BMC Election 2026 : महायुतीत 200 जागांवर सहमती, 27 वॉर्ड अजून प्रलंबित, बैठकीत नेमकं काय ठरलं?

by Webdesk
27 Dec 2025

मुंबई महानगरपालिका निवडणुकीसाठी महायुतीतील जागावाटपाबाबत सुरू असलेली चर्चांची मालिका अखेर निर्णायक टप्प्यावर पोहोचली आहे. दादर येथील रंगशारदा नाट्यगृहात भारतीय जनता पक्ष आणि एकनाथ शिंदे यांच्या नेतृत्वाखालील शिवसेना यांच्यात झालेली महत्त्वाची बैठक संपन्न झाली असून, या बैठकीत 227 पैकी तब्बल 200 जागांवर दोन्ही पक्षांमध्ये एकमत झाल्याची माहिती समोर आली आहे. उर्वरित 27 जागांवर विरोधी पक्षांकडून कोणते उमेदवार उतरवले जातील, याचा अंदाज घेतल्यानंतरच महायुती आपले उमेदवार निश्चित करणार असल्याचे स्पष्ट करण्यात आले आहे.

बैठकीनंतर प्रसारमाध्यमांशी बोलताना भाजपचे मुंबई अध्यक्ष अमित साटम यांनी सांगितले की, जागावाटपाबाबत कोणताही तिढा शिल्लक राहिलेला नाही. “227 पैकी सर्व जागांबाबत चर्चा पूर्ण झाली आहे. 200 जागांवर स्पष्ट सहमती झाली असून उर्वरित 27 जागांवर देखील आमचे नियोजन ठरले आहे. मात्र, त्या ठिकाणी विरोधक कोणाला उमेदवारी देतात, यानुसार अंतिम निर्णय घेतला जाईल,” असे साटम यांनी नमूद केले.

या बैठकीत सहभागी असलेले शिवसेना नेते आणि खासदार राहुल शेवाळे यांनीही जागावाटप जवळपास अंतिम टप्प्यात आल्याचे स्पष्ट केले. ते म्हणाले, “महायुतीतील जागावाटपावर सखोल चर्चा झाली असून, केवळ दोन-तीन मुद्द्यांवर समन्वय साधायचा आहे. उर्वरित सर्व बाबी स्पष्ट आहेत. यासंदर्भातील अंतिम घोषणा मुख्यमंत्री आणि उपमुख्यमंत्री करतील.”

राहुल शेवाळे यांनी पुढे सांगितले की, ज्या काही जागांवर चर्चा प्रलंबित होती, त्या सर्व बाबींचा सविस्तर अहवाल मुख्यमंत्री आणि उपमुख्यमंत्र्यांना दिला जाणार आहे. त्यानंतर एकनाथ शिंदे मुख्यमंत्री देवेंद्र फडणवीस यांच्याशी चर्चा करतील आणि येत्या एक-दोन दिवसांत अधिकृत घोषणा होण्याची शक्यता आहे.

दरम्यान, अद्याप कोणत्याही राजकीय आघाडीने सार्वजनिकपणे किती जागांवर कोणता पक्ष निवडणूक लढवणार, याची घोषणा केलेली नाही, याकडेही शेवाळे यांनी लक्ष वेधले. “दोन दिवसांपूर्वी ठाकरे गट आणि मनसे यांची युती जाहीर झाली असली, तरी त्यांनी देखील जागावाटपाची अधिकृत माहिती दिलेली नाही. त्यामुळे योग्य वेळ आल्यावरच आम्हीही आमची यादी जाहीर करू. आधीच आकडे उघड करणे हे राजकीयदृष्ट्या योग्य नसते,” असे त्यांनी स्पष्ट केले.

महायुतीच्या अंतर्गत समन्वयाबाबत बोलताना राहुल शेवाळे म्हणाले की, “महायुती ही एक कुटुंबासारखी आहे. येथे मोठा भाऊ-छोटा भाऊ असा कोणताही भेद नाही. आम्ही सर्वजण एकत्रितपणे, परिवार म्हणून ही निवडणूक लढवत आहोत.” त्यांनी विश्वास व्यक्त केला की, आगामी महापालिका निवडणुकीत महायुतीचे दीडशेहून अधिक उमेदवार विजयी होतील आणि मुंबईला मराठी महापौर मिळेल.

या बैठकीमुळे गेल्या काही दिवसांपासून सुरू असलेल्या जागावाटपाच्या चर्चांना पूर्णविराम मिळाल्याचे चित्र आहे. महायुतीच्या रणनीतीनुसार, बहुसंख्य जागांवर थेट उमेदवार निश्चित करून उर्वरित जागांवर विरोधकांच्या हालचालींवर नजर ठेवण्याचे धोरण स्वीकारण्यात आले आहे. त्यामुळे आगामी काळात उमेदवारी जाहीर झाल्यानंतर मुंबईतील राजकीय समीकरणे अधिक स्पष्ट होतील, अशी अपेक्षा व्यक्त केली जात आहे.

Image Courtesy:

02 Jan 2026

BMC Elections

BMC Election 2026 : महायुतीत 200 जागांवर सहमती, 27 वॉर्ड अजून प्रलंबित, बैठकीत नेमकं काय ठरलं?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates