भाजपचा शिंदेंना अनपेक्षित झटका? मोठा नेता कमळाशी जोडणार हात, ग्रामीण राजकारणात उलथापालथ!

by Webdesk
17 Aug 2025

सोलापूर : आगामी स्थानिक स्वराज्य संस्थांच्या निवडणुकांचा बिगुल वाजल्यानंतर राज्यातील सर्वच राजकीय पक्षांनी तयारीला वेग दिला आहे. सत्ताधारी पक्षात विरोधकांच्या तुलनेत मोठ्या प्रमाणात इनकमिंग सुरू असून, भाजप आपल्या संघटनाला अधिक भक्कम करण्यासाठी आक्रमक मोडमध्ये गेल्याचे दिसून येत आहे. याच पार्श्वभूमीवर भाजपच्या हालचालींमुळे शिवसेना शिंदे गटाला मोठा धक्का बसू शकतो, अशी चर्चा राजकीय वर्तुळात रंगली आहे.

शिंदेंच्या विश्वासू घरातूनच फूट?

भाजपच्या एका मोठ्या पावलामुळे उपमुख्यमंत्री एकनाथ शिंदे यांच्या निकटवर्तीयांमध्येच मतभेद उफाळून येत असल्याच्या चर्चांना जोर आला आहे. माजी आरोग्यमंत्री तानाजी सावंत यांचे बंधू आणि शिवसेना शिंदे गटाचे महत्त्वाचे नेते शिवाजी सावंत यांनी नुकतीच पालकमंत्री जयकुमार गोरे यांची सोलापूर येथे भेट घेतल्याची माहिती समोर आली आहे. शनिवारी (16 ऑगस्ट) झालेल्या या भेटीत गोरे आणि सावंत यांच्यात जवळपास पंधरा मिनिटे बंद दाराआड चर्चा झाली. या चर्चेतून सावंत लवकरच भाजपात प्रवेश करणार असल्याचे संकेत मिळाले आहेत.

शिवाजी सावंत यांनी नंतर माध्यमांशी बोलताना सांगितले की, माढा तालुक्यातील विकासकामांसाठी निधी मागणीच्या निमित्ताने पालकमंत्री गोरे यांची भेट घेतली. मात्र, यावेळी इतर अनेक विषयांवर देखील चर्चा झाली. ही भेट सोलापूरातील वाडिया हॉस्पिटलमध्ये झाली असल्याचे वृत्त एका संकेतस्थळाने दिले आहे. त्यानंतर सावंत यांच्या प्रतिक्रियांमुळे त्यांच्या भाजप प्रवेशाची चर्चा अधिकच गडद झाली आहे. त्यामुळे या घडामोडींमुळे सोलापूर जिल्ह्यात शिंदे गटाच्या ताकदीला धक्का बसण्याची शक्यता आहे.

पक्षातील नाराजीचा स्फोट

गेल्या काही दिवसांपासून शिवाजी सावंत यांची शिंदे गटावरील नाराजी उघडपणे दिसत आहे. सुमारे पंधरा दिवसांपूर्वीच त्यांनी शिवसेना संपर्कप्रमुखपदाचा राजीनामा दिला होता. राजीनाम्याच्या वेळी त्यांनी स्पष्ट केले होते की, सोलापूर जिल्ह्यात पक्षातील महत्त्वाच्या निर्णय प्रक्रियेत त्यांना दुर्लक्षित केले जाते. संघटनात्मक नियुक्त्यांमध्ये कोणताही अधिकार दिला जात नाही, उलट वरिष्ठ स्तरावरून थेट निर्णय घेतले जातात, असा आरोप त्यांनी केला होता.

मात्र, राजीनाम्यानंतरही पक्षाच्या वरिष्ठांकडून त्यांच्या नाराजीची दखल घेतली गेली नाही. त्यांच्याशी कोणतीही चर्चा करण्यात आली नाही. यामुळे शिवाजी सावंत यांचे समर्थक अधिकच नाराज झाले. परिणामी, शनिवारी (16 ऑगस्ट) माढा तालुक्यातील कार्यकर्त्यांची बैठक आयोजित करण्यात आली होती.

कार्यकर्त्यांचा संताप उफाळला

या बैठकीत सावंत समर्थकांनी पक्ष नेतृत्वावर तीव्र टीका केली. माजी उपमहापौर दिलीप कोल्हे, संजय टोणपे, रवीना राठोड, मंगलताई कोल्हे, नवनाथ भजनावळे, मुन्ना साठे, जवाहर जाजू यांच्यासह अनेक पदाधिकाऱ्यांनी शिवसेना शिंदे गटाच्या कार्यपद्धतीवर नाराजी व्यक्त केली. 25 वर्षांपेक्षा जास्त काळ पक्षासाठी काम करूनही शिवाजी सावंत यांना निर्णय प्रक्रियेत स्थान दिले जात नसेल, तर अशा पक्षात राहण्यात अर्थ नाही, असे मत मांडले गेले.

बैठकीत उपस्थित कार्यकर्त्यांनी ठामपणे सांगितले की, आता शिवसेना सोडून बाहेर पडण्याची वेळ आली आहे. "आता पुरे झालं... इतक्या वर्षांच्या निष्ठेला प्रतिसाद मिळत नसेल तर भाजपात जाण्याशिवाय दुसरा पर्याय नाही," अशी भूमिका त्यांनी घेतली. यामुळे सोलापूर जिल्ह्यातील राजकारणात भाजप आणखी मजबूत होईल, अशी चर्चा सुरू आहे.

राजकीय परिणाम

शिवाजी सावंत भाजपात गेले तर माढा व सोलापूर परिसरातील समीकरणे मोठ्या प्रमाणावर बदलू शकतात. भाजपला या भागात स्थानिक पातळीवर नवा चेहरा आणि कार्यकर्त्यांचे जाळे मिळेल. दुसरीकडे, उपमुख्यमंत्री एकनाथ शिंदे यांना त्यांच्या विश्वासूंच्या गोट्यातूनच गळतीचा सामना करावा लागू शकतो. स्थानिक निवडणुका जवळ आल्या असताना या घडामोडींमुळे शिंदे गटावर मोठे राजकीय संकट ओढावण्याची शक्यता आहे.

Image Courtesy:

02 Jan 2026

BMC Elections

भाजपचा शिंदेंना अनपेक्षित झटका? मोठा नेता कमळाशी जोडणार हात, ग्रामीण राजकारणात उलथापालथ!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates