गोगावलेंच्या अनुपस्थितीनंतर आता एकनाथ शिंदेही कॅबिनेटला गैरहजर; महायुतीतल्या अंतर्गत घडामोडींवर नवे प्रश्नचिन्ह

by Webdesk
12 Aug 2025

मुंबई : प्रचंड बहुमत मिळवून सत्तेत आलेल्या महायुतीच्या तीनही घटक पक्षांमध्ये सध्या सत्तावाटप आणि निर्णयप्रक्रियेवरून तणाव असल्याच्या चर्चा पुन्हा एकदा गतीमान झाल्या आहेत. शिवसेना (शिंदे गट) चे संघटनात्मक व राजकीय खच्चीकरण सुरू असल्याच्या आरोपांच्या पार्श्वभूमीवर आता आणखी एक वादग्रस्त प्रसंग समोर आला आहे. राज्याच्या मंत्रिमंडळात ‘पालकमंत्री’ पदावरून निर्माण झालेला तिढा पुन्हा चर्चेच्या केंद्रस्थानी पोहोचला असून, आज होणाऱ्या कॅबिनेट बैठकीत भरत गोगावले यांच्यानंतर उपमुख्यमंत्री एकनाथ शिंदे देखील अनुपस्थित राहणार असल्याची माहिती समोर आली आहे. या घडामोडींमुळे महायुतीत नेमके काय सुरू आहे, याबद्दल राजकीय वर्तुळात चर्चा चांगलीच पेटली आहे.

स्वातंत्र्यदिनाच्या ध्वजारोहणाच्या कार्यक्रमाच्या निमित्ताने राज्याच्या राजकारणात नवा वादंग निर्माण झाला. रायगड जिल्ह्याच्या पालकमंत्री पदासाठी भरत गोगावले यांनी ठाम भूमिका घेतली होती, तर राष्ट्रवादी काँग्रेसच्या नेत्या आदिती तटकरे यांनीही त्याच पदावर हक्क सांगितला होता. यामुळे मुख्यमंत्री देवेंद्र फडणवीस यांनी या नियुक्तीला तात्पुरती स्थगिती दिली. परिणामी, स्वातंत्र्यदिनी रायगडमध्ये ध्वजारोहण नेमके कोण करणार, हा प्रश्न काही दिवसांपासून अनुत्तरित राहिला होता. अखेर राज्य शासनाने परिपत्रक काढून आदिती तटकरे या रायगड जिल्ह्यातील ध्वजारोहण करतील, असे स्पष्ट केले.

दरम्यान, भरत गोगावले यांनी आपली नाराजी असल्याचे नाकारले. त्यांनी सांगितले की, आपला दिल्ली दौरा हा पूर्वनियोजित होता आणि त्यामुळेच आजच्या कॅबिनेट बैठकीला उपस्थित राहणे शक्य झाले नाही. तसेच, केवळ ध्वजारोहणाच्या कार्यक्रमावरून कोण पालकमंत्री ठरतो, हे मोजता येत नाही, असेही त्यांनी नमूद केले.

परंतु आता या अनुपस्थितीच्या मालिकेत उपमुख्यमंत्री एकनाथ शिंदे यांचाही समावेश झाला आहे. शिंदे हे सध्या श्रीनगरमध्ये असून, शिवसेना (शिंदे गट) ने सोमवारी जम्मूमध्ये आयोजित केलेल्या रक्तदान शिबिरानंतर ते जम्मू-काश्मीर दौऱ्यावर आहेत. सूत्रांच्या माहितीनुसार, आज ते श्रीनगरमध्येच राहणार असून, त्यामुळे ते कॅबिनेट बैठकीसाठी उपस्थित राहू शकणार नाहीत.

राजकीय वर्तुळात आता चर्चेचा विषय असा आहे की, एकनाथ शिंदे यांचा हा निर्णय केवळ दौऱ्यामुळे झाला आहे की ही कोणतीतरी अप्रत्यक्ष नाराजी व्यक्त करण्याची पद्धत आहे? शिंदे हे नेहमी दौरे, सभा, आणि बैठकींमध्ये सक्रिय दिसतात. अनेकदा ते मागच्या दिवशी उशिरा पर्यंत कार्यक्रम आटोपून दुसऱ्या दिवशी लवकर बैठकीत सहभागी झालेले आहेत. मात्र, यावेळी त्यांनी थेट कॅबिनेटला गैरहजर राहण्याचा निर्णय घेतल्याने चर्चांना आणखी उधाण आले आहे.

महायुतीतले अंतर्गत मतभेद, सत्तावाटपावरील भूमिका, आणि काही महत्वाच्या निर्णयांवर असलेले मतभेद हे गेल्या काही दिवसांपासून उघडपणे दिसू लागले आहेत. विशेषतः पालकमंत्री पदावरील वादामुळे शिवसेना (शिंदे गट) आणि राष्ट्रवादी काँग्रेस (अजित पवार गट) यांच्यातील तणाव अधिकच स्पष्ट झाला आहे. भरत गोगावले यांच्या अनुपस्थितीला त्यांनी कारण सांगून समेट साधण्याचा प्रयत्न केला असला, तरी सलग दोन महत्वाचे नेते कॅबिनेटला गैरहजर राहिल्याने ‘मित्रपक्षांमध्ये खरंच सर्व काही सुरळीत आहे का?’ हा प्रश्न आता जनतेच्या मनात निर्माण झाला आहे.

राजकीय विश्लेषकांच्या मते, अशा प्रसंगांचा परिणाम केवळ अंतर्गत तणावापुरता मर्यादित राहत नाही, तर तो कार्यकर्त्यांच्या मनोबलावर आणि जनतेच्या विश्वासावरही परिणाम करतो. महायुती सत्तेवर आली तेव्हा एकसंघपणे काम करून स्थिर सरकार देण्याचे आश्वासन देण्यात आले होते. परंतु सध्याच्या घडामोडींनी एकात्मतेवर प्रश्नचिन्ह उपस्थित केले आहे.

आता लक्ष असेल ते आगामी दिवसांत होणाऱ्या महत्त्वाच्या बैठका आणि निर्णयांवर, जे महायुतीच्या घटक पक्षांमधील नातेसंबंध आणि राजकीय समीकरणे स्पष्ट करतील. एकनाथ शिंदे यांचा श्रीनगरमधील मुक्काम हा केवळ वाढीव दौरा आहे की सूचक नाराजी, यावर पुढील काही दिवसांत अधिक प्रकाश पडेल.

Image Courtesy:

02 Jan 2026

BMC Elections

Related News

BMC Election: किती उमेदवारांचे अर्ज वैध, किती बाद? मुंबई महापालिकेत अखेर कितीजण मैदानात?

मुंबईकरांसाठी मोठी घोषणा: १० रुपयांचा नाश्ता आणि महिलांना १५०० रुपये, ज्युनिअर ठाकरेंचा महामेगाप्लान उघड

BMC निवडणूक: ठाकरे बंधूंची 227 उमेदवारांची अंतिम यादी जाहीर! तुमच्या प्रभागातून कोण मैदानात? पाहा सविस्तर

Mumbai civic polls: NCP to approach State Election Commission, alleges bias favouring BJP–Shiv Sena candidates