विधानसभेनंतर राज्यात १५ लाख नव्या मतदारांची नोंदणी, बीएमसीत मतदारसंख्या ओलांडली १ कोटीचा टप्पा!

काँग्रेसचे नेते राहुल गांधी यांनी अलीकडेच निवडणूक आयोगावर गंभीर आरोप करताना महाराष्ट्रातील मतदार यादीतील घोळावर बोट ठेवले होते. विशेषतः राजुरा मतदारसंघात हजारो मतदारांची नावे मतदार याद्यांमधून गाळण्यात आल्याचे त्यांनी सांगितले होते. गुरुवारी झालेल्या पत्रकार परिषदेत त्यांनी हे आरोप स्पष्टपणे मांडले. या पार्श्वभूमीवर आता विधानसभा निवडणुकीनंतर मतदार याद्यांमध्ये झालेल्या बदलांची अधिकृत आकडेवारी समोर आली असून त्याने राज्यातील राजकीय वातावरण आणखी तापवले आहे.

 

नोव्हेंबर २०२४ मध्ये झालेल्या विधानसभा निवडणुकीनंतर महाराष्ट्रात एकूण १४.७१ लाख नवे मतदार नोंदवले गेले आहेत. त्याचबरोबर ४.०९ लाख मतदारांची नावे मतदार याद्यांतून कमी करण्यात आली असल्याची माहिती एका वरिष्ठ निवडणूक अधिकाऱ्याने दिली आहे. म्हणजेच एका बाजूला नव्या मतदारांची मोठ्या प्रमाणात भर पडली आहे, तर दुसरीकडे अनेकांची नावे वगळली गेली आहेत. राज्यात सर्वाधिक वाढ ठाण्यात झाली असून येथे तब्बल दोन लाख पंचवीस हजार नवे मतदार जोडले गेले आहेत. त्यामुळे ठाण्यातील एकूण मतदारसंख्या आता ७४.५५ लाखांपर्यंत पोहोचली आहे. दुसऱ्या क्रमांकावर पुणे असून येथे एक लाख ब्याऐंशी हजार नवे मतदार यादीत समाविष्ट झाले आहेत. पुण्यातील मतदारसंख्या आता ९०.३२ लाख झाली आहे.

 

मुंबई उपनगरात ९५ हजारांहून अधिक नवे मतदार नोंदवले गेले आहेत आणि त्यामुळे उपनगरातील मतदारसंख्या ७७.८१ लाखांवर पोहोचली आहे. मुंबई शहरात १८ हजारांहून अधिक नवे मतदार वाढले असून एकूण संख्या २५.६२ लाख झाली आहे. अशा प्रकारे केवळ नोव्हेंबरपासून आतापर्यंत मुंबई महानगर परिसरात तब्बल १.१४ लाख नव्या मतदारांची नोंदणी झाली आहे. परिणामी आगामी मुंबई महापालिका निवडणुकीत मतदारांची संख्या थेट १.०३ कोटींवर पोहोचली आहे.