शहरबात : मतदारसंघ बदलाच्या नावाखाली सुरू असलेला प्रभागचोरीचा राजकारणी कटकारस्थानाचा खेळ

नवी मुंबई महापालिकेत नाईक कुटुंबाचा दीर्घकाळ प्रभाव राहिला आहे. ते कोणत्याही पक्षात असले तरी सत्तेत त्यांचा वाटा हमखास दिसून आला आहे. मात्र, राज्यात अडीच वर्षांपूर्वी सत्ताबदल झाला तेव्हा गणेश नाईक यांना मंत्रिमंडळात स्थान मिळालं नाही. यामागे शिंदे यांचा दबाव असल्याचा आरोप त्यांचे समर्थक सातत्याने करत आले आहेत. नंतर नोव्हेंबरमधील मोठ्या विजयात भाजपचा मुख्यमंत्री होणार हे निश्चित झाल्यावर नाईकांनी राजकीय कौशल्य दाखवत मंत्रिमंडळात स्थान मिळवलं. शिंदे गटाकडून मात्र नाईकांवर ‘मोठ्या उद्योगपतींच्या मदतीने पद मिळवलं’ अशा टोमण्यांचा वर्षाव झाला. त्यावर नाईकांनी राजकीय चातुर्य दाखवत “मला सर्वांचे सहकार्य मिळाले” असे उत्तर देत परिस्थिती हाताळली.

 

मंत्री झाल्यापासून नाईक सातत्याने शिंदे यांच्या विरोधात उघडपणे बोलत आहेत. शिंदे यांच्या बालेकिल्ल्यात जाऊन ‘ओन्ली कमळ’चा नारा देणे, “नवी मुंबईचं पाणी-भूखंड कुणी चोरलं?” असा सवाल ठाण्यात उपस्थित करणे, अगदी १५ ऑगस्टच्या कार्यक्रमात “शिंदेंना मुख्यमंत्री पदाची लॉटरी लागली” असा उपरोध करणे — या वक्तव्यांनी त्यांनी आपली भूमिका स्पष्ट केली आहे. इतकं असूनही शिंदे यांनी मात्र नाईकांविषयी कोणतीही थेट प्रतिक्रिया दिलेली नाही. उघड संघर्ष नको, पण ‘थंड करून खाण्याची’ त्यांची शैली परिचित असल्यामुळे परिस्थिती वेगळीच आहे.

दरम्यान, महापालिका आयुक्त डॉ. कैलाश शिंदे यांनी सादर केलेल्या प्रभाग रचनेच्या आराखड्यातूनच शिंदेंची रणनीती झळकतेय, असा आरोप आहे. या रचनेत नाईकांचा प्रभाव कमी करण्याचा डाव असल्याचं बोललं जातंय.