BMC Election: ‘अट फेटाळली, शिंदे गटाला धक्का’, मुंबईतील भाजप-शिवसेना बैठकीत काय घडलं?

by Webdesk
19 Dec 2025

मुंबई : मुंबई महानगरपालिका निवडणुकीची अधिकृत घोषणा होताच राजकीय हालचालींना वेग आला असून, महायुतीतील प्रमुख घटक असलेल्या भाजप आणि शिवसेना (शिंदे गट) यांच्यात जागावाटपावरून जोरदार चर्चा सुरू आहे. मुंबई महापालिकेच्या एकूण २२७ जागांपैकी किती जागा कोण लढवणार, यावर दोन्ही पक्षांमध्ये सध्या तीव्र रस्सीखेच सुरू असल्याचे चित्र आहे. भाजपने तब्बल १५० जागा स्वतःकडे ठेवण्याचा निर्धार व्यक्त केला असताना, शिवसेना शिंदे गटाने १२५ जागांवर दावा केल्याने चर्चांचा पेच अधिकच वाढला आहे.

गुरुवारी पार पडलेल्या जागावाटपाच्या चर्चेतील महत्त्वाची इनसाइड माहिती समोर आली असून, या बैठकीत भाजपने शिंदे गटाचा प्रमुख दावा फेटाळल्याचे विश्वसनीय सूत्रांकडून समजते. त्यामुळे महायुतीतील अंतर्गत समन्वयावर प्रश्नचिन्ह निर्माण झाले आहे.

मुंबई महापालिकेच्या निवडणुकीसाठी भाजप आणि शिवसेना (शिंदे गट) यांच्यातील जागावाटपाचा तिढा दिवसेंदिवस अधिक गुंतागुंतीचा होत चालला आहे. २०१७ साली झालेल्या मुंबई महापालिका निवडणुकीत भाजपने जिंकलेल्या सर्व ८२ जागांवर भाजपने ठाम दावा कायम ठेवला आहे. याशिवाय, शिवसेना शिंदे गटाने मागणी केलेल्या ८४ जागा देण्यास भाजपने स्पष्ट नकार दिल्याची माहिती उच्चस्तरीय सूत्रांनी दिली आहे.

गुरुवारी दोन्ही पक्षांच्या वरिष्ठ नेत्यांमध्ये जागावाटपावर चर्चेची दुसरी फेरी पार पडली. पहिल्या बैठकीत भाजपकडून शिवसेना शिंदे गटाला केवळ ५२ जागांची ऑफर देण्यात आली होती. या प्रस्तावाला प्रत्युत्तर देताना शिंदे गटाने आक्रमक भूमिका घेत, मागील निवडणुकीत शिवसेनेने जिंकलेल्या ८४ जागांसह एकूण १२५ जागांची मागणी केली होती.

मात्र, भाजपने या मागणीला स्पष्टपणे अमान्य केले. २०१७ मध्ये उद्धव ठाकरे यांच्या नेतृत्वाखालील शिवसेना आणि सध्या एकनाथ शिंदे यांच्या नेतृत्वाखाली असलेली शिवसेना या दोन्हींची संघटनात्मक ताकद समान नसल्याचा युक्तिवाद भाजपकडून मांडण्यात आला. त्यामुळेच मागील निवडणुकीतील ८४ जागा सध्याच्या शिंदे गटाला देणे शक्य नसल्याचे भाजपने ठामपणे स्पष्ट केले आहे.

याचबरोबर भाजपने आपली भूमिका अधिक कठोर करत, केवळ २०१७ मध्ये जिंकलेल्या ८२ जागाच नव्हे, तर गेल्या आठ वर्षांत ज्या प्रभागांमध्ये पक्षाची ताकद लक्षणीयरीत्या वाढली आहे, तसेच ज्या ठिकाणी इतर पक्षांतील माजी नगरसेवक भाजपमध्ये दाखल झाले आहेत, त्या सर्व जागांवरही दावा केला आहे. भाजपच्या या भूमिकेमुळे शिवसेना शिंदे गटाची कोंडी झाल्याचे दिसून येत आहे.

सूत्रांच्या माहितीनुसार, आतापर्यंतच्या चर्चेत भाजपच्या १०२ जागा आणि शिवसेनेच्या ५५ जागांवर तात्पुरते एकमत झाले असून, एकूण १५७ जागांवर प्राथमिक सहमती झाल्याचे सांगितले जात आहे. मात्र उर्वरित सुमारे ७० जागांवर अजूनही दोन्ही पक्षांमध्ये मतभेद कायम आहेत.

शिवसेना शिंदे गटाला देऊ करण्यात आलेल्या जागांपैकी ५ ते १० जागा या मुस्लीमबहुल प्रभागांमधील किंवा काँग्रेस, समाजवादी पक्ष तसेच अपक्ष उमेदवारांनी जिंकलेल्या जागांमधील असल्याची माहिती सूत्रांनी दिली आहे. या प्रभागांमध्ये भाजप–शिवसेना युतीला आजवर अपेक्षित यश मिळालेले नाही, ही बाबही चर्चेत मांडण्यात आल्याचे समजते. त्यामुळे या जागांवरूनही शिंदे गटात नाराजी असल्याचे चित्र आहे.

दरम्यान, हा संपूर्ण तिढा सोडवण्यासाठी पुढील दोन ते तीन दिवसांत आणखी एक महत्त्वाची बैठक होण्याची शक्यता आहे. या बैठकीत प्रलंबित जागांवर तोडगा काढण्याचा प्रयत्न केला जाणार आहे. तरीही प्रश्न सुटला नाही, तर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात थेट चर्चा होऊन उर्वरित जागांबाबत अंतिम निर्णय घेतला जाईल, अशी माहिती एका ज्येष्ठ नेत्याने दिली आहे. मुंबई महापालिकेच्या निवडणुकीत महायुती एकत्रितपणे लढणार की अंतर्गत मतभेद वाढणार, याकडे आता राज्याच्या राजकीय वर्तुळाचे लक्ष लागले आहे.

Image Courtesy:

02 Jan 2026

BMC Elections

BMC Election: ‘अट फेटाळली, शिंदे गटाला धक्का’, मुंबईतील भाजप-शिवसेना बैठकीत काय घडलं?

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates