BMC Election : शरद पवार गटातील उमेदवार बंडखोर, भाजपसह ठाकरे आणि अजित पवारांनाही फटका

अमित ढमाळ हे राष्ट्रवादी काँग्रेस (शरदचंद्र पवार गट) मधील युवक संघटनेतील एक सक्रिय आणि प्रभावी नेतृत्व मानले जाते. आगामी महापालिका निवडणुकीत ते स्वतः निवडणूक लढवण्यास इच्छुक होते. मात्र महाविकास आघाडीतील जागावाटपाच्या चर्चांमध्ये संबंधित प्रभागाची जागा उद्धव ठाकरे यांच्या शिवसेना (उबाठा) पक्षाकडे गेली. या निर्णयामुळे अमित ढमाळ यांच्यात प्रचंड नाराजी निर्माण झाली होती. पक्षांतर्गत चर्चांमध्ये त्यांना दिलासा मिळेल, अशी अपेक्षा होती, मात्र अखेरपर्यंत त्यांची दखल घेतली गेली नाही.

 

या पार्श्वभूमीवर अमित ढमाळ यांनी थेट बंडाचा झेंडा उभारला असून, त्यांनी प्रभाग क्रमांक १६८ मधून अपक्ष उमेदवारी अर्ज दाखल केला आहे. त्यांच्या या निर्णयामुळे संबंधित प्रभागातील राजकीय गणिते पूर्णपणे बदलण्याची शक्यता आहे. अमित ढमाळ यांची स्थानिक पातळीवर चांगली ओळख असून, युवकांमध्येही त्यांचा प्रभाव आहे. त्यामुळे ते किती मते खेचून नेतात, याकडे सर्वच पक्षांचे लक्ष लागले आहे.

 

प्रभाग क्रमांक १६८ हा आधीच बहुरंगी राजकीय लढतीसाठी चर्चेत होता. या प्रभागातून अजित पवार यांच्या राष्ट्रवादी काँग्रेसकडून नवाब मलिक यांनी त्यांची बहीण डॉ. सहीदा खान यांना उमेदवारी दिली आहे. तर भाजप-शिवसेना युतीकडून भाजपचे उमेदवार आदित्य पानसे निवडणूक रिंगणात उतरले आहेत. याशिवाय उद्धव ठाकरे यांच्या शिवसेना (उबाठा) पक्षाकडून सुधीर खातू यांना उमेदवारी देण्यात आली आहे.