BMC Election 2026: मुंबई महापालिका निवडणुकीसाठी अर्जविक्रीला सुरुवात; पहिल्याच दिवशी उमेदवारांची मोठी गर्दी, प्रत्येक वॉर्डची A ते Z सविस्तर माहिती!

by Webdesk
24 Dec 2025

Source: ABP Maza

मुंबई : बृहन्मुंबई महानगरपालिका सार्वत्रिक निवडणूक 2025-26 च्या पार्श्वभूमीवर निवडणूक प्रक्रियेला अधिकृत सुरुवात झाली आहे. मंगळवार, दिनांक 23 डिसेंबर 2025 पासून मुंबई महापालिकेच्या निवडणुकीसाठी नामनिर्देशन अर्जांचे वितरण सुरू करण्यात आले आहे. पहिल्याच दिवशी उमेदवार आणि इच्छुकांनी मोठ्या संख्येने अर्ज उचलले असून, तब्बल 4 हजार 165 नामनिर्देशन अर्जांचे वितरण करण्यात आले आहे. मात्र, विशेष बाब म्हणजे पहिल्या दिवशी एकही नामनिर्देशन अर्ज दाखल करण्यात आलेला नाही.

मुंबईतील एकूण 23 निवडणूक निर्णय अधिकारी कार्यालयांमधून कार्यालयीन वेळेत नामनिर्देशन अर्जांचे वितरण करण्यात आले. निवडणूक प्रक्रियेच्या सुरुवातीच्या टप्प्यात उमेदवारांकडून अर्ज घेण्यास उत्स्फूर्त प्रतिसाद मिळाल्याचे चित्र दिसून येत आहे. मात्र अर्ज दाखल करण्याबाबत उमेदवारांनी अद्याप प्रतीक्षा करण्याची भूमिका घेतल्याचे दिसते.

विभागनिहाय अर्ज वितरणाची आकडेवारी

मुंबई महापालिकेच्या विविध प्रशासकीय विभागांमध्ये अर्ज वितरणात मोठी तफावत पाहायला मिळाली. एम पश्चिम विभागात सर्वाधिक 419 अर्जांचे वितरण झाले आहे. त्यापाठोपाठ एल विभागात 347, के पूर्व विभागात 300, एच पश्चिम विभागात 263, एस विभागात 240 अर्ज वितरित करण्यात आले.

इतर विभागांची आकडेवारी पुढीलप्रमाणे आहे –

ए विभागातून 18, बी विभागातून 25, सी विभागातून 46, डी विभागातून 52 अर्ज वितरित झाले. ई विभागात 225, एफ उत्तर विभागात 200, एफ दक्षिण विभागात 107, जी उत्तर विभागात 185, तर जी दक्षिण विभागात 118 अर्जांचे वितरण झाले आहे. एम पूर्व विभागात 228, एन विभागात 156, टी विभागात 116 अर्ज देण्यात आले.

पी विभागातील दक्षिण आणि पूर्व भागात प्रत्येकी 183 अर्जांचे वितरण झाले असून, पी उत्तर विभागात 92 अर्ज वितरित झाले आहेत. आर दक्षिण विभागात 164, आर मध्य विभागात 80, तर आर उत्तर विभागात 76 अर्ज देण्यात आले आहेत. अशा प्रकारे सर्व विभागांचा मिळून एकूण आकडा 4,165 वर पोहोचला आहे.

मुंबई महापालिका निवडणुकीचा संपूर्ण कार्यक्रम जाहीर

निवडणूक आयोगाने मुंबई महापालिका निवडणुकीचा सविस्तर कार्यक्रम जाहीर केला आहे. त्यानुसार,

नामनिर्देशन अर्ज दाखल करण्याची मुदत : 23 डिसेंबर ते 30 डिसेंबर 2025
नामनिर्देशन अर्जांची छाननी : 31 डिसेंबर 2025
उमेदवारी मागे घेण्याची अंतिम तारीख : 2 जानेवारी 2026
अंतिम उमेदवार यादी व निवडणूक चिन्ह वाटप : 3 जानेवारी 2026
मतदान प्रक्रिया : 15 जानेवारी 2026
मतमोजणी व निकाल जाहीर : 16 जानेवारी 2026
मुंबईसह राज्यातील इतर महापालिकांमध्येही 15 जानेवारी 2026 रोजी एकाच दिवशी मतदान होणार असून, दुसऱ्या दिवशी निकाल जाहीर केले जाणार आहेत.

मुंबईतील मतदारसंख्या 1 कोटी 3 लाखांवर

मुंबई महापालिकेने अंतिम मतदार यादी जाहीर केली असून, शहरात एकूण 1 कोटी 3 लाख मतदार नोंदणीकृत आहेत. यामध्ये सुमारे 53 टक्के पुरुष मतदार, तर 47 टक्के महिला मतदार आहेत. मतदारसंख्येच्या दृष्टीने चांदिवली परिसरातील प्रभाग सर्वात मोठा ठरला आहे.

चांदिवली येथील प्रभाग क्रमांक 164 मध्ये सर्वाधिक मतदार असून, सायन कोळीवाडा परिसरातील प्रभाग क्रमांक 176 मध्ये सर्वात कमी मतदार असल्याची माहिती समोर आली आहे. तसेच, महिला मतदारांच्या संख्येच्या बाबतीत बोरिवलीतील प्रभाग क्रमांक 15 अव्वल ठरला आहे.

निवडणूक वातावरण तापण्यास सुरुवात

नामनिर्देशन अर्जांचे मोठ्या प्रमाणावर वितरण झाल्यामुळे येत्या काही दिवसांत उमेदवारांकडून अर्ज दाखल होण्यास वेग येण्याची शक्यता आहे. राजकीय पक्षांसह अपक्ष उमेदवारांचीही हालचाल वाढत असून, मुंबई महापालिका निवडणुकीच्या रणधुमाळीला सुरुवात झाल्याचे स्पष्ट संकेत मिळत आहेत.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates