BMC Election 2025: मुंबईत मराठी उमेदवारांचा दबदबा, भाजप स्वबळावर मैदानात उतरण्याच्या तयारीत!

by Webdesk
10 Nov 2025

मुंबई : राज्यात स्थानिक स्वराज्य संस्थांच्या निवडणुकांचा बिगुल वाजल्यानंतर राजकीय वातावरण तापले आहे. या निवडणुकांनंतर लगेच येणाऱ्या महानगरपालिका आणि नगरपालिका निवडणुकांसाठी सर्व पक्ष रणसज्ज झाले आहेत. आपल्या पक्षाचे बळ वाढवायचे की आघाडीतील मित्रधर्म जपायचा, या द्विधा मनःस्थितीत सत्ताधारी आणि विरोधक दोघेही सापडले आहेत. मात्र, जिथे फायदा तिथे युती आणि जिथे तोटा तिथे तोडणी — अशीच भूमिका दोन्ही प्रमुख आघाड्यांतील पक्षांनी घेतल्याचे स्पष्ट दिसत आहे.

दिल्लीपासून राज्यातील गल्ल्यापर्यंत सत्तेचा घोडा दौडवण्यासाठी महायुतीने जोरदार तयारी केली आहे. तर, महाविकास आघाडीचे नेते स्थानिक पातळीवर तरी आपले अस्तित्व टिकवण्यासाठी प्रयत्नशील आहेत. मुंबई, ठाणे, कल्याण-डोंबिवली आणि नवी मुंबईसारख्या महत्त्वाच्या महापालिकांमध्ये सत्ता आपल्या पक्षाकडे यावी, यासाठी प्रत्येक पक्ष रणनीती आखत आहे. कुठे युती करायची आणि कुठे स्वबळावर लढायचे, यावरून महायुतीत मतभेद आहेत, तर महाविकास आघाडीतील पक्ष देखील आपला फायदा-तोटा विचारात घेऊन सावध भूमिका घेताना दिसतात.

निवडणूक आयोगाने स्थानिक स्वराज्य संस्थांच्या निवडणुकांचे वेळापत्रक जाहीर करण्यास सुरुवात केली असून, राज्यातील २४६ नगरपालिका आणि ४२ नगरपंचायतींसाठी २ डिसेंबर २०२५ रोजी मतदान होणार आहे. त्यामुळे सर्व पक्षांनी उमेदवार निवड, प्रचारयोजना आणि मतदारसंघनिहाय रणनीती तयार करण्याचे काम हाती घेतले आहे.

नगरपालिका, नगरपंचायती, जिल्हा परिषदा आणि पंचायत समित्या या स्थानिक स्तरावर सत्ता मिळवण्याचे प्रमुख केंद्र असतात. मात्र, मोठ्या अर्थसंकल्पाच्या महानगरपालिका या सर्व राजकीय पक्षांसाठी ‘मिनी विधानसभा’ म्हणूनच ओळखल्या जातात. त्यामुळे मुंबई, ठाणे, पुणे, पिंपरी-चिंचवड आणि कल्याण-डोंबिवलीसारख्या महानगरपालिकांवर नियंत्रण मिळवणे ही प्रत्येक पक्षासाठी प्रतिष्ठेची लढाई ठरली आहे.

महायुतीच्या घटक पक्षांमध्ये आगामी निवडणुकांमध्ये कोण सर्वात मोठा ठरेल याची चढाओढ दिसते, तर महाविकास आघाडीतील पक्ष मात्र आपली राजकीय स्थिती टिकवण्यासाठी जपून पावले टाकत आहेत. दोन्ही आघाड्यांतील नेते आघाडीच्या घोषणांऐवजी पडद्यामागे तडजोडींचे समीकरण तपासत आहेत.

महायुतीकडे राज्यासह केंद्रातही सत्ता असल्याने, भाजप, शिवसेना (शिंदे गट) आणि अजित पवार गटाने ज्या जिल्ह्यांत आपली ताकद ठाम आहे, तिथे निवडणुका स्वबळावर लढवायच्या आणि संघटन वाढवायचे, असा निर्णय घेतला आहे. त्यामुळे काही ठिकाणी युतीबाबत मतभेद निर्माण झाले आहेत. उदाहरणार्थ, ठाण्यात भाजपला सोबत घ्यायचे की नाही, यावर शिवसेनेत दुमत आहे; तर पुण्यात अजित पवार गटाला सोबत घ्यायचे की नाही, यावरून भाजपमध्येच गोंधळ आहे.

मुंबईतील सत्तेसाठी भाजप आणि शिवसेना (शिंदे गट) या दोघांचीही तीव्र इच्छा आहे. त्यामुळे येथील जागावाटपाचा तिढा शेवटच्या क्षणापर्यंत सुटणार नाही, असे संकेत राजकीय सूत्रांकडून दिले जात आहेत. विशेष म्हणजे, मुंबईत बहुसंख्य जागांवर मराठी उमेदवार उभे करून निवडणूक स्वबळावर लढवायची का, याचा गंभीर विचार भाजपच्या नेत्यांकडून सुरू असल्याचे समजते.

दुसरीकडे, महाविकास आघाडीतील घटक पक्षही आपल्या राजकीय गणितांनुसारच निर्णय घेत आहेत. जिथे त्यांना फायदा होईल तिथे आघाडी टिकवायची आणि जिथे तोटा होईल तिथे स्वतंत्र वाटचाल करायची, अशी रणनीती त्यांनी आखली आहे. मुंबई महापालिकेच्या बाबतीत उद्धव ठाकरे यांच्या शिवसेनेने काँग्रेसपेक्षा मनसेकडे अधिक झुकते माप दिल्याचे दिसते. तर विदर्भ आणि मराठवाड्यात स्थानिक काँग्रेस नेत्यांनी नगरपालिका आणि नगरपंचायतींमध्ये शिवसेनेला जास्त जागा देण्यास विरोध दर्शवला आहे.

उद्धव ठाकरे यांच्या नेतृत्वाखालील शिवसेना मुंबई आणि ठाण्यात मनसेसोबत सहकार्य करण्याच्या विचारात असल्याची चर्चा आहे, मात्र काँग्रेसने अद्याप या बाबतीत आपली भूमिका स्पष्ट केलेली नाही. “शिवसेना-मनसे आघाडी झाली तर आपण त्यात सहभागी व्हायचे की नाही?” यावर काँग्रेसच्या नेत्यांमध्ये अजूनही संभ्रम असल्याचे सांगितले जाते.

एकंदरीत पाहता, राज्यातील दोन्ही प्रमुख आघाड्या – महायुती आणि महाविकास आघाडी – या दोन्हींकडून राजकीय गोटे हलवण्याचे प्रयत्न सुरू आहेत. प्रत्येक पक्ष आपली भूमिका ठाम ठेवत असला, तरी युती आणि स्वबळ या दोन पर्यायांपैकी कोणता निवडायचा, याचा अंतिम निर्णय अनेक नेत्यांना अद्याप घ्यायचा आहे. त्यामुळे येणाऱ्या काही आठवड्यांत स्थानिक स्वराज्य निवडणुका राज्याच्या राजकीय चित्रात नवे समीकरण उभे करतील, हे निश्चितच आहे.

Image Courtesy:

02 Jan 2026

BMC Elections

BMC Election 2025: मुंबईत मराठी उमेदवारांचा दबदबा, भाजप स्वबळावर मैदानात उतरण्याच्या तयारीत!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates