BEST Society Election: भाजप-ठाकरे दोघेही शून्यावर, शशांक राव यांच्या पॅनलचा एकहाती कब्जा – १४ जागांवर विजय!

by Webdesk
20 Aug 2025

मुंबई बेस्ट एम्प्लॉईज को-ऑपरेटिव्ह क्रेडिट सोसायटीच्या २०२५-२०३० या कार्यकाळासाठी झालेल्या संचालक मंडळाच्या निवडणुकीचे निकाल मंगळवारी रात्री उशिरापर्यंत झालेल्या मतमोजणीनंतर जाहीर झाले. या निवडणुकीत सर्वांचे लक्ष वेधून घेणारा निकाल लागला. कामगार नेते शशांक राव यांच्या पॅनलने तब्बल १४ जागांवर विजय मिळवून दणदणीत यश संपादन केले. तर महायुतीच्या सहकार समृद्धी पॅनलला केवळ ७ जागांवर समाधान मानावे लागले. सर्वात मोठा धक्का ठाकरे बंधूंच्या उत्कर्ष पॅनलला बसला. उद्धव ठाकरे आणि राज ठाकरे या दोघांनी एकत्र येऊन लढवलेले पॅनल एकही जागा जिंकू शकले नाही.

हा पराभव ठाकरे गट आणि मनसेसाठी मोठी धोक्याची घंटा मानला जात आहे, कारण काही महिन्यांवर येऊन ठेपलेल्या मुंबई महानगरपालिका निवडणुकीसाठी या दोन्ही पक्षांची संयुक्त रणनीती तयार होणार का याबाबत आधीच प्रश्नचिन्ह निर्माण झाले होते. बेस्टच्या निकालामुळे त्यांच्या आगामी राजकीय समीकरणांवर मोठा परिणाम होण्याची शक्यता व्यक्त केली जात आहे.

प्रतिष्ठेची निवडणूक

बेस्ट पतपेढीच्या संचालक मंडळाच्या २१ जागांसाठी १८ ऑगस्ट २०२५ रोजी निवडणूक पार पडली. ही निवडणूक फक्त एका पतपेढीपुरती मर्यादित नसून, ती मुंबईच्या राजकीय वातावरणाचा थर्मामीटर मानली जात होती. ठाकरे बंधूंच्या उत्कर्ष पॅनलला थेट आव्हान देण्यासाठी महायुतीने एकसंघ पॅनल उभे केले होते. यात भाजपचे नेते प्रवीण दरेकर, प्रसाद लाड यांच्या नेतृत्वाखालील श्रमिक उत्कर्ष सभा, मंत्री नितेश राणे यांची समर्थ बेस्ट कामगार संघटना आणि शिंदेसेनेचे किरण पावसकर यांच्या राष्ट्रीय कर्मचारी सेनेचा समावेश होता. या सर्वांनी एकत्र येऊन सहकार समृद्धी पॅनल तयार केले होते.

दुसऱ्या बाजूला ठाकरे गट व मनसे यांचा उत्कर्ष पॅनल रिंगणात होता. या दोन गटांची पहिलीच मोठी निवडणूक एकत्र लढवली गेल्याने या निवडणुकीकडे संपूर्ण राज्याचे लक्ष लागले होते.

पावसातही उत्स्फूर्त मतदान

मुसळधार पावसातदेखील या निवडणुकीला मतदारांचा जबरदस्त प्रतिसाद मिळाला. तब्बल ८३ टक्के मतदान झाले, जे बेस्ट पतपेढीच्या इतिहासातील मोठ्या टक्केवारीतले एक मानले जाते. रात्री उशिरापर्यंत झालेल्या मतमोजणीनंतर निकाल स्पष्ट झाला. शशांक राव यांच्या पॅनलने अपेक्षेपेक्षा खूपच मोठा विजय मिळवला.

निकालानुसार, २१ पैकी १४ जागांवर राव यांच्या पॅनलने कब्जा मिळवला. तर सहकार समृद्धी पॅनलला ७ जागा मिळाल्या. मात्र, ठाकरे बंधूंच्या उत्कर्ष पॅनलला एकही जागा मिळाली नाही.

ठाकरे गटाला धक्का

गेल्या ९ वर्षांपासून बेस्ट पतपेढीवर ठाकरे गटाचे वर्चस्व टिकून होते. मात्र या वेळी मतदारांनी त्यांना स्पष्ट नाकारले. उद्धव ठाकरे यांच्या गटाने १९ उमेदवार आणि मनसेने २ उमेदवार रिंगणात उतरवले होते. संपूर्ण संघटन, विभागप्रमुख, नगरसेवक यांना या निवडणुकीसाठी झोकून दिले होते. राजकारणातले प्रतिस्पर्धी असलेले उद्धव व राज ठाकरे या निवडणुकीसाठी एकत्र आल्याने हा निकाल त्यांच्यासाठी अधिक लाजिरवाणा मानला जातो.

प्रसाद लाड विरुद्ध ठाकरे बंधू — पण राव आघाडीवर

निवडणुकीचा प्रचार वाढत असताना ही लढत ठाकरे बंधू विरुद्ध भाजपचे प्रसाद लाड अशी रंगली होती. मात्र अंतिम क्षणी सगळा डाव उलटला आणि शशांक राव यांच्या पॅनलने दोन्ही बाजूंना मागे टाकत स्पष्ट बहुमत मिळवले. या विजयाने त्यांनी फक्त पतपेढीतील सत्ता मिळवली नाही तर आगामी मुंबई महानगरपालिका निवडणुकीच्या पार्श्वभूमीवरही मोठा संदेश दिला आहे.

अंतिम आकडेवारी

शशांक राव पॅनल – १४ जागा

सहकार समृद्धी पॅनल (भाजप-शिंदे गट-नितेश राणे गट) – ७ जागा

उत्कर्ष पॅनल (ठाकरे बंधूंचे शिवसेना-मनसे संयुक्त पॅनल) – ० जागा

या पराभवामुळे ठाकरे बंधूंच्या राजकीय समीकरणांवर मोठा प्रश्नचिन्ह निर्माण झाला आहे. बेस्ट पतपेढीतून मिळालेला हा संदेश मुंबई महानगरपालिका निवडणुकीच्या रणांगणात कितपत परिणाम करतो, याकडे सगळ्यांचे लक्ष लागले आहे.

Image Courtesy:

02 Jan 2026

BMC Elections

BEST Society Election: भाजप-ठाकरे दोघेही शून्यावर, शशांक राव यांच्या पॅनलचा एकहाती कब्जा – १४ जागांवर विजय!

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates