई अध्यक्ष आमदार अमित साटम आणि विधान परिषदेचे आमदार प्रवीण दरेकर यांच्या उपस्थितीत त्यांनी भाजपमध्ये प्रवेश केला होता.

पक्षप्रवेशावेळी बोलताना तेजस्वी घोसाळकर म्हणाल्या होत्या की, “ज्यांनी मला राजकीय ओळख दिली, त्या पक्षापासून आणि कुटुंबापासून दूर जाणे सोपे नाही. मनात अनेक भावना आहेत. मात्र, माझ्या प्रभागातील विकासकामे आणि नागरिकांच्या हितासाठी हा निर्णय घेतला आहे.”

मुख्यमंत्री देवेंद्र फडणवीस यांच्या नेतृत्वाखाली आपल्या प्रभागातील रखडलेली विकासकामे पूर्ण होतील, तसेच अभिषेक घोसाळकर हत्या प्रकरणातील सीबीआय तपासाला गती मिळेल आणि न्याय मिळेल, अशी अपेक्षाही त्यांनी व्यक्त केली होती.

मुंबई महापालिका निवडणुकीसाठी आरक्षण जाहीर झाल्यानंतर घोसाळकर यांचा प्रभाग आरक्षित झाल्याने त्यांनी नाराजी व्यक्त केली होती. मात्र, पक्षाचे काम सुरूच ठेवणार असल्याचे त्यांनी स्पष्ट केले होते. त्यानंतर काही दिवसांतच त्यांच्या पक्षांतराच्या चर्चांना उधाण आले आणि अखेर सोशल मीडियावरून त्यांनी ठाकरे गटाचा राजीनामा दिल्याची माहिती जाहीर केली.

आता भाजपकडून अधिकृत यादी कधी जाहीर होते आणि तेजस्वी घोसाळकर यांच्या नावावर शिक्कामोर्तब होते का, याकडे संपूर्ण मुंबईचे लक्ष लागले आहे. आगामी काही तासांत भाजपकडून होणाऱ्या हालचालींमुळे मुंबई महापालिका निवडणुकीचे राजकीय चित्र अधिक स्पष्ट होण्याची शक्यता आहे.

Image Courtesy:

02 Jan 2026

BMC Elections

BMC Election 2026 : मुंबईत भाजपचा पहिला उमेदवार निश्चित, यादी जाहीर होण्यापूर्वीच दणक्यात अर्ज भरण्याची तयारी

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates