Ajit Pawar Pune Visit: ‘जनसंवाद’च्या माध्यमातून पुण्यात निवडणुकीची बिगुल वाजवत अजित पवारांची थेट जनता भेट मोहीम सुरू

पुणे : स्थानिक स्वराज्य संस्थांच्या आगामी निवडणुकांचा बिगुल वाजत असताना, राज्याचे उपमुख्यमंत्री अजित पवार यांनी थेट रणांगण गाठले आहे. पुणे जिल्ह्यातून 'जनसंवाद' या उपक्रमाची सुरुवात करून ते मतदारांशी थेट संवाद साधणार आहेत. त्यांच्या कार्यक्षेत्र असलेल्या पुणे जिल्ह्यातूनच हा उपक्रम सुरू होत असल्याने त्याला विशेष महत्त्व आहे. पालकमंत्री म्हणून अजित पवार नागरिकांच्या प्रश्नांना थेट प्रतिसाद देणार असून, समस्यांचे निराकरण त्वरित करण्याचा प्रयत्न करणार आहेत. या संवादातून नागरिकांबरोबरच पक्षातील कार्यकर्ते व इच्छुक उमेदवार यांच्या मनातील भावना समजून घेण्याचा प्रयत्न होणार आहे. विशेष म्हणजे, प्रभाग रचनेत झालेल्या अन्यायाबद्दल अजित पवार भूमिका घेणार का, याकडे सगळ्यांचे लक्ष लागले आहे.