मराठवाडा पदवीधर मतदारसंघात भाजपाची मतांची भाकरी फिरविण्याची जोरदार तयारी; निवडणुकीत रंगणार नवा राजकीय खेळ!

सतीश भानुदासराव चव्हाण हे छत्रपती संभाजीनगर आणि मराठवाड्यातील एका प्रमुख शैक्षणिक संस्थेचे सरचिटणीस आहेत. २०२० मध्ये झालेल्या मागील निवडणुकीत त्यांनी भाजपाचे शिरीष भास्करराव बोराळकर यांचा पराभव करून विधान परिषदेतील तिसरा कार्यकाळ सुरू केला होता. २०२३ मध्ये राष्ट्रवादी काँग्रेसमध्ये झालेल्या फाटाफुटीनंतर त्यांनी सुरुवातीला अजित पवार गटाची साथ दिली. मात्र विधानसभा निवडणुकीच्या तोंडावर त्यांनी पुन्हा थोरल्या पवारांच्या गटात प्रवेश करून गंगापूर मतदारसंघात भाजपाच्या प्रशांत बंब यांना आव्हान दिले. त्यावेळी त्यांचा पन्नास हजारांहून अधिक मतांनी पराभव झाला. निवडणुकीनंतर पुन्हा ते अजित पवारांच्या गटात परतले, ज्यामुळे त्यांच्या राजकीय प्रवासात सततची चढउतार दिसून आली.