BMC Election 2025: मुंबई महानगरपालिकेत तब्बल 12 लाख नवे मतदार; निवडणूक समीकरणात मोठा बदल निश्चित!

by Webdesk
21 Nov 2025

मुंबई महानगरपालिकेच्या निवडणुकीत आरक्षण जाहीर झाल्यानंतर आता आणखी एक महत्त्वाची पायरी पूर्ण झाली आहे. गुरुवारी बृहन्मुंबई महानगरपालिकेने अधिकृत मतदार यादी प्रसिद्ध केली असून यामध्ये २०१७ च्या निवडणुकीच्या तुलनेत तब्बल ११ लाख ८० हजार १९१ नवीन मतदारांची भर झाल्याचे स्पष्ट दिसत आहे. यामुळे येणाऱ्या निवडणुकीत मतदारसंख्येतील वाढ कोणत्या पक्षाच्या बाजूने जाते, यावर सर्वांचे लक्ष केंद्रीत झाले आहे. मात्र, ही स्थिती नेमकी कशी असेल आणि कोणाचा फायदा किंवा तोटा होईल, हे निकालानंतरच स्पष्ट होणार आहे.

ही नव्याने प्रसिद्ध झालेली मतदार यादी १ जुलै २०२५ रोजीच्या विधानसभा मतदान यादीचा आधार घेऊन तयार करण्यात आली आहे. आता पुढील काही दिवसांत प्रभागनिहाय किती मतदारांची भर पडली किंवा घट झाली, याचा तपशील मिळेल. मतदारयादी अंतिम करण्यासाठी नागरिकांना हरकती व सूचना करण्याची संधी देण्यात आली आहे. २७ नोव्हेंबरपर्यंत नागरिक हरकती आणि सूचना दाखल करू शकतात, त्यानंतर त्या तपासून अंतिम आकडे निश्चित केले जातील.

या वेळी प्रकाशित करण्यात आलेल्या मतदार याद्यांनुसार, मुंबईतील सर्व २२७ प्रभागांची यादी महापालिकेच्या अधिकृत वेबसाइटवर उपलब्ध करून देण्यात आली आहे. गेल्या २०१७ च्या निवडणुकीत शहरात एकूण ९१ लाख ६४ हजार १२५ मतदार होते, तर त्या वेळी मतदानाचा टक्का ४४.७३ टक्के इतका नोंदवला गेला होता. आता 2025 साठीच्या अद्ययावत आकडेवारीनुसार मतेदारसंख्या १ कोटी ३ लाख ४४ हजार ३१६ इतकी झाली आहे. यापैकी पुरुष मतदार ५५ लाख १६ हजार ७०८, महिला मतदार ४८ लाख २६ हजार ५०९, तर इतर (ट्रान्सजेंडर) मतदारांची संख्या १,०९९ इतकी आहे.

या सर्व प्रक्रियेमध्ये नागरिकांच्या हरकतींची भूमिका महत्त्वाची आहे. कारण या हरकतींवर निर्णय घेतल्यानंतरच अंतिम मतदार यादी प्रसिद्ध केली जाणार आहे. त्यामुळे अनेक पक्ष आणि सामाजिक संघटना लोकांमध्ये जागरूकता निर्माण करण्याचे काम करत आहेत. मतदारयादीतील चुका, नावाचा अभाव किंवा चुकीची नोंद असल्यास नागरिकांनी तक्रार करण्याचे आवाहन महापालिकेकडून करण्यात आले आहे.

मतदारयादीबाबत महत्त्वाच्या तारखा

२७ नोव्हेंबर — प्रारूप मतदार यादीवर हरकती व सूचना सादर करण्याची अंतिम तारीख

५ डिसेंबर — हरकतींचा निपटारा करून प्रभागनिहाय अंतिम मतदारयादी प्रकाशित होणार

मतदारयादीतील त्रुटी, चूक किंवा इतर तांत्रिक बाबींसाठी नागरिकांनी आपल्या प्रभाग कार्यालयात किंवा सहाय्यक आयुक्तांच्या कार्यालयात जाऊन अर्ज नोंदविण्यास सांगितले आहे. 'प्रारूप यादी'वरील हरकतींचा आढावा घेऊन त्यावर निर्णय घेतल्यानंतरच ५ डिसेंबर रोजी अंतिम मतदार याद्या सार्वजनिक करण्यात येतील.

अर्ज कुठे उपलब्ध?

फोर्ट येथील महापालिका मुख्य इमारतीत असलेल्या निवडणूक विभागातून अर्ज मिळू शकतात.

🔹 हरकती व सूचना दाखल करणारे नमुना A भरतील

🔹 तक्रारदारांनी नमुना B भरायचा आहे

हे अर्ज तिसरा मजला, निवडणूक विभाग, फोर्ट येथे विक्रीसाठी उपलब्ध आहेत.

मतदारयादीत तुमचे नाव कसे शोधाल?

मतदारयादीत आपले नाव तपासण्यासाठी नागरिकांना ऑनलाइन सुविधा देखील उपलब्ध करून देण्यात आली आहे —

✔ बृहन्मुंबई महानगरपालिकेच्या संकेतस्थळावर जा

✔ तेथील तिसरा पर्याय वापरून मतदारयादी डाउनलोड करा

✔ आवश्यक माहिती भरल्यानंतर तुमचे नाव, यादी व प्रभाग याचा तपशील पाहता येईल

तसेच, Voter Helpline अॅपवरही मतदारयादी पाहण्याची सुविधा उपलब्ध आहे.

अॅपमध्ये Maharashtra राज्य निवडा → मोबाईल नंबर टाका → नंतर वैयक्तिक माहिती भरून आपली नोंद शोधा.

Image Courtesy:

02 Jan 2026

BMC Elections

BMC Election 2025: मुंबई महानगरपालिकेत तब्बल 12 लाख नवे मतदार; निवडणूक समीकरणात मोठा बदल निश्चित!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates