भाजपचा मोठा गेमप्लॅन उघड! ठाकरेच नाही तर शिंदेही रडारवर — मुंबई आणि कोकणात कमळाचं वर्चस्व प्रस्थापित करण्याची तयारी!

मुंबई : राज्यातील आगामी स्थानिक स्वराज्य संस्थांच्या निवडणुकीच्या पार्श्वभूमीवर राजकीय हालचालींना वेग आला आहे. जिल्हा परिषदांपासून ते महानगरपालिका निवडणुका होण्याच्या तयारीमुळे राज्यात "मिनी विधानसभा"सारखे राजकीय वातावरण तयार झाले आहे. सर्वच राजकीय पक्षांनी आपापल्या पातळीवर तयारी सुरू केली असून, युती-आघाडीच्या चर्चाही रंगत चालल्या आहेत. त्याचवेळी, काही पक्षांनी स्वबळावर निवडणूक लढवण्याचा नारा दिला आहे. भारतीय जनता पक्षाने (भाजप) देखील स्वतःच्या बळावर निवडणुकीचा सामना करण्याची चाचपणी सुरू केली आहे. विशेष म्हणजे, भाजपने आता केवळ उद्धव ठाकरे गटाचाच नव्हे, तर शिंदे गटालाही राजकीय धक्का देण्यासाठी रणनीती आखल्याची चर्चा सुरू झाली आहे. मुंबईसह संपूर्ण कोकणात भाजपचे वर्चस्व प्रस्थापित करण्यासाठी तयारी सुरू असल्याचे सूत्रांकडून कळते.